યોગા જીવન આપે છે પરંતુ જોખમી જગ્યાે યોગા કરવાના ચક્કરમાં અનેક વખત લોકોને પોતાનો જીવ ખોવાનો વારો આવે છે. આવી જ ઘટના થાઇલેન્ડમાં બની. જ્યાં દરિયા પાસે ભેખડ પર યોગા કરવાના ચક્કરમાં યુવતીએ જીવ ગુમાવ્યો. રશિયાના નોવોસિબિર્સ્કની 24 વર્ષીય અભિનેત્રી કામિલા બેલ્યાત્સ્કાયા થાઈલેન્ડના કોહ સમુઈમાં એક ખડક પર યોગ કરી રહી હતી. જે દરમિયાન પ્રચંડ મોજામાં તણાઇ જતાં મહત્વાકાંક્ષી અભિનેત્રીએ જીવ ખોવાનો વારો આવ્યો છે.
થાઇલેન્ડના સ્થાનિક સમાચાર માધ્યમો અનુસાર અભિનેત્રી કારમાં બેસીને કોહ સમુઈના દરિયા કિનારે પહોંચી હતી. જયાં ભેખડ પર યોગા મેટ સાથે વ્યુ પોઇન્ટની નીચે એક ખડકાળ વિસ્તારમાં ઉતરી હતી. આ એ વિસ્તાર હતો જ્યાં લોકોને જવાની મનાઇ હતી. છતાં અભિનેત્રીએ ત્યાં ઉતરી યોગાસન કર્યા હતા. જોકે અચાનક એક શક્તિશાળી મોજુ અભિનેત્રીને તાણી ગયું. સમગ્ર ઘટના વ્યુ પોઇન્ટ પર સ્થિત લોકોએ કેમેરામાં કેદ કરી હતી. પ્રચંડ મોજામાં ખેંચાયેલી અભિનેત્રીએ બચવાની કોશીશ કરી હતી. જો કે દરિયામાં ભારે કરંટના કારણે કામિલાનો જીવ બચી શક્યો ન હતો. ઘટનાના લગભગ 15 મિનિટ બાદ રેસ્ક્યૂ ટીમ આવી પહોંચી હતી. જે બાદ અભિનેત્રીના મૃતદેહની શોધખોળ કરી કબજો લેવામાં આવ્યો હતો. થાઇલેન્ડમાં અભિનેત્રીના આઘાતજનક મોત બાદ રશિયામાં અભિનેત્રી કામિલા બેલ્યાત્સ્કાયાના ફેન્સ ઘેરા આઘાતમાં છે.
