અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર એર ઈન્ટેલિજન્સ યુનિટ (AIU)એ આંતરરાષ્ટ્રીય ડ્રગ્સ હેરાફેરીના વધુ એક કેસનો પર્દાફાશ કર્યો છે. શનિવારે રાત્રે બેંગકોકથી અમદાવાદ પહોંચેલા એક પેસેન્જર પાસેથી અંદાજે 6.540 કિલોગ્રામ ગાંજો જપ્ત કરવામાં આવ્યો હતો. આ મામલે આરોપી સામે NDPS એક્ટ હેઠળ ગુનો નોંધી તેની ધરપકડ કરવામાં આવી છે.
એરપોર્ટ સુરક્ષા એજન્સીઓના જણાવ્યા મુજબ આરોપી પેસેન્જરે અત્યંત ચાતુરાઈથી ગાંજાને ટ્રોલી બેગમાં વેક્યુમ પેકિંગ કરીને છુપાવ્યો હતો. જોકે, ગુપ્ત બાતમી અને સઘન ચેકિંગના કારણે આખું કાવતરું બહાર આવી ગયું.
બેંગકોકથી આવેલી ફ્લાઈટ પર હતી નજર
મળતી માહિતી અનુસાર એર ઈન્ટેલિજન્સ યુનિટને અગાઉથી જ ચોક્કસ ઇનપુટ મળ્યો હતો કે બેંગકોકથી અમદાવાદ આવતી ફ્લાઈટ મારફતે નશીલા પદાર્થોની હેરાફેરી થવાની છે.
આ માહિતીના આધારે થાઈ એરવેઝ ઈન્ટરનેશનલની ફ્લાઈટ નંબર TG-343 દ્વારા આવેલા મુસાફરો પર ખાસ નજર રાખવામાં આવી રહી હતી. ફ્લાઈટ અમદાવાદ એરપોર્ટ પર ઉતર્યા બાદ એક શંકાસ્પદ પેસેન્જરને અટકાવી તેના સામાનની વિગતવાર તપાસ કરવામાં આવી હતી.
સ્કેનિંગ દરમિયાન ટ્રોલી બેગમાં શંકાસ્પદ સામગ્રી જોવા મળતાં અધિકારીઓએ બેગ ખોલીને તપાસ હાથ ધરી હતી.
6 વેક્યુમ સીલ પેકેટમાંથી મળ્યો ગાંજો
તપાસ દરમિયાન પેસેન્જરની બેગમાંથી કુલ 6 વેક્યુમ સીલ કરેલા પેકેટ મળી આવ્યા હતા. પેકેટ ખોલતાં તેની અંદર લીલા રંગનો સૂકો છોડ જેવો પદાર્થ જોવા મળ્યો હતો.
એરપોર્ટ પર જ કરવામાં આવેલા પ્રાથમિક પરીક્ષણમાં તે ગાંજો હોવાનું સ્પષ્ટ થયું હતું. ત્યારબાદ સમગ્ર જથ્થાનું વજન કરવામાં આવતાં કુલ 6.540 કિલોગ્રામ હાઇડ્રોપોનીક ગાંજો હોવાનું સામે આવ્યું હતું.
આટલી મોટી માત્રામાં ગાંજો આંતરરાષ્ટ્રીય ફ્લાઈટ મારફતે ભારતમાં લાવવાનો પ્રયાસ થવાથી તપાસ એજન્સીઓ પણ સતર્ક બની ગઈ છે.
પહેલી જ વિદેશ યાત્રામાં બન્યો ‘ડ્રગ કેરિયર’
પકડાયેલા આરોપીની પૂછપરછમાં ચોંકાવનારી વિગતો સામે આવી છે. આરોપી મૂળ છત્તીસગઢના રાયપુરનો રહેવાસી હોવાનું સામે આવ્યું છે.
સૌથી આશ્ચર્યજનક બાબત એ છે કે તેની આ જીવનની પ્રથમ વિદેશ યાત્રા હતી. પ્રાથમિક પૂછપરછમાં એવું જાણવા મળ્યું છે કે મોટી કમાણીની લાલચે તે ડ્રગ્સ માફિયાઓના સંપર્કમાં આવ્યો હતો અને ‘ડ્રગ કેરિયર’ તરીકે ગાંજાની હેરાફેરી કરવા તૈયાર થયો હતો.
