આસ્થા પુનિયા બની નૌકાદળની પ્રથમ મહિલા ફાઇટર પાઇલટ : ઉડાવશે ઘાતક ફાઇટર વિમાન!

Sub-Lieutenant Aastha Punia:ભારતીય નૌકાદળે પહેલીવાર એક મહિલાને ફાઇટર પાઇલટ તરીકે સામેલ કરીને એક નવો રેકોર્ડ બનાવ્યો છે. સબ-લેફ્ટનન્ટ આસ્થા પુનિયાએ આ ઐતિહાસિક સિદ્ધિ હાંસલ કરી છે અને નેવલ એવિએશનના ફાઇટર સ્ટ્રીમમાં પોતાનું સ્થાન બનાવ્યું છે. અત્યાર સુધી નૌકાદળમાં મહિલાઓ રિકોનિસન્સ એરક્રાફ્ટ અને હેલિકોપ્ટર ઉડાવતી હતી, પરંતુ હવે પહેલીવાર કોઈ મહિલા ખતરનાક ફાઇટર પ્લેન ઉડાડશે. નૌકાદળે સોશિયલ મીડિયા પર આ અંગે માહિતી પણ આપી છે.
નૌકાદળે ટ્વીટ કરી
આસ્થા પુનિયાને નૌકાદળના ફાઇટર વિમાનની ફ્રન્ટ લાઇનમાં જોડાવાનું સન્માન મળ્યું છે. ભારતીય નૌકાદળે આ સિદ્ધિ વિશેની માહિતી સોશિયલ મીડિયા પ્લેટફોર્મ 'X' દ્વારા શેર કરી છે, જેમાં આસ્થા પુનિયાને 'વિંગ્સ ઓફ ગોલ્ડ'થી સન્માનિત કરવામાં આવતી તસવીર પણ પોસ્ટ કરવામાં આવી છે.
'વિંગ્સ ઓફ ગોલ્ડ' એનાયત
ભારતીય નૌકાદળે 3 જુલાઈ 2025ના રોજ ભારતીય નૌકાદળના હવાઈ મથક ખાતે બીજા બેઝિક હોક કન્વર્ઝન કોર્સનું સમાપન કર્યું. આ પ્રસંગે સબ-લેફ્ટનન્ટ આસ્થા પુનિયા અને લેફ્ટનન્ટ અતુલ કુમાર ધુલને વિશેષ સન્માન આપવામાં આવ્યું. રીઅર એડમિરલ જનક બેવલી (ACNS-એર)એ બંને અધિકારીઓને 'વિંગ્સ ઓફ ગોલ્ડ' એનાયત કર્યા. આ સાથે આસ્થા પુનિયા નૌકાદળના ફાઇટર સ્ટ્રીમમાં જોડાનાર પ્રથમ મહિલા પાઇલટ બન્યા છે.
આસ્થા પુનિયા કયું ફાઇટર જેટ ઉડાડશે?
જોકે નૌકાદળે હજુ સુધી સ્પષ્ટતા કરી નથી કે આસ્થા કયા ફાઇટર એરક્રાફ્ટમાં તૈનાત કરવામાં આવશે, ભારતીય નૌકાદળ પાસે મિગ-29K જેવા અત્યાધુનિક ફાઇટર જેટ છે. આ વિમાનો ખાસ કરીને એરક્રાફ્ટ કેરિયર્સ INS વિક્રમાદિત્ય અને INS વિક્રાંતથી ઉડાન ભરવા માટે સક્ષમ છે. MiG-29Kની વાત કરીએ તો તેની સામાન્ય ઉડાન રેન્જ લગભગ 2346 કિલોમીટર છે, જ્યારે લડાઇ મિશનમાં તેની અસરકારક રેન્જ 722 કિલોમીટર સુધી છે. આ વિમાન એક સમયે 450 કિલોગ્રામ બોમ્બ, મિસાઇલ અને અન્ય શસ્ત્રો લઈ જવા સક્ષમ છે.