ઐતિહાસિક ક્ષણ: નેધરલેન્ડથી હજાર વર્ષ જૂના તમિલ દસ્તાવેજો ભારત લાવવામાં આવશે
પીએમ મોદીની હાજરીમાં થયા મહત્વના કરાર: ટાટા ઇલેક્ટ્રોનિક્સ અને ડચ કંપની ASML વચ્ચે પણ મોટી ચિપ ડીલ. વડાપ્રધાન નરેન્દ્ર મોદીની નેધરલેન્ડ યાત્રા દરમિયાન ભારત માટે એક મોટી ઐતિહાસિક સફળતા મળી છે. 11th સદીની અત્યંત મૂલ્યવાન અને ઐતિહાસિક ચોલ તામ્ર પટ્ટીકાઓ (Copper Plates) ને ભારત પરત લાવવા માટે બંને દેશો વચ્ચે સત્તાવાર સમજૂતી થઈ છે. આશરે 1000 વર્ષ જૂના આ તમિલ દસ્તાવેજોમાં ચોલ સામ્રાજ્યના સુવર્ણ ઇતિહાસની મહત્વની વિગતો નોંધાયેલી છે.
શું છે આ ચોલ તામ્ર પટ્ટીકાઓનું મહત્વ?
આ ઐતિહાસિક દસ્તાવેજો 21 મોટી અને 3 નાની તાંબાની પ્લેટોનો એક દુર્લભ સંગ્રહ છે, જેના પર મોટાભાગના લેખો તમિલ ભાષામાં કોતરેલા છે. પીએમ મોદીએ જણાવ્યું કે આ પટ્ટીકાઓમાં મહાન રાજા રાજેન્દ્ર ચોલ પ્રથમ અને તેમના પિતા રાજા રાજરાજા ચોલ પ્રથમના સમયની મહત્વપૂર્ણ ઐતિહાસિક માહિતી ઉપલબ્ધ છે. જૂના જમાનામાં સરકારી આદેશો અને મહત્વની વિગતો સાચવવા તાંબાની પ્લેટોનો ઉપયોગ થતો હતો. નિષ્ણાતોના મતે, 19th સદીમાં જ્યારે યુરોપિયન દેશો ભારતમાં વેપાર અને સંશોધન કરી રહ્યા હતા, ત્યારે આ અમૂલ્ય દસ્તાવેજો વિદેશ લઈ જવામાં આવ્યા હતા, જે હવે સદીઓ પછી ભારત પરત આવશે.
ટાટા અને ડચ કંપની ASML વચ્ચે સેમિકન્ડક્ટર કરાર
ઐતિહાસિક વારસાની સાથે-સાથે આ પ્રવાસમાં ભારતના ડિજિટલ ભવિષ્ય માટે પણ એક મોટો કરાર થયો છે. ધ હેગ શહેરમાં ટાટા દ્વારા આયોજિત એક કાર્યક્રમમાં ટાટા ઇલેક્ટ્રોનિક્સ અને ચિપ બનાવતી વિશ્વની અગ્રણી ડચ કંપની ASML વચ્ચે ડીલ સાઇન થઈ છે. આ કરાર ભારતમાં સેમિકન્ડક્ટર અને ચિપ ટેકનોલોજીના ક્ષેત્રમાં સહયોગ વધારવા માટે કરવામાં આવ્યો છે. પીએમ નરેન્દ્ર મોદી અને નેધરલેન્ડના પીએમ ડિક શૂફ (Dick Schoof) ની હાજરીમાં બંને કંપનીઓના પ્રતિનિધિઓએ આ મહત્વના દસ્તાવેજો પર હસ્તાક્ષર કર્યા હતા.
પીએમ મોદીએ નેધરલેન્ડના રાજા-રાણી સાથે કરી મુલાકાત
પોતાના પ્રવાસ દરમિયાન પીએમ મોદીએ નેધરલેન્ડના શાહી મહેલ ‘પેલેસ હાઉસ ટેન બોશ’ ખાતે રાજા વિલેમ-એલેક્ઝાન્ડર અને રાણી મેક્સિમા સાથે ખાસ બેઠક કરી હતી. આ બેઠકમાં બંને દેશો વચ્ચે શિક્ષણ, ટેકનોલોજી, વોટર મેનેજમેન્ટ અને ગ્રીન એનર્જી જેવા ક્ષેત્રોમાં ભાગીદારી મજબૂત કરવા પર ચર્ચા થઈ હતી. રાજા અને રાણીએ પીએમ મોદીના સન્માનમાં ખાસ ડિનરનું પણ આયોજન કર્યું હતું.
"ભારતમાં રોકાણ કરવાનો આ સૌથી શ્રેષ્ઠ સમય"
હેગ શહેરમાં આયોજિત CEO રાઉન્ડ ટેબલ બેઠકમાં પીએમ મોદીએ વૈશ્વિક કંપનીઓને ભારતમાં રોકાણ કરવા માટે આહ્વાન કર્યું હતું. તેમણે કહ્યું કે ટેક્સ અને લેબર કાયદાઓમાં કરાયેલા સુધારાને કારણે ભારતમાં મેન્યુફેક્ચરિંગ હવે ખૂબ જ સરળ અને સસ્તું બન્યું છે.
હાલમાં 300 થી વધુ ડચ કંપનીઓ ભારતમાં સફળતાપૂર્વક કામ કરી રહી છે. પીએમ મોદીએ ઉમેર્યું કે ભારત અને યુરોપિયન યુનિયન વચ્ચે ટૂંક સમયમાં થનારા FTA (ફ્રી ટ્રેડ એગ્રીમેન્ટ) થી વેપારના નવા દ્વાર ખુલશે, ખાસ કરીને ગ્રીન હાઇડ્રોજન અને ઇનોવેશનના ક્ષેત્રમાં બંને દેશો સાથે મળીને મોટી પ્રગતિ કરશે.