તપાસ એજન્સીઓ હવે આ દિશામાં પણ તપાસ કરી રહી છે કે આરોપીને આ કામ માટે કેટલા પૈસાની ઓફર કરવામાં આવી હતી અને તેના પાછળ કઈ ગેંગ સક્રિય છે.
આંતરરાષ્ટ્રીય ડ્રગ્સ નેટવર્કની તપાસ શરૂ
AIU અને અન્ય સુરક્ષા એજન્સીઓ હવે સમગ્ર કેસના મૂળ સુધી પહોંચવા માટે સઘન તપાસ ચલાવી રહી છે. આરોપી બેંગકોકથી કોના સંપર્કમાં આવ્યો હતો, ગાંજો ક્યાંથી મેળવ્યો હતો અને અમદાવાદ અથવા ભારતના અન્ય શહેરોમાં કોને ડિલિવરી આપવાની હતી તે મુદ્દે પૂછપરછ ચાલી રહી છે.
સૂત્રો અનુસાર આ કેસ આંતરરાષ્ટ્રીય ડ્રગ્સ નેટવર્ક સાથે જોડાયેલો હોઈ શકે છે. ખાસ કરીને દક્ષિણ-પૂર્વ એશિયાથી ભારત સુધી ડ્રગ્સ સપ્લાય કરતી ગેંગ અંગે તપાસ એજન્સીઓ માહિતી એકત્ર કરી રહી છે.
તાજેતરમાં આંતરરાષ્ટ્રીય એરપોર્ટ્સ મારફતે ગાંજો, MD ડ્રગ્સ, કોકેઈન અને અન્ય નશીલા પદાર્થોની હેરાફેરીના કેસોમાં વધારો નોંધાયો છે, જેના કારણે એરપોર્ટ સુરક્ષા એજન્સીઓ વધુ સતર્ક બની છે.
NDPS એક્ટ હેઠળ કાર્યવાહી
આરોપી સામે નાર્કોટિક ડ્રગ્સ એન્ડ સાયકોટ્રોપિક સબસ્ટાન્સિસ (NDPS) એક્ટ હેઠળ ગુનો નોંધી કાયદેસરની કાર્યવાહી શરૂ કરવામાં આવી છે.
NDPS કાયદા હેઠળ આટલી મોટી માત્રામાં નશીલા પદાર્થોની હેરાફેરી ગંભીર ગુનો ગણાય છે અને તેમાં કડક સજા તથા લાંબી જેલની જોગવાઈ છે.
તપાસ એજન્સીઓ હવે આરોપીના મોબાઈલ ફોન, ટ્રાવેલ હિસ્ટ્રી અને નાણાકીય વ્યવહારોની પણ તપાસ કરી રહી છે.
મિડલ ઈસ્ટ યુદ્ધ વચ્ચે ભારતને મળી મોટી રાહત! : વિશ્વનો સૌથી જોખમી માર્ગ પસાર કરી ગુજરાત પહોંચ્યું LPG ટેન્કર
એરપોર્ટ સુરક્ષા માટે પડકાર
અમદાવાદ એરપોર્ટ પર થયેલી આ કાર્યવાહી ફરી એકવાર દર્શાવે છે કે આંતરરાષ્ટ્રીય એર રૂટ્સ મારફતે ડ્રગ્સ સ્મગલિંગ માટે નવા નવા રસ્તાઓ અપનાવવામાં આવી રહ્યા છે.
ખાસ કરીને વેક્યુમ પેકિંગ, ફૂડ પેકેટ અથવા વ્યક્તિગત સામાનમાં છુપાવીને નશીલા પદાર્થો લાવવાના પ્રયાસોમાં વધારો જોવા મળી રહ્યો છે. જેના કારણે કસ્ટમ્સ, AIU અને સુરક્ષા એજન્સીઓ માટે પડકારો વધી રહ્યા છે.
