પશ્ચિમ બંગાળમાં તૃણમૂલ કોંગ્રેસ (TMC)માં ચાલી રહેલા આંતરિક વિખવાદ વચ્ચે પાર્ટીના રાષ્ટ્રીય મહાસચિવ અભિષેક બેનર્જીએ બળવાખોર નેતાઓને ખુલ્લો પડકાર આપ્યો છે. તેમણે કહ્યું કે જો પાર્ટી છોડીને ગયેલા નેતાઓ ફરીથી મમતા બેનર્જીના નેતૃત્વમાં પરત ફરે તો તેઓ એક કલાકની અંદર પોતાનું પદ છોડી દેશે. અભિષેક બેનર્જીનું આ નિવેદન એવા સમયે આવ્યું છે જ્યારે TMCમાં છેલ્લા કેટલાક અઠવાડિયાથી અનેક વરિષ્ઠ નેતાઓ અને ધારાસભ્યોના પક્ષ છોડવાના બનાવો સામે આવ્યા છે. કેટલાક બળવાખોર નેતાઓએ પાર્ટીમાં નેતૃત્વની શૈલી અને આંતરિક કાર્યપદ્ધતિ અંગે જાહેરમાં અસંતોષ વ્યક્ત કર્યો છે.
મમતાએ પણ અભિષેકને જાહેર સમર્થન આપ્યું
તાજેતરમાં મમતા બેનર્જીએ પણ જાહેરમાં અભિષેક બેનર્જીનું સમર્થન કરતાં કહ્યું હતું કે તેમણે કોઈ ખોટું કર્યું નથી અને તેઓ લાંબા સમય સુધી રાજકારણમાં સક્રિય રહેશે. મમતાએ પાર્ટી છોડનારા નેતાઓ પર પણ નિશાન સાધ્યું હતું અને પાર્ટીને ફરી મજબૂત બનાવવાનો વિશ્વાસ વ્યક્ત કર્યો હતો. અભિષેક બેનર્જીના નિવેદનને પશ્ચિમ બંગાળના રાજકારણમાં મહત્વપૂર્ણ રાજકીય સંદેશ તરીકે જોવામાં આવી રહ્યું છે. રાજકીય વિશ્લેષકોનું માનવું છે કે TMCમાં ચાલી રહેલા સંગઠનાત્મક સંકટ વચ્ચે આ નિવેદન પાર્ટીની આંતરિક એકતા અને નેતૃત્વ અંગેની ચર્ચાને વધુ વેગ આપી શકે છે.
આ દરમિયાન પશ્ચિમ બંગાળમાં રાજકીય ગરમાવો વધુ તેજ બન્યો છે. દક્ષિણ 24 પરગણા જિલ્લાના આમતલા વિસ્તારમાં આવેલા તૃણમૂલ કોંગ્રેસના રાષ્ટ્રીય મહાસચિવ અને સાંસદ અભિષેક બેનર્જીના પાર્ટી કાર્યાલય પર શનિવારે જિલ્લા વહીવટીતંત્રે બુલડોઝર કાર્યવાહી શરૂ કરી હતી. વહીવટીતંત્રનો દાવો છે કે પાંચ માળનું આ મકાન મંજૂર બિલ્ડિંગ પ્લાન વિના અને નિયમોના ઉલ્લંઘન સાથે બનાવવામાં આવ્યું હતું. કાર્યવાહી દરમિયાન ભારે પોલીસ બંદોબસ્ત ગોઠવવામાં આવ્યો હતો.
આ પણ વાંચો: ઉદ્ધવ ઠાકરેને મોટો ઝટકો : શિંદેની શિવસેનામાં 6 બળવાખોર સાંસદોના વિલયને સ્પીકરની મંજૂરી
વહીવટીતંત્રના જણાવ્યા મુજબ, આ કાર્યવાહી પહેલાં સંબંધિત પક્ષને નોટિસ ફટકારવામાં આવી હતી અને સુનાવણી માટે પણ તક આપવામાં આવી હતી. જોકે સંતોષકારક જવાબ ન મળતા કાયદાકીય પ્રક્રિયા પૂર્ણ કર્યા બાદ ધ્વસ્તીકરણ હાથ ધરાયું હતું. બીજી તરફ, આ કાર્યવાહી બાદ પશ્ચિમ બંગાળમાં રાજકીય આરોપ-પ્રત્યારોપ વધુ તેજ બન્યા છે. અત્યાર સુધી અભિષેક બેનર્જી અથવા તૃણમૂલ કોંગ્રેસ તરફથી આ ધ્વસ્તીકરણ અંગે કોઈ સત્તાવાર નિવેદન જાહેર કરવામાં આવ્યું નથી.
