યુક્રેનના રાષ્ટ્રપતિ વોલોડીમીર ઝેલેન્સ્કીએ ફરી એકવાર અમેરિકાના રાષ્ટ્રપતિ ડોનાલ્ડ ટ્રમ્પ સાથે વ્હાઇટ હાઉસમાં મુલાકાત કરી. આ બેઠક ટ્રમ્પે અલાસ્કામાં રશિયન રાષ્ટ્રપતિ વ્લાદિમીર પુતિન સાથે યોજાયેલી મહત્વપૂર્ણ ચર્ચા બાદ યોજાઈ. બેઠક દરમિયાન ઝેલેન્સ્કીએ પુતિન સાથે સીધી વાતચીત કરવા સંમતિ દર્શાવી.
ટ્રમ્પનું નિવેદન
ટ્રમ્પે જણાવ્યું કે પુતિન તેમની સાથે વાત કરવા આતુર છે અને વ્હાઇટ હાઉસની બેઠક પૂરી થયા બાદ તેઓ તેમને ફોન કરશે. તેમણે કહ્યું કે યુદ્ધ સમાપ્ત કરવા માટે તેઓ સતત પ્રયાસ કરી રહ્યા છે.
યુદ્ધ દરમિયાન ચૂંટણી પર ચર્ચા
યુક્રેનમાં યુદ્ધ દરમિયાન ચૂંટણી યોજવા અંગે પૂછાયેલા સવાલના જવાબમાં ટ્રમ્પે મજાકીય અંદાજમાં કહ્યું – "જો અમેરિકા યુદ્ધમાં હોય, તો કદાચ હું સત્તામાં જ રહી શકું." ઝેલેન્સ્કીએ સ્પષ્ટ કર્યું કે સલામત અને લોકશાહી ચૂંટણી યોજવા માટે પહેલેથી યુદ્ધવિરામ જરૂરી છે.
અમેરિકાની સુરક્ષા ગેરંટી
ટ્રમ્પે જાહેર કર્યું કે રશિયા-યુક્રેન યુદ્ધનો અંત લાવવા માટેના શાંતિ કરારમાં અમેરિકા ભવિષ્યમાં યુક્રેનની સુરક્ષામાં સામેલ થશે. તેમણે જણાવ્યું કે યુરોપ સંરક્ષણની પ્રથમ હરોળમાં રહેશે, પરંતુ અમેરિકા પણ સુરક્ષા ગેરંટીનો ભાગ બનશે અને યુક્રેનને મદદ કરશે.
