Advance Tax Deadline: નાણાકીય વર્ષ 2026-27 માટે એડવાન્સ ટેક્સની પ્રથમ હપ્તાની છેલ્લી તારીખ 15 જૂન 2026 છે. જે કરદાતાઓની અંદાજિત ટેક્સ જવાબદારી નિર્ધારિત મર્યાદા કરતાં વધુ છે, તેમણે આ તારીખ પહેલાં પ્રથમ હપ્તો જમા કરાવવો જરૂરી છે. ઇન્કમ ટેક્સ વિભાગની ‘Pay As You Earn’ વ્યવસ્થા હેઠળ એડવાન્સ ટેક્સ આખા વર્ષ દરમિયાન અલગ-અલગ હપ્તામાં ભરવામાં આવે છે, જેથી વર્ષના અંતે એકસાથે મોટો ટેક્સ ભરવાનો બોજ ન પડે. ઘણા લોકોમાં હજુ પણ ગેરસમજ છે કે એડવાન્સ ટેક્સ માત્ર વેપારીઓ અથવા કંપનીઓ માટે જ લાગુ પડે છે. પરંતુ હકીકતમાં પગારદાર કર્મચારીઓ, ફ્રીલાન્સર્સ, ભાડાની આવક ધરાવતા લોકો અને વ્યાજની આવક મેળવનારા વ્યક્તિઓ પણ કેટલીક પરિસ્થિતિઓમાં એડવાન્સ ટેક્સ ભરવા માટે જવાબદાર બની શકે છે.
કોને ભરવો પડે છે એડવાન્સ ટેક્સ?
જો કોઈપણ કરદાતાની નાણાકીય વર્ષ દરમિયાન અંદાજિત કુલ ટેક્સ જવાબદારી TDS અને TCS બાદ ₹10,000થી વધુ થાય છે, તો તેને એડવાન્સ ટેક્સ ભરવો ફરજિયાત બને છે. આ નિયમ વ્યક્તિગત કરદાતા, ફ્રીલાન્સર, કન્સલ્ટન્ટ, વ્યવસાયિક, કંપની તેમજ અન્ય તમામ પ્રકારના કરદાતાઓ પર લાગુ પડે છે.
આ પણ વાંચો: મોંઘવારીના સમયમાં સુરક્ષિત રોકાણ માટે પોસ્ટ ઓફિસની 5 લોકપ્રિય સ્કીમ: જાણો ક્યાં મળે છે વધુ વ્યાજ
સિનિયર સિટિઝન્સને મળે છે ખાસ છૂટ
60 વર્ષ કે તેથી વધુ ઉંમરના સિનિયર સિટિઝન્સ માટે ખાસ જોગવાઈ કરવામાં આવી છે. જો સિનિયર સિટિઝન પાસે કોઈ વ્યવસાયિક અથવા પ્રોફેશનલ આવક ન હોય, તો તેમને એડવાન્સ ટેક્સ ભરવાની જરૂર નથી. જોકે, જો તેઓ બિઝનેસ અથવા પ્રોફેશનલ ઇન્કમ મેળવે છે, તો અન્ય કરદાતાઓની જેમ તેમને પણ એડવાન્સ ટેક્સના નિયમોનું પાલન કરવું પડશે.
15 જૂન પહેલાં કોને ભરવો પડશે પ્રથમ હપ્તો?
નીચે દર્શાવેલ કરદાતાઓએ 15 જૂન સુધી પ્રથમ હપ્તો ભરવાની જરૂર પડી શકે છે:
કેપિટલ ગેઇનથી આવક મેળવનારા પગારદાર કર્મચારીઓ
ફ્રીલાન્સર્સ અને કન્સલ્ટન્ટ્સ
ભાડાની આવક મેળવનારા મકાનમાલિકો
ફિક્સ્ડ ડિપોઝિટ પરથી વ્યાજ આવક મેળવનારા લોકો
બિઝનેસ અથવા પ્રોફેશનલ આવક ધરાવતા સિનિયર સિટિઝન્સ
એડવાન્સ ટેક્સ કેવી રીતે ભરવો?
કરદાતાઓ ઇન્કમ ટેક્સ વિભાગની સત્તાવાર ઇ-ફાઇલિંગ વેબસાઇટ મારફતે ઓનલાઈન એડવાન્સ ટેક્સ ભરી શકે છે.
