અમદાવાદ/ગાંધીનગર: ગુજરાતની રાજધાની ગાંધીનગર અને અમદાવાદમાં મંગળવારે મળેલા એક ધમકીભર્યા ઈમેઇલે સુરક્ષા એજન્સીઓમાં ભારે ચિંતા અને દોડધામ મચાવી દીધી હતી. મુખ્યમંત્રી કાર્યાલય (CMO), અમદાવાદ મ્યુનિસિપલ કોર્પોરેશન (AMC)ની મુખ્ય કચેરી અને RSS કાર્યાલયને બોમ્બથી ઉડાવી દેવાની ધમકી આપવામાં આવી હતી. ખાસ વાત એ છે કે ઈમેઇલમાં માત્ર સ્થળોના નામ જ નહીં પરંતુ વિસ્ફોટ માટે ચોક્કસ સમય પણ દર્શાવવામાં આવ્યો હતો, જેના કારણે પોલીસ અને સુરક્ષા તંત્રે મામલાને અત્યંત ગંભીરતાથી લીધો હતો.
પ્રાથમિક માહિતી મુજબ અજાણ્યા વ્યક્તિ દ્વારા મોકલાયેલા ઈમેઇલમાં ગાંધીનગર સ્થિત મુખ્યમંત્રી કાર્યાલયને બપોરે 1:11 વાગ્યે, અમદાવાદ મ્યુનિસિપલ કોર્પોરેશનની દાણાપીઠ કચેરીને 3:11 વાગ્યે અને RSS કાર્યાલયને સાંજે 5:11 વાગ્યે બોમ્બ બ્લાસ્ટથી ઉડાવી દેવાની ધમકી આપવામાં આવી હતી. આ ત્રણેય સમયનો ઉલ્લેખ ઈમેઇલમાં સ્પષ્ટ રીતે કરવામાં આવતા સુરક્ષા એજન્સીઓ સતર્ક બની ગઈ હતી. ત્રણ બોમ્બની ધમકીમાં એક આંકડો કોમન છે. ત્રણેય ધમકીમાં પાછળ 11 રાખવામાં આવ્યું છે. શું આ કોઇ સંકેત છે, એ મુદ્દા પર પણ સુરક્ષા એજન્સીઓ તપાસ કરશે.
CM ઓફિસ, AMC અને RSS કચેરીને બોમ્બથી ઉડાવવાની ધમકી: અમદાવાદ-ગાંધીનગરમાં ધમકીભર્યો ઈમેલ મળતા હડકંપ
ચોક્કસ સમયના ઉલ્લેખે તપાસ એજન્સીઓનું ધ્યાન ખેંચ્યું
ક્રાઈમ તપાસ સાથે જોડાયેલા સૂત્રોનું માનવું છે કે ધમકીભર્યા ઈમેઇલમાં ચોક્કસ સમયનો ઉલ્લેખ કરવો એ સામાન્ય બાબત નથી. સામાન્ય રીતે આવા ઈમેઇલમાં માત્ર સ્થળ અથવા તારીખનો ઉલ્લેખ જોવા મળે છે, જ્યારે અહીં 1:11, 3:11 અને 5:11 જેવા ચોક્કસ સમય દર્શાવવામાં આવ્યા હતા. તપાસ એજન્સીઓ હવે આ સમય પાછળ કોઈ વિશેષ સંકેત, કોડેડ મેસેજ અથવા માનસિક દબાણ ઊભું કરવાનો પ્રયાસ હતો કે કેમ તે દિશામાં પણ તપાસ કરી રહી છે. ધમકી મળતા જ ગાંધીનગર સ્થિત મુખ્યમંત્રી કાર્યાલયમાં સુરક્ષા વ્યવસ્થા વધુ સઘન બનાવવામાં આવી હતી. પોલીસ, બોમ્બ ડિસ્પોઝલ સ્ક્વોડ અને અન્ય સુરક્ષા એજન્સીઓએ સમગ્ર પરિસરની ચકાસણી હાથ ધરી હતી. અધિકારીઓએ કચેરીમાં આવન-જાવન પર પણ કડક નજર રાખી હતી.
AMC કચેરી ખાલી કરાવાઈ, ડોગ સ્ક્વોડ તૈનાત
અમદાવાદ મ્યુનિસિપલ કોર્પોરેશનની દાણાપીઠ સ્થિત મુખ્ય કચેરીને બપોરે 3:11 વાગ્યે ઉડાવી દેવાની ધમકી મળતા તંત્ર દ્વારા તાત્કાલિક સાવચેતીના પગલાં લેવામાં આવ્યા હતા. કર્મચારીઓ અને મુલાકાતીઓને સુરક્ષિત સ્થળે ખસેડવામાં આવ્યા હતા. બોમ્બ ડિસ્પોઝલ સ્ક્વોડ, ડોગ સ્ક્વોડ અને પોલીસની વિશેષ ટીમોએ બિલ્ડિંગના તમામ માળ, ઓફિસો, પાર્કિંગ વિસ્તાર અને જાહેર સ્થળોની સઘન તપાસ કરી હતી.
