વડોદરાવાસીઓ માટે ખુશીના સમાચાર : વડોદરા મહાનગરપાલિકા બજેટ રજૂ કરાયું, સ્થાયી સમિતિ દ્વારા જનહિત માટે મહત્વના સુધારા અને નિર્ણયો લેવાયા

Vadodara Municipal Corporation Budget 2026-27: વડોદરા મહાનગરપાલિકાના વર્ષ 2026-27 માટેના ડ્રાફ્ટ બજેટને સ્થાયી સમિતિએ મંજૂરી આપી દીધી છે. કુલ 7,672.21 કરોડ રૂપિયાના આ બજેટમાં શહેરના વિકાસ, આવક વધારા અને નાગરિક સુવિધાઓને પ્રાથમિકતા આપવામાં આવી છે. સ્થાયી સમિતિના ચેરમેન ડો. શીતલ મિસ્ત્રીએ જણાવ્યું હતું કે બેઠક દરમિયાન વિસ્તૃત ચર્ચા બાદ 6 ઠરાવો અને 18 મહત્વના સૂચનો સ્વીકારવામાં આવ્યા છે. આ બજેટ શહેરના સર્વાંગી વિકાસ માટે મહત્વપૂર્ણ પગલું સાબિત થશે.

કરવેરા વસુલાતમાં પારદર્શિતા અને ડિજિટલ સુવિધા

બજેટમાં કરવેરા વસુલાતને વધુ અસરકારક બનાવવા અનેક પગલાં નક્કી કરાયા છે. હવે કમ્પ્લીશન સર્ટિફિકેટ જારી કરતા પહેલા મિલકતની આકારણી કરવામાં આવશે અને ત્યારબાદ જ વેરા વસૂલાશે. આ ઉપરાંત વેરા બિલમાં QR કોડની સુવિધા ઉમેરાશે, જેથી નાગરિકો ડિજિટલ રીતે સરળતાથી ચુકવણી કરી શકે. આ નિર્ણયોથી પારદર્શિતા વધશે અને આવકમાં વધારો થશે.

આવક વધારવાના નવા પગલાં

સાંસ્કૃતિક કાર્યક્રમોમાં પણ ફેરફાર કરાયો છે. ટાઉનહોલમાં યોજાતા કાર્યક્રમો માટે પાલિકા હવે 12 ની જગ્યાએ 20 ટિકિટો લેશે, જેથી આવકમાં વધારો થશે. આ ઉપરાંત ખાનગી ક્ષેત્રની ભાગીદારી વધારવા CSR સેલની રચના કરવાની ભલામણ પણ સ્વીકારાઈ છે.

ઇન્ફ્રાસ્ટ્રક્ચર અને ટ્રાફિક સુધારા

શહેરના ટ્રાફિકને રાહત આપવા માટે 30 મીટર પહોળા ઇનર રિંગ રોડ (સમા-સાવલી-છાણી-ઊંડેરા-ROB-કરોડિયા-પંચવટી-સેવાસી) પરના બ્લોકેજ દૂર કરી રોડને શરૂ કરવાની કાર્યવાહી હાથ ધરાશે. આ પગલાથી ટ્રાફિક જામમાં ઘટાડો થશે અને શહેરની કનેક્ટિવિટી સુધરશે.

મહિલા અને માતાઓ માટે વિશેષ સુવિધા

મહિલાઓ અને નાના બાળકોની સુવિધા માટે શહેરના વિવિધ વિસ્તારોમાં પિન્ક ટોયલેટ અને પિન્ક ફીડિંગ રૂમ બનાવવાનો નિર્ણય લેવામાં આવ્યો છે. આ સુવિધાઓથી મહિલાઓને સુરક્ષિત અને સરળ અનુભવ થશે.

આરોગ્ય સેવાઓમાં રાહત

આરોગ્ય વિભાગમાં યલો ફીવર વેક્સિનનો ભાવ 500 રૂપિયાથી ઘટાડીને 300 રૂપિયા કરવામાં આવ્યો છે, જેથી નાગરિકોને આર્થિક રાહત મળશે.આ બજેટ ચૂંટણી પૂર્વેનો હોવા છતાં કર દરમાં વધારો ન કરીને નાગરિક-કેન્દ્રિત અભિગમ અપનાવ્યો છે. સ્થાયી સમિતિના આ નિર્ણયો શહેરના વિકાસને નવી ગતિ આપશે