Stock Market Closing Bell: વૈશ્વિક બજારમાં જોવા મળી રહેલી હલચલ અને ખાસ કરીને અમેરિકાના રાષ્ટ્રપતિ ડોનાલ્ડ ટ્રમ્પના નિવેદન બાદ ભારતીય શેરબજારમાં આજે તેજીનો સંચાર થયો છે. છેલ્લા બે દિવસથી સતત જોવા મળી રહેલા ઘટાડા પર બ્રેક લાગી છે અને રોકાણકારોના સેન્ટિમેન્ટમાં સુધારો જોવા મળ્યો છે. ટ્રમ્પે ઈરાન સાથેના યુદ્ધનો ટૂંક સમયમાં અંત આવવાના સંકેત આપતા જ વૈશ્વિક એનર્જી માર્કેટમાં સ્થિરતાની આશા જાગી છે, જેની સીધી હકારાત્મક અસર દલાલ સ્ટ્રીટ પર જોવા મળી હતી. સેન્સેક્સ અને નિફ્ટી બંને ઇન્ડેક્સ આજે મજબૂત ઉછાળા સાથે બંધ રહ્યા છે.
આજના ટ્રેડિંગ સેશનના અંતે નિફ્ટી 50 ઇન્ડેક્સ 0.97 ટકા અથવા 233.5 પોઈન્ટના વધારા સાથે 24,261.6 ની સપાટીએ સ્થિર થયો હતો. બીજી તરફ, સેન્સેક્સ પણ 0.82 ટકા અથવા 639.82 પોઈન્ટ ઉછળીને 78,205.98 ના સ્તરે બંધ રહ્યો હતો. બજારના નિષ્ણાતો માની રહ્યા છે કે ડોમેસ્ટિક ઇન્સ્ટિટ્યૂશનલ ઇન્વેસ્ટર્સ (DII) નો વધતો જતો ફાળો ભારતીય બજાર માટે એક સુરક્ષા કવચ સમાન સાબિત થઈ રહ્યો છે, જે વૈશ્વિક અનિશ્ચિતતાના સમયમાં પણ બજારને પકડી રાખવામાં મદદરૂપ થાય છે. ચાલો જાણીએ આજના બજારના મુખ્ય આકર્ષણો અને સેક્ટર વાઈઝ પ્રદર્શન વિશે.
ટ્રમ્પના નિવેદનથી બજારમાં 'બુલ રન': ઈરાન યુદ્ધ સમાપ્ત થવાના સંકેત
બ્લૂમબર્ગના અહેવાલ મુજબ, અમેરિકી રાષ્ટ્રપતિ ડોનાલ્ડ ટ્રમ્પે જણાવ્યું છે કે ઈરાન સાથેનો સંઘર્ષ 'ખૂબ જ જલ્દી' ઉકેલાઈ શકે છે. ઉર્જા બજારમાં જોવા મળતા ભારે ઉતાર-ચઢાવ અને આર્થિક દબાણને કારણે આ નિવેદન અત્યંત મહત્વનું મનાય છે. આ સમાચાર આવતા જ ક્રૂડ ઓઈલના ભાવમાં નરમાશ જોવા મળી હતી અને બેન્કિંગ સેક્ટરમાં ફરી તેજી પાછી ફરી હતી. રોકાણકારો હવે ભૂ-રાજકીય ઘટનાક્રમ અને આંતરરાષ્ટ્રીય સંકેતો પર નજીકથી નજર રાખી રહ્યા છે.
બ્રોડર માર્કેટમાં જોરદાર ઉછાળો: મિડકેપ અને સ્મોલકેપ ઇન્ડેક્સ ચમક્યા
મુખ્ય ઇન્ડેક્સ કરતા પણ આજે બ્રોડર માર્કેટનું પ્રદર્શન શાનદાર રહ્યું હતું. નિફ્ટી મિડકેપ ઇન્ડેક્સ 1.62 ટકા અને નિફ્ટી સ્મોલકેપ ઇન્ડેક્સ 2.12 ટકાના ઉછાળા સાથે ટ્રેડ થઈ રહ્યા હતા. નાની અને મધ્યમ કંપનીઓના શેરોમાં આવેલી આ તેજી દર્શાવે છે કે રોકાણકારો ફરીથી જોખમ લેવા તૈયાર થયા છે. ખાસ કરીને ઓટો અને કન્ઝ્યુમર ડ્યુરેબલ્સ સેક્ટરમાં ખરીદીનું જોર વધુ જોવા મળ્યું હતું.
સેક્ટર અપડેટ: ઓટો સેક્ટર ટોપ ગેઈનર, IT સેક્ટરમાં ધોવાણ
સેક્ટર વાઈઝ વાત કરીએ તો, નિફ્ટી ઓટો ઇન્ડેક્સ 3 ટકાથી વધુના વધારા સાથે ટોચ પર રહ્યો હતો. આ ઉપરાંત કન્ઝ્યુમર ડ્યુરેબલ્સ અને પીએસયુ બેંક ઇન્ડેક્સમાં પણ સારી તેજી જોવા મળી હતી. જોકે, બીજી તરફ આઈટી (IT) સેક્ટરમાં વેચવાલીનું દબાણ જોવા મળ્યું હતું અને તે સૌથી વધુ ઘટનાર સેક્ટર સાબિત થયો હતો. ઓઈલ અને ગેસ ક્ષેત્રના શેરોમાં પણ આજે નબળાઈ જોવા મળી હતી.
શેર બજારના ટોપ ગેઈનર્સ અને લૂઝર્સ
આજના સત્રમાં સેન્સેક્સની બ્લુ-ચિપ કંપનીઓમાં M&M, IndiGo, Asian Paints, Maruti Suzuki અને ICICI Bank ટોચના નફો કરનાર શેરોમાં સામેલ હતા. આનાથી વિપરીત, Infosys, Eternal, Reliance Industries (RIL), Bharti Airtel અને TCS જેવા દિગ્ગજ શેરોમાં ઘટાડો નોંધાયો હતો. નિફ્ટી 50 ઇન્ડેક્સ દિવસના નીચલા સ્તરેથી રિકવર થઈને 24,300 ની નજીક પહોંચ્યો હતો, જે ટેકનિકલ રીતે મજબૂત સાઈન ગણાય છે.
