Ford Re-enter In India: યુએસ પ્રમુખ ડોનાલ્ડ ટ્રમ્પના "અમેરિકા ફર્સ્ટ" ના નારા છતાં, અમેરિકન કંપનીઓ વિદેશોમાં રોકાણ કરવામાં શરમાતી નથી. ટ્રમ્પ વહીવટીતંત્રની કંપનીઓને યુએસમાં ઉત્પાદન વધારવા માટે પ્રોત્સાહિત કરવાની અને અન્ય દેશો પર ઊંચા ટેરિફ લગાવવાની નીતિ છતાં, ઘણી મોટી અમેરિકન કંપનીઓ હજુ પણ ભારત જેવા બજારોમાં રોકાણ કરી રહી છે. આ ક્રમમાં, Ford Motor Companyએ ફરી એકવાર ટ્રમ્પની નીતિને બાયપાસ કરીને ભારતમાં રૂ. 3,250 કરોડ (લગભગ $370 મિલિયન) ના રોકાણની જાહેરાત કરી છે.
ફોર્ડ ફરીથી ભારત આવશે
ફોર્ડે શુક્રવારે ચેન્નાઈમાં ઉત્પાદન ફરી શરૂ કરવાની જાહેરાત કરી. કંપનીએ 2021માં ભારતીય બજારમાં કામગીરી સ્થગિત કર્યા પછી આ પગલું ભર્યું છે. ફોર્ડ હવે એક નવા ઉત્પાદન એકમ દ્વારા ભારતમાં તેની હાજરી ફરીથી સ્થાપિત કરવાની તૈયારી કરી રહી છે. ફોર્ડે તમિલનાડુ સરકાર સાથે એક સમજૂતી કરાર પર (MoU) હસ્તાક્ષર કર્યા છે. કંપનીનું કહેવું છે કે, પ્રારંભિક રોકાણથી 600થી વધુ પ્રત્યક્ષ અને પરોક્ષ નોકરીઓનું સર્જન થશે. આ પ્રોજેક્ટ પર કામ આ વર્ષના અંત સુધીમાં શરૂ થશે. એકવાર સંપૂર્ણ રીતે કાર્યરત થયા પછી, પ્લાન્ટ વાર્ષિક 2,35,000 એન્જિન ઉત્પન્ન કરવાની ક્ષમતા ધરાવશે. એવો અંદાજ છે કે, આ પ્લાન્ટ 2029 સુધીમાં સંપૂર્ણપણે કાર્યરત થઈ જશે.
ટ્રમ્પનું ટેરિફ હોવા છતાં ભારતમાં રોકાણ
ટ્રમ્પની નીતિઓ અમેરિકન કંપનીઓને યુનાઇટેડ સ્ટેટ્સ પાછા ફરવા અને ત્યાં ઉત્પાદન કરવા માટે પ્રોત્સાહિત કરી રહી છે. આમ છતાં, એપલ પછી, હવે ફોર્ડ જેવી કંપનીઓ ભારતમાં ભારે રોકાણ કરી રહી છે. આ સ્પષ્ટપણે દર્શાવે છે કે, અમેરિકન કંપનીઓ હજુ પણ ભારત જેવા ઝડપથી વિકસતા બજારને ઊંચા ખર્ચ અને કડક વેપાર નીતિઓ કરતાં વધુ સારા વિકલ્પ તરીકે માને છે.
