સુરતના રસ્તાઓ પર હવે હોલીવુડની સાયન્સ ફિક્શન ફિલ્મો જેવું દૃશ્ય હકીકતમાં જોવા મળી રહ્યું છે. એક સામાન્ય દેખાતું મોપેડ હવે માણસની જેમ વાતો કરે છે અને તમારા વોઈસ કમાન્ડ પર દોડે છે. સુરતના એક વકીલે પોતાની સમજદારી અને આર્ટિફિશિયલ ઇન્ટેલિજન્સ (AI) ના ઉપયોગથી એક એવું 'સ્માર્ટ મોપેડ' તૈયાર કર્યું છે, જે ટેક્નોલોજીની દુનિયામાં ચર્ચાનું કેન્દ્ર બન્યું છે.
વોઈસ કંટ્રોલ સિસ્ટમ
આ સ્માર્ટ મોપેડની સૌથી મોટી વિશેષતા તેની નિયંત્રણ શક્તિ છે. રાઈડર જ્યારે 'એન્જિન સ્ટાર્ટ' બોલે છે, ત્યારે વાહન આપમેળે ચાલુ થઈ જાય છે. એટલું જ નહીં, હોર્નથી લઈને હેડલાઈટ સુધીની તમામ વસ્તુઓ અવાજ દ્વારા કંટ્રોલ કરી શકાય છે. જો તમે હેલ્મેટ પહેર્યા વગર ગાડી ચલાવશો, તો આ સ્કૂટર તમને કાયદાની કલમો ટાંકીને ઠપકો પણ આપશે.
અદભૂત યાદશક્તિ
આ ટુ-વ્હીલરમાં હાઈ-કેપેસિટી મેમરી કાર્ડ અને ખાસ સેન્સર લગાવવામાં આવ્યા છે. તેની યાદશક્તિ એટલી શાર્પ છે કે, તે 5 વર્ષ જૂના અકસ્માતની વિગતો પણ સાચવી શકે છે. જો તમે તેને પૂછો, તો તે કયા સમયે અને કયા સંજોગોમાં અકસ્માત થયો હતો તેની પૂરી વિગત જણાવશે. તે રાઈડરની જૂની યાદોનો સંગ્રહ કરીને એક મિત્રની જેમ મનોરંજન પણ પૂરું પાડે છે.
કાયદાનું જ્ઞાન અને મનોરંજન
આ મોપેડ તૈયાર કરનાર મુકેશ ભાવસાર વ્યવસાયે વકીલ છે, તેથી તેમણે આ વાહનને કાયદાનું જ્ઞાન પણ આપ્યું છે. ડ્રાઈવિંગ દરમિયાન જો તમને કોઈ કાયદાકીય મૂંઝવણ થાય, તો આ મોપેડ તેના જવાબો આપી શકે છે. સાથે જ, તે તમારી પસંદગીના ગીતો પ્લે કરે છે અને 'કેમ છે?' જેવા સામાન્ય પ્રશ્નોના રમૂજી જવાબો પણ આપે છે.
ટેકનિકલ બનાવટ
આ 'રોબોટિક વ્હીકલ' બનાવવા માટે મુકેશભાઈએ જાતે કોડિંગ શીખીને તેમાં માઈક્રો-પ્રોસેસર, બ્લૂટૂથ મોડ્યુલ અને પાવરફુલ સ્પીકર્સ ફિટ કર્યા છે. આ સિસ્ટમ ઇન્ટરનેટ સાથે કનેક્ટ થઈને ગૂગલ સર્ચ દ્વારા પણ માહિતી આપી શકે છે. ગાડીમાં ઓઈલ ઓછું હોય કે એન્જિનમાં ખામી હોય, આ સ્માર્ટ સિસ્ટમ તરત જ બોલીને એલર્ટ આપે છે.
