Banaskantha accident: બનાસકાંઠા જિલ્લાના અમીરગઢ તાલુકામાં આવેલા વાસડા બ્રિજ પર મોડી રાતે એક ભયાનક ત્રીપલ અકસ્માત સર્જાયો હતો. બે ટ્રેલર અને એક ટેન્કર વચ્ચે થયેલા આ ગંભીર અકસ્માતે સમગ્ર વિસ્તારમાં હડકંપ મચાવી દીધો હતો. અકસ્માત એટલો ભયંકર હતો કે વાહનો એકબીજામાં ફસાઈ ગયા હતા અને માર્ગ પર લાંબો ટ્રાફિક જામ સર્જાયો હતો.
મોડી રાતે બે ટ્રેલર અને એક ટેન્કર વચ્ચે અકસ્માત
મળતી માહિતી અનુસાર, મોડી રાત્રે એક ટ્રેલર વાસડા બ્રિજ પરથી પસાર થઈ રહ્યું હતું તે દરમિયાન સામેથી આવતું બીજું ટ્રેલર અને એક ટેન્કર સાથે અથડાયું હતું. અચાનક બનેલી આ ઘટનામાં ત્રણેય ભારે વાહનો એકબીજામાં ઘૂસી ગયા હતા. અકસ્માતના પગલે જોરદાર અવાજ સંભળાયો હતો, જેના કારણે નજીકના વિસ્તારના લોકો ઘટનાસ્થળે દોડી આવ્યા હતા.
અકસ્માતમાં એકનું મોત, બે ગંભીર ઇજાગ્રસ્ત
આ ભયાનક અકસ્માતમાં એક ટ્રેલર ચાલકનું ઘટનાસ્થળે જ કરુણ મોત નિપજ્યું હતું. જ્યારે અન્ય બે વ્યક્તિઓને ગંભીર ઈજાઓ પહોંચી હતી. ઇજાગ્રસ્તોને શરીરના વિવિધ ભાગોમાં ગંભીર ઘા લાગ્યા હોવાનું જાણવા મળ્યું છે. અકસ્માત બાદ બંને ઇજાગ્રસ્તો વાહનમાં ફસાઈ ગયા હતા, જેને બહાર કાઢવામાં ભારે મુશ્કેલી પડી હતી.
NAHI ની ટીમ દ્વારા મૃતક ડ્રાઇવરની મૃતદેહ બહાર કાઢવામાં આવ્યો
અકસ્માતની જાણ થતાં જ NAHI (નેશનલ હાઇવે ઓથોરિટી ઓફ ઇન્ડિયા) ની ટીમ તાત્કાલિક ઘટનાસ્થળે પહોંચી હતી. ટીમ દ્વારા ભારે જહેમત બાદ ડ્રાઇવરનો મૃતદેહ વાહનમાંથી બહાર કાઢવામાં આવી હતી. સાથે જ ક્રેનની મદદથી અકસ્માતગ્રસ્ત વાહનોને રસ્તા પરથી હટાવીને ટ્રાફિક વ્યવસ્થાને પુનઃસ્થાપિત કરવામાં આવી હતી.
બે ગંભીર ઇજાગ્રસ્તોને આબુરોડ હોસ્પિટલ ખસેડાયા
અકસ્માતમાં ગંભીર રીતે ઇજાગ્રસ્ત બનેલા બે વ્યક્તિઓને તાત્કાલિક સારવાર અર્થે આબુરોડની હોસ્પિટલ ખાતે ખસેડવામાં આવ્યા હતા. હાલમાં બંનેની હાલત નાજુક હોવાનું જાણવા મળ્યું છે. સ્થાનિક પોલીસ દ્વારા અકસ્માત અંગે નોંધ લઈ આગળની તપાસ શરૂ કરવામાં આવી છે. આ અકસ્માતે ફરી એકવાર હાઇવે પર ઝડપ અને બેદરકારીના જોખમોને ઉજાગર કર્યા છે.
