Ahmedabad Police Raid Illegal Bangladeshi Immigrants: ગુજરાતની આર્થિક રાજધાની અમદાવાદમાં કાયદો અને વ્યવસ્થા જાળવવા તેમજ અનધિકૃત રીતે વસવાટ કરતા તત્વોને શોધી કાઢવા માટે ક્રાઈમ બ્રાન્ચ દ્વારા એક અત્યંત મહત્વનું અને મોટું ઓપરેશન હાથ ધરવામાં આવ્યું હતું. ગત મોડી રાત્રે શહેરના સંવેદનશીલ વિસ્તારોમાં પોલીસ અને ક્રાઈમ બ્રાન્ચની સંયુક્ત ટીમો ત્રાટકી હતી, જેના પરિણામે મોટી સંખ્યામાં શંકાસ્પદ લોકોની અટકાયત કરવામાં આવી છે. આ કાર્યવાહીના પ્રથમ તબક્કાના અંતે ચોંકાવનારા આંકડા સામે આવ્યા છે, જેમાં 131 લોકો બાંગ્લાદેશી નાગરિક હોવાનું સ્પષ્ટ થયું છે.
291 શકમંદોની અટકાયત, પોલીસનું સઘન ચેકિંગ
અમદાવાદના વિવિધ વિસ્તારોમાં ચાલતી ગેરકાયદેસર પ્રવૃત્તિઓ અને બાંગ્લાદેશી નાગરિકોના અનધિકૃત વસવાટને રોકવા માટે પોલીસ દ્વારા આ ઓપરેશનનું આયોજન કરવામાં આવ્યું હતું. ગઈકાલે મોડી રાત્રે પોલીસના ઉચ્ચ અધિકારીઓના માર્ગદર્શન હેઠળ ક્રાઈમ બ્રાન્ચ અને સ્થાનિક પોલીસની ટીમોએ સંયુક્ત રીતે શહેરના ચંડોળા તળાવ, ગુલાબનગર અને દાણીલીમડાના ખોડિયારનગર વિસ્તારને કોર્ડન કરી લીધા હતા. આ મેગા ઓપરેશન દરમિયાન 291 શંકાસ્પદ વ્યક્તિઓને રાઉન્ડઅપ કરીને પૂછપરછ માટે ક્રાઈમ બ્રાન્ચ ખાતે લાવવામાં આવ્યા હતા.
131 બાંગ્લાદેશીઓની ઓળખ: અન્ય 160 લોકોની તપાસ ચાલુ
પોલીસ દ્વારા હાથ ધરવામાં આવેલી સઘન પૂછપરછ અને દસ્તાવેજોની ચકાસણી બાદ, અત્યાર સુધીમાં 131 લોકો બાંગ્લાદેશના નાગરિક હોવાની પુષ્ટિ થઈ છે. આ તમામ લોકો પાસે ભારતમાં રહેવા માટેના કોઈ પણ કાયદેસરના દસ્તાવેજો કે, પુરાવા મળી આવ્યા નથી. આ સિવાય, બાકી રહેલા 160 જેટલા શંકાસ્પદ લોકોની પોલીસ દ્વારા ઝીણવટભરી પૂછપરછ કરવામાં આવી રહી છે. તેમના રહેણાંક પુરાવા અને ઓળખ અંગેની ખરાઈ કરવાની કાર્યવાહી હાલ યુદ્ધના ધોરણે ચાલી રહી છે.
આરોપીઓને ક્રાઈમ બ્રાન્ચ કેમ્પસમાં રખાયા
આ સમગ્ર ઓપરેશન દરમિયાન પોલીસ વિભાગના તમામ સ્તરના અધિકારીઓ અને કર્મચારીઓ ખડેપગે રહ્યા હતા. પકડાયેલા 131 બાંગ્લાદેશીઓને અને પૂછપરછ હેઠળના અન્ય શંકાસ્પદ લોકોને હાલ કડક સુરક્ષા વચ્ચે ક્રાઈમ બ્રાન્ચના કેમ્પસમાં રાખવામાં આવ્યા છે. આગામી સમયમાં કાયદેસરની પ્રક્રિયા પૂર્ણ કર્યા બાદ આ તમામ સામે કડક કાયદાકીય પગલાં ભરવામાં આવશે. અમદાવાદ પોલીસની આ આક્રમક કામગીરીને કારણે શહેરમાં ગેરકાયદે વસવાટ કરતા તત્વોમાં ભારે ફફડાટ જોવા મળી રહ્યો છે.
