WPL 2026 Opening Ceremony: મહિલા ક્રિકેટના સૌથી મોટા મંચોમાંના એક વિમેન્સ પ્રીમિયર લીગ (WPL) 2026નો ચોથો સીઝન ભવ્ય અંદાજમાં શરૂ થવા જઈ રહ્યો છે. ટૂર્નામેન્ટની શરૂઆત પહેલા 9 જાન્યુઆરીએ એક ભવ્ય ઓપનિંગ સેરેમનીનું આયોજન કરવામાં આવ્યું છે, જેમાં ક્રિકેટ સાથે બોલીવુડનો તડકો પણ જોવા મળશે. આ ખાસ પ્રસંગે ડિફેન્ડિંગ ચેમ્પિયન મુંબઈ ઈન્ડિયન્સ અને રોયલ ચેલેન્જર્સ બેંગલુરુ વચ્ચે પ્રથમ મેચ રમાશે.
ક્યારે અને ક્યાં થશે WPL 2026ની ઓપનિંગ સેરેમની
WPL 2026ની ઓપનિંગ સેરેમની શુક્રવાર, 9 જાન્યુઆરીએ નવી મુંબઈના ડીવાય પાટિલ સ્ટેડિયમમાં યોજાશે. ટૂર્નામેન્ટની પ્રથમ મેચ સાંજે 7:30 વાગ્યે (IST) શરૂ થશે, જ્યારે ઓપનિંગ સેરેમનીની શરૂઆત તેનાથી લગભગ એક કલાક પહેલા એટલે કે સાંજે 6:30 વાગ્યે થવાની અપેક્ષા છે.ભારતમાં ફેન્સ આ રંગારંગ કાર્યક્રમ અને મેચનું સીધું પ્રસારણ સ્ટાર સ્પોર્ટ્સ નેટવર્ક પર જોઈ શકશે. તેમજ મોબાઈલ અને ડિજિટલ પ્લેટફોર્મ પર લાઈવ સ્ટ્રીમિંગ જિયોસિનેમા એપ અને વેબસાઈટ પર ઉપલબ્ધ રહેશે.
ઓપનિંગ સેરેમનીમાં કોણ હશે મુખ્ય મહેમાન
BCCIએ આ વખતે ઓપનિંગ સેરેમનીને ખાસ બનાવવા માટે મોટા સ્ટાર્સને આમંત્રિત કર્યા છે. પ્રખ્યાત ગાયક યો યો હની સિંહ પોતાના લોકપ્રિય ગીતોથી સ્ટેડિયમમાં માહોલ બનાવશે. તેમની સાથે બોલીવુડ અભિનેત્રી જેકલીન ફર્નાન્ડિસ પણ પર્ફોર્મ કરશે. કહેવાય છે કે જેકલીનનું ડાન્સ પર્ફોર્મન્સ મહિલા ખેલાડીઓના આત્મવિશ્વાસ અને જુસ્સાને સમર્પિત હશે.આ સાથે મિસ યુનિવર્સ 2021 હરનાઝ સંધુ પણ આ સમારોહમાં ભાગ લેશે, જેનાથી ઈવેન્ટની રોનક વધુ વધી જશે.
ટૂર્નામેન્ટનું સંપૂર્ણ ફોર્મેટ
WPL 2026માં કુલ પાંચ ટીમો ભાગ લેશે – મુંબઈ ઈન્ડિયન્સ, રોયલ ચેલેન્જર્સ બેંગલુરુ, દિલ્હી કેપિટલ્સ, ગુજરાત જાયન્ટ્સ અને યુપી વોરિયર્ઝ. આ વખતે ટૂર્નામેન્ટમાં કુલ 22 મેચો રમાશે.આ સીઝનની મેચો બે શહેરોમાં યોજાશે. શરૂઆતની મેચો નવી મુંબઈમાં રમાશે, જ્યારે લીગની મહત્વની મેચો, પ્લેઓફ અને ફાઈનલ વડોદરાના કોટાંબી સ્ટેડિયમમાં યોજાશે. WPL 2026ની ફાઈનલ મેચ 5 ફેબ્રુઆરીએ રમાશે. દરેક સીઝન સાથે WPLની લોકપ્રિયતા ઝડપથી વધી રહી છે. નવા કેપ્ટનો, આંતરરાષ્ટ્રીય સ્ટાર ખેલાડીઓ અને યુવા ભારતીય ટેલેન્ટના દમ પર આ વખતે પણ ટૂર્નામેન્ટમાંથી જબરદસ્ત રોમાંચની અપેક્ષા છે. મહિલા ક્રિકેટને વધુ મજબૂત બનાવતી આ લીગ હવે વિશ્વભરમાં ચાહકોનું ધ્યાન ખેંચી રહી છે, અને આ સીઝન તેને વધુ ઊંચાઈએ લઈ જશે.
