રવિવારે કેનેડાના ગ્રેટર ટોરોન્ટો એરિયા (GTA)માં આવેલા હિન્દુ હેરિટેજ સેન્ટરમાં ભગવાન શ્રી રામની ઉત્તર અમેરિકાની સૌથી ઊંચી – 51 ફૂટ – પ્રતિમાનું ભવ્ય અનાવરણ કરવામાં આવ્યું. આ અવસરે હજારો ભક્તો ઉપસ્થિત રહ્યા હતા, તેમજ કેનેડાની રાજકીય જગતની અગ્રગણ્ય હસ્તીઓ પણ આ પવિત્ર પ્રસંગે સામેલ થઈ હતી.
ફેડરલ મંત્રીઓ અને વિપક્ષી નેતાઓની ઉપસ્થિતિ
આ સમારોહમાં કેનેડાની મહિલા અને જાતિ સમાનતા મંત્રી રેચી વાલ્ડેઝ, ટ્રેઝરી બોર્ડના પ્રમુખ શફકત અલી, અને આંતરરાષ્ટ્રીય વેપાર મંત્રી મનિન્દર સિદ્ધુ ઉપસ્થિત રહ્યા. ઉપરાંત, કન્ઝર્વેટિવ પાર્ટીના વચગાળાના નેતા એન્ડ્રુ શિયર સહિત કેનેડાના અનેક સાંસદો, પ્રાંતીય મંત્રીઓ અને સ્થાનિક રાજકારણીઓએ પણ હાજરી આપી.
જય શ્રી રામના નારા સાથે અનાવરણ
આંતરરાષ્ટ્રીય વેપાર મંત્રી મનિન્દર સિદ્ધુએ સમારંભ દરમિયાન “જય શ્રી રામ”ના નારા લગાવીને સંબોધન કર્યું અને કહ્યું કે,
“ઉત્તર અમેરિકા માટે આ મહત્વપૂર્ણ ક્ષણ છે. ભગવાન રામની સૌથી ઊંચી પ્રતિમાની સ્થાપના અમારા માટે ગર્વની વાત છે.”
ભારતીય પ્રતિનિધિત્વ અને સમારંભની વિશેષતાઓ
ભારત સરકાર તરફથી ટોરોન્ટોના કાર્યકારી કોન્સ્યુલ જનરલ કપિધ્વજ પ્રતાપ સિંહે સમારંભમાં ભાગ લીધો. ભગવાન રામની પ્રતિમાને અનાવૃત કરતી વખતે ફૂલોનો વરસાદ કરવામાં આવ્યો અને સમારંભ હર્ષોલ્લાસભેર ઉજવાયો.
પ્રતિમાની વિશિષ્ટતા અને નિર્માણ વિગતો
હિન્દુ હેરિટેજ સેન્ટરના સ્થાપક અને મુખ્ય પૂજારી આચાર્ય સુરિન્દર શર્મા શાસ્ત્રીે જણાવ્યું કે,
ભગવાન રામની પ્રતિમા ફાઇબરગ્લાસ અને સ્ટીલ સુપરસ્ટ્રક્ચરથી બનેલી છે
ઊંચાઈ: પ્રતિમા 51 ફૂટ અને પેડેસ્ટલ 7 ફૂટ, કુલ 58 ફૂટ
સહનશક્તિ: પ્રતિમા 200 કિમી/કલાક પવનના वेગને સહન કરી શકે છે
આયુષ્ય: આશરે 100 વર્ષ
તેમણે ઉમેર્યું કે ભવિષ્યમાં પ્રતિમાના ઉપર છત્રી ઉમેરવામાં આવશે, જેના માટે મંજૂરીની પ્રક્રિયા ચાલુ છે.
અયોધ્યાથી મળેલી પ્રેરણા
આ પ્રતિમાના નિર્માણની પ્રેરણા 2024માં થયેલા અયોધ્યા રામ મંદિરના ઉદ્ઘાટનમાંથી મળી હતી. આ પ્રસંગે શાસ્ત્રીજી એ જણાવ્યું કે,
“આ પ્રોજેક્ટ માત્ર ધાર્મિક શ્રદ્ધાનું પ્રતિક નથી, પણ સમગ્ર સમુદાય માટે આધ્યાત્મિક ભેટ છે.”
દાતાનો વિશેષ યોગદાન
આ પ્રોજેક્ટને સફળ બનાવવામાં ઇન્ડો-કેનેડિયન ઉદ્યોગપતિ લાજ પ્રાશેરનું મહત્વપૂર્ણ યોગદાન રહ્યું છે, જેમના દાનથી આ પ્રતિમાની રચના અને સ્થાપના શક્ય બની.