સૌપ્રથમ ઇ-ફાઇલિંગ પોર્ટલમાં લોગિન કરવું પડશે. ત્યારબાદ "e-File" મેનુમાં જઈ "e-Pay Tax" વિકલ્પ પસંદ કરવો. ત્યારબાદ "New Payment" પર ક્લિક કરીને Income Tax પસંદ કરવો. અહીં Advance Tax વિકલ્પ પસંદ કરીને Assessment Year 2026-27 માટે લાગુ પડતી ટેક્સ વિગતો દાખલ કરી શકાય છે. પછી પસંદગીના પેમેન્ટ મોડ દ્વારા ટેક્સ ભરવો શક્ય છે.
આ પણ વાંચો: ફિટમેન્ટ ફેક્ટર અંગે કેન્દ્ર સરકારના કર્મચારીઓ માટે ઝટકો?: 8 મા પગાર પંચને લઈ મોટો પ્લાન
પ્રિઝમ્પ્ટિવ ટેક્સેશન પસંદ કરનારાઓ માટે ખાસ નિયમ
જો કોઈ ફ્રીલાન્સર, નાના વેપારી અથવા પ્રોફેશનલ પ્રિઝમ્પ્ટિવ ટેક્સેશન સ્કીમનો લાભ લઈ રહ્યા હોય, તો તેમને સમગ્ર એડવાન્સ ટેક્સ એક જ હપ્તામાં ભરવાની છૂટ આપવામાં આવી છે. આવા કરદાતાઓ 15 માર્ચ 2027 સુધી 100 ટકા એડવાન્સ ટેક્સ ચૂકવી શકે છે. તેઓ ઈચ્છે તો 31 માર્ચ 2027 સુધીમાં પણ પોતાની ટેક્સ જવાબદારી પૂર્ણ કરી શકે છે.
સમયસર ટેક્સ નહીં ભરો તો શું થશે?
જો કરદાતા સમયસર એડવાન્સ ટેક્સ નહીં ભરે તો તેના પર વ્યાજ વસૂલ થઈ શકે છે. જો 31 માર્ચ સુધી કુલ ટેક્સ જવાબદારીના ઓછામાં ઓછા 90 ટકા ટેક્સની ચુકવણી નહીં કરવામાં આવે, તો સંબંધિત જોગવાઈઓ હેઠળ દર મહિને 1 ટકા વ્યાજ વસૂલવામાં આવી શકે છે. તે ઉપરાંત જો ત્રિમાસિક હપ્તા સમયસર નહીં ભરવામાં આવે તો પણ બાકી રહેલી રકમ પર વ્યાજ લાગુ થઈ શકે છે.
એડવાન્સ ટેક્સ ભરવાની તમામ મહત્વની તારીખો
નાણાકીય વર્ષ 2026-27 માટે એડવાન્સ ટેક્સ નીચે મુજબના હપ્તાઓમાં ભરવાનો રહેશે:
15 જૂન 2026 સુધી – કુલ ટેક્સનો 15 ટકા
15 સપ્ટેમ્બર 2026 સુધી – કુલ ટેક્સનો 45 ટકા
15 ડિસેમ્બર 2026 સુધી – કુલ ટેક્સનો 75 ટકા
15 માર્ચ 2027 સુધી – કુલ ટેક્સનો 100 ટકા
સમયસર આયોજનથી બચી શકે છે દંડ
ટેક્સ નિષ્ણાતોનું કહેવું છે કે વર્ષ દરમિયાન થનારી સંભવિત આવકનો અંદાજ પહેલેથી લગાવી લેવો જોઈએ. જો સમયસર એડવાન્સ ટેક્સ ભરવામાં આવે તો વધારાના વ્યાજ, દંડ અને ટેક્સ સંબંધિત મુશ્કેલીઓથી બચી શકાય છે. ખાસ કરીને ફ્રીલાન્સર્સ, રોકાણકારો, ભાડાની આવક ધરાવતા લોકો અને બિઝનેસ ઓનર્સ માટે સમયસર ટેક્સ આયોજન ખૂબ જ મહત્વપૂર્ણ બની જાય છે.
