આજના સમયમાં લાંબા નખ રાખવા અને તેને અલગ-અલગ આર્ટથી સજાવવા એ એક મોટો ફેશન ટ્રેન્ડ બની ગયો છે. ખાસ કરીને યુવતીઓમાં આ ક્રેઝ વધુ જોવા મળે છે. પરંતુ, શું તમે જાણો છો કે તમારી આ સુંદરતા તમારા સ્વાસ્થ્ય માટે કેટલી જોખમી સાબિત થઈ શકે છે? લાંબા નખ ગંભીર બીમારીઓનું ઘર બની શકે છે.
લાંબા નખથી થતી મુખ્ય સમસ્યાઓ:
બેક્ટેરિયા અને ગંદકીનો જમાવડો: લાંબા નખની અંદરની જગ્યા બેક્ટેરિયા અને જંતુઓ માટે સૌથી સુરક્ષિત સ્થાન છે. લાંબા નખમાં 32 થી વધુ પ્રકારના બેક્ટેરિયા અને 28 થી વધુ પ્રકારની ફૂગ હોઈ શકે છે. આમાં E. coli જેવા જોખમી બેક્ટેરિયા પણ જોવા મળે છે.
પેટની બીમારીઓનું જોખમ: જ્યારે આપણે હાથથી ખોરાક લઈએ છીએ, ત્યારે નખમાં છુપાયેલી ગંદકી અને સૂક્ષ્મ જીવો ખોરાક સાથે સીધા આપણા શરીરમાં પ્રવેશે છે. આના કારણે Diarrhea, Vomiting, Food Poisoning અને Stomach Infection જેવી સમસ્યાઓ થાય છે.
ફંગલ ઈન્ફેક્શન: નખની નીચે ભેજ રહેવાને કારણે ફંગલ ઈન્ફેક્શન થવાની શક્યતા વધી જાય છે. તેને કારણે નખનો રંગ બદલાઈ શકે છે, નખ નબળા પડી શકે છે અથવા નખની આસપાસની ત્વચામાં સોજો આવી શકે છે.
ઈજા થવાનું જોખમ: લાંબા નખ કામ કરતી વખતે વારંવાર ક્યાંક ભરાઈ જવાથી તૂટી જાય છે, જે ખૂબ જ પીડાદાયક હોય છે. આ ઉપરાંત, અજાણતામાં ચહેરા પર કે શરીરના અન્ય ભાગ પર નખ વાગવાથી ઊંડા ઘા પણ પડી શકે છે.
નખની આસપાસનો ચેપ (Paronychia): નખ લાંબા હોવાને કારણે તેની આસપાસની ત્વચા ખેંચાય છે અથવા તેમાં ચીરા પડે છે. ગંદા નખના કારણે આ ભાગમાં બેક્ટેરિયા પ્રવેશી જાય છે, જેને તબીબી ભાષામાં Paronychia કહેવામાં આવે છે. આમાં નખની આસપાસ પરુ વળવું અને અસહ્ય દુખાવો થવો જેવી સમસ્યાઓ થાય છે.
તમારા સ્વાસ્થ્યને જાળવી રાખવા માટે નખને દર 7 થી 10 દિવસે કાપવા જોઈએ. જો તમે નખ લાંબા રાખો છો, તો તેને દરરોજ નખના બ્રશ અને સાબુ થી સાફ કરવા અત્યંત અનિવાર્ય છે. ખાસ કરીને રસોઈ બનાવતા પહેલા અને જમતા પહેલા નખની સ્વચ્છતાનું ખાસ ધ્યાન રાખવું જોઈએ.
