India's dominance in T20 : T20 વર્લ્ડ કપની દસમું એડિશન 7 ફેબ્રુઆરીથી શરૂ થવા જઈ રહી છે. ભારત અને શ્રીલંકા સંયુક્ત રીતે યજમાન છે, ત્યારે ક્રિકેટ જગતમાં ભારતની મજબૂતીની ચર્ચાઓ તેજ થઈ છે. હાલમાં પાકિસ્તાને ભારત સામે રમવાનો ઇનકાર કર્યો છે, જેની પાછળ ભલે રાજકીય કારણો હોય, પરંતુ ભારતનો દબદબો પણ એક મોટું પરિબળ છે. જાણો એવા 8 માપદંડો વિશે જેનાથી ખબર પડશે કે, ભારત અત્યારે દુનિયાની સૌથી ખતરનાક T20 ટીમ કેમ છે.
ટાઇટલની રેસમાં મોખરે
T20 વર્લ્ડ કપના ઇતિહાસમાં ભારત, ઇંગ્લેન્ડ અને વેસ્ટ ઇન્ડીઝ - આ ત્રણેય ટીમોએ 2-2 વખત ટાઇટલ જીત્યા છે. ભારત અત્યારે ડિફેન્ડિંગ ચેમ્પિયન છે. જો આ વર્ષે ભારત જીતશે, તો તે 3 ટાઇટલ જીતનારી વિશ્વની પ્રથમ ટીમ બની જશે. ખાસ વાત એ છે કે, ભારત સેમીફાઇનલ અને ફાઇનલમાં સતત સ્થાન મેળવીને પોતાની સાતત્યતા જાળવી રહ્યું છે.
જીતની ટકાવારીમાં બાદશાહ
માત્ર ટ્રોફી જ નહીં, પણ મેદાન પરના પર્ફોમન્સમાં પણ ભારતનો કોઈ તોડ નથી. T20 વર્લ્ડ કપમાં ભારતનો વિનિંગ રેશિયો 67.31% છે, જે તમામ ટીમોમાં સર્વોચ્ચ છે. ભારતે 52 માંથી 35 મેચ જીતી છે. સાઉથ આફ્રિકા અને ઓસ્ટ્રેલિયા જેવી ટીમો પણ આ બાબતે ભારતથી પાછળ છે.
ઓવરઓલ T20 ફોર્મેટમાં વર્ચસ્વ
જો આપણે તમામ T20I મેચોની વાત કરીએ, તો ભારત એકમાત્ર એવી ટીમ છે જેને 60% થી વધુનો વિનિંગ રેટ જાળવી રાખ્યો છે. ભારતે 268 મેચોમાંથી 179 માં જીત મેળવી છે. પાકિસ્તાન (57.88%) અને ઓસ્ટ્રેલિયા (54.96%) ભારતની આસપાસ પણ નથી.
વિદેશી ધરતી પર શાનદાર દેખાવ
સામાન્ય રીતે ટીમો ઘરઆંગણે મજબૂત હોય છે, પરંતુ ભારતે વિદેશની ધરતી પર પણ મજબૂત પર્ફોમન્સ કર્યું છે. ભારતે વિદેશી મેદાનો પર 165 માંથી 109 મેચ જીતી છે જેમા ટીમ ઈન્ડિયાનો વિનિંગ રેશિયો (66.06%) છે. આ આંકડા દર્શાવે છે કે, પરિસ્થિતિ ગમે તે હોય, મેન ઇન બ્લુ આર્મી ગમે ત્યાં જીતવાની ક્ષમતા ધરાવે છે.
ઘરઆંગણે અજેય
આ વખતનો વર્લ્ડ કપ ભારતમાં રમાવાનો છે અને હોમગ્રાઉન્ડ પર ભારતનો રેકોર્ડ શાનદાર છે. ભારતે ઘરેલું મેદાન પર 67.96% મેચ જીતી છે. પાકિસ્તાન આ મામલે ખૂબ નજીક છે, પરંતુ ભારત હજુ પણ પોઈન્ટ્સમાં આગળ છે. ઘરની પ્રેક્ષકોની ભીડ ભારત માટે 12 મા ખેલાડીની ભૂમિકા ભજવશે.
રનનો પહાડ બનાવવાની ક્ષમતા
મોર્ડન ડે T20 ક્રિકેટમાં 200+ રન બનાવવા એ પાવરફુલ બેટિંગની નિશાની છે. ભારત અત્યાર સુધીમાં સૌથી વધુ 200+ રન 46 વખત બનાવી ચૂકી છે. રસપ્રદ વાત એ છે કે, દુનિયાની અન્ય કોઈ પણ ટીમ 30 વખત પણ આ આંકડો વટાવી શકી નથી. આ ભારતની 'પાવર હિટિંગ' દર્શાવે છે. અને માત્ર 200+ રન જ નહીં પણ 250+ રનમાં પણ ભારત સૌથી ઉપર આવે છે. ભારતે અત્યાર સુધી 4 વખત 250+ રન ફટકાર્યા છે.
મુશ્કેલ ટાર્ગેટને ચેઝ કરવો
મોટો સ્કોર બનાવવો સહેલો છે, પણ તેને ચેઝ કરવો મુશ્કેલ હોય છે. ભારત 200+ ના ટાર્ગેટને 8 વખત સફળતાપૂર્વક ચેઝ કરી ચૂક્યું છે. સ્કોરબોર્ડનું પ્રેશર હોવા છતાં ભારતની બેટિંગ લાઇન-અપ શાંત રહીને જીત અપાવવામાં એક્સપર્ટ છે.
સેન્ચુરીઓનો રેકોર્ડ
વ્યક્તિગત પર્ફોમન્સની વાત કરીએ તો ભારતીય બેટ્સમેનોએ T20I માં કુલ 46 સેન્ચુરી ફટકારી છે. ઓસ્ટ્રેલિયા અને ન્યુઝીલેન્ડના ખેલાડીઓ માત્ર 13-13 સેન્ચુરીઓ જ બનાવી શક્યા છે. ભલે વર્લ્ડ કપમાં સેન્ચુરીઓની સંખ્યા ઓછી હોય, પણ એકંદરે ભારતીય ખેલાડીઓ મેચ વિનિંગ ઇનિંગ્સ રમવામાં અવ્વલ છે. વર્લ્ડ કપમાં સૌથી વધુ સેન્ચુરી ન્યુઝીલેન્ડ અને ઈંગ્લેન્ડે 2-2 સેન્ચુરી ફટકારી છે.
શું ભારત ઇતિહાસ રચશે?
તમામ 8 પેરામીટર્સનું વિશ્લેષણ કરતા સ્પષ્ટ થાય છે કે, 7 માપદંડોમાં ભારત દુનિયામાં નંબર-1 છે. જો ભારત આ આગામી વર્લ્ડ કપ જીતી લેશે, તો તે ઓફિશિયલ રીતે ક્રિકેટના આ ટૂંકા ફોર્મેટમાં વિશ્વની 'સૌથી મજબૂત ટીમ' તરીકે સ્થાપિત થઈ જશે.