સુરક્ષા તપાસ દરમિયાન કોઈ શંકાસ્પદ વસ્તુ મળી આવી ન હોવા છતાં તંત્રે કોઈ જોખમ ન લેતા સમગ્ર પરિસરને સુરક્ષા કવચ હેઠળ રાખ્યું હતું. શહેરના અન્ય મહત્વપૂર્ણ સરકારી મકાનો અને જાહેર સ્થળો પર પણ વધારાની પોલીસ તૈનાત કરવામાં આવી હતી.
RSS કાર્યાલયને પણ નિશાન બનાવાયું
ધમકીભર્યા ઈમેઇલમાં RSS કાર્યાલયને સાંજે 5:11 વાગ્યે નિશાન બનાવવાની વાત કરવામાં આવી હતી. આ માહિતી મળતા સુરક્ષા એજન્સીઓએ RSS કાર્યાલયની આસપાસ પણ ચુસ્ત બંદોબસ્ત ગોઠવ્યો હતો. પ્રવેશદ્વારો પર ચેકિંગ વધારવામાં આવ્યું હતું અને સમગ્ર વિસ્તારની સઘન તપાસ હાથ ધરવામાં આવી હતી. તપાસ એજન્સીઓનું કહેવું છે કે હાલમાં ધમકીની વિશ્વસનીયતા અને ઈમેઇલ પાછળના વ્યક્તિ કે જૂથની ઓળખ અંગે વિવિધ ટેકનિકલ પાસાઓની તપાસ ચાલી રહી છે. સાયબર ક્રાઈમ વિભાગ ઈમેઇલનો IP ટ્રેસ, સર્વર લોકેશન અને ડિજિટલ ફૂટપ્રિન્ટના આધારે આરોપી સુધી પહોંચવાના પ્રયાસ કરી રહ્યો છે.
અગાઉ પણ આવી ચૂક્યા છે ધમકીભર્યા ઈમેઇલ
નોંધનીય છે કે છેલ્લા કેટલાક સમયથી દેશના વિવિધ શહેરોમાં સરકારી કચેરીઓ, શૈક્ષણિક સંસ્થાઓ, એરપોર્ટ અને ધાર્મિક સ્થળોને બોમ્બથી ઉડાવી દેવાની ખોટી ધમકીઓ આપવાના બનાવોમાં વધારો નોંધાયો છે. ગુજરાતમાં પણ અગાઉ 10 જૂનથી 30 સપ્ટેમ્બર વચ્ચે વિવિધ સ્થળોએ વિસ્ફોટ કરવાની ધમકી આપતા ઈમેઇલ મળ્યા હતા. જોકે મોટા ભાગના કિસ્સાઓમાં તપાસ બાદ ધમકીઓ ખોટી સાબિત થઈ હતી, છતાં સુરક્ષા એજન્સીઓ કોઈપણ ધમકીને હળવાશથી લેતી નથી. કારણ કે આવી ધમકીઓ માત્ર ભયનું વાતાવરણ જ ઊભું કરતી નથી, પરંતુ સરકારી તંત્ર અને સુરક્ષા વ્યવસ્થાને પણ ભારે દોડધામમાં મૂકી દે છે.
બોમ્બની ધમકી અંગે સરકારના મંત્રીનું નિવેદનઃ
બોમ્બની ધમકી ભર્યા ઇમેલ અંગે માહિતી આપતા ગુજરાત સરકારના રાજ્યમંત્રી પ્રવણી માળીએ જણાવ્યું હતું કે, કોઇક અજાણ્યા ઇમેલ પરથી CMO, AMCને બોમ્બથી ઉડાવી દેવાની ધમકી આપવામાં આવી હતી. પ્રધાનમંત્રી મોદીને 12 વર્ષનો કાર્યકાળ પૂર્ણ થવા સમયે કોઇએ જાણી જોઇને આવું કૃત્ય કર્યું હોય તેવું લાગી રહ્યું છે. જેને ગુજરાતની શાંતિ સારી ન લાગતી હોય જે ગુજરાતની શાંતિ ડહોળવા ઇચ્છતુ હોય એણે જ આવ્યું કામ કર્યું હોય. હાલ સુરક્ષાને લઇને તમામ પગલા અને તપાસ કરાઈ રહી છે.
હાલ સમગ્ર મામલે પોલીસ, સાયબર ક્રાઈમ અને ગુપ્તચર એજન્સીઓ સંયુક્ત તપાસ કરી રહી છે. ઈમેઇલ મોકલનારની ઓળખ અને તેના હેતુ અંગે આગામી દિવસોમાં વધુ વિગતો સામે આવી શકે છે. ત્યાં સુધી અમદાવાદ અને ગાંધીનગરના મહત્વપૂર્ણ સરકારી અને સંવેદનશીલ સ્થળોએ સુરક્ષા વ્યવસ્થા વધુ કડક રાખવામાં આવી છે.
