અમેરિકાના ઉત્તર કેરોલિનામાં નવા વર્ષની ઉજવણી પર હુમલો કરવાના કાવતરાનો પર્દાફાશ થયો છે. ISIS થી પ્રેરિત આતંકવાદી હુમલાનું કાવતરું ઘડવા બદલ 18 વર્ષીય યુવકની ધરપકડ કરવામાં આવી છે. શંકાસ્પદ વ્યક્તિની ઓળખ ક્રિશ્ચિયન સ્ટર્ડિવન્ટ તરીકે થઈ છે. FBI એ જણાવ્યું હતું કે સ્ટર્ડિવન્ટ પર આતંકવાદી સંગઠન ISIS ને સમર્થન આપવાનો પ્રયાસ કરવાનો આરોપ છે. તે કરિયાણાની દુકાન પર હુમલો કરવાની યોજના બનાવી રહ્યો હતો.
ચાર્લોટની બહાર મિન્ટ હિલનો રહેવાસી સ્ટર્ડિવન્ટ, જાન્યુઆરી 2022 માં જ્યારે તે સગીર હતો ત્યારે પહેલી વાર FBI ના ધ્યાન પર આવ્યો હતો. એક અહેવાલ મુજબ, સ્ટર્ડિવન્ટે તે સમયે યુરોપમાં ISIS ના એક સભ્યનો સંપર્ક કર્યો હતો અને તેને કાળા કપડાં પહેરીને "તમારા પાડોશીને હથોડી અને છરીથી મારવાની" સૂચનાઓ મળી હતી. 12 ડિસેમ્બરના રોજ, સ્ટર્ડિવન્ટે એવા લોકોને સંદેશા મોકલવાનું શરૂ કર્યું જેમને તે ISIS ના સભ્યો માનતો હતો.
FBI અધિકારીઓના જણાવ્યા અનુસાર, તેણે કહ્યું હતું કે તે "ટૂંક સમયમાં જેહાદ કરશે", પોતાને "રાજ્યનો સૈનિક" ગણાવ્યો, હથોડા અને છરીઓના ચિત્રો મોકલ્યા, અને કરિયાણાની દુકાન અને ફાસ્ટ ફૂડ રેસ્ટોરન્ટ પર હુમલો કરવા માટે બંદૂકો મેળવવાની વાત કરી. અહેવાલો અનુસાર, સ્ટર્ડિવન્ટે કથિત રીતે નવા વર્ષની પૂર્વ સંધ્યાએ સ્થાનિક કરિયાણાની દુકાન અને બર્ગર કિંગ ફાસ્ટ ફૂડ રેસ્ટોરન્ટને નિશાન બનાવવાની યોજના બનાવી હતી. જ્યાં સ્ટર્ડિવન્ટ કામ કરતો હતો.FBI એજન્ટોએ સ્ટર્ડિવન્ટના ઘરની તપાસ કરી અને "ન્યુ યર એટેક 2026" નામની એક હસ્તલિખિત નોંધ મળી, જેમાં કથિત રીતે 20 પીડિતોને ચાકુ મારવાની અને ઘટનાસ્થળે પહોંચેલા પોલીસ અધિકારીઓ પર હુમલો કરવાની યોજનાની ચર્ચા કરવામાં આવી હતી.
FBI ને તેના પલંગ નીચે છુપાયેલા હથિયારો પણ મળ્યા, જેમાં બે છરીઓ અને બે હથોડાનો સમાવેશ થાય છે. ટેક્ટિકલ ગ્લોવ્સ અને એક જેકેટ પણ મળી આવ્યું હતું. અહેવાલો અનુસાર, જપ્ત કરાયેલા દસ્તાવેજોમાં બિન-મુસ્લિમો, LGBTQ વ્યક્તિઓ, યહૂદીઓ અને ખ્રિસ્તીઓ જેવા જૂથોને લક્ષ્ય બનાવવાનો પણ ઉલ્લેખ છે.FBI ના જણાવ્યા અનુસાર, સ્ટર્ડિવન્ટ વર્ષોથી ઓનલાઈન કટ્ટરપંથીકરણ કરી રહ્યો હતો, ISIS સંબંધિત ટિકટોક વીડિયો બનાવી રહ્યો હતો અને ઉગ્રવાદી કન્ટેન્ટ જોઈ રહ્યો હતો.
આ સાથે, FBI એ જણાવ્યું કે તેને પહેલા માનસિક સારવાર માટે મોકલવામાં આવ્યો હતો.
