Electricity Saving Tips: આજના આધુનિક યુગમાં ઈલેક્ટ્રોનિક ઉપકરણો વગરના જીવનની કલ્પના કરવી મુશ્કેલ છે. સવારથી સાંજ સુધી આપણે અનેક મશીનોનો ઉપયોગ કરીએ છીએ જે આપણું કામ સરળ બનાવે છે, પરંતુ મહિનાના અંતે જ્યારે વીજળીનું બિલ હાથમાં આવે ત્યારે પરસેવો છૂટી જાય છે. મોટાભાગના લોકો એમ માને છે કે આખો દિવસ પંખા કે બલ્બ ચાલુ રાખવાથી બિલ વધે છે, પરંતુ હકીકત કંઈક અલગ જ છે. ખરેખર તો આપણા ઘરમાં રહેલા અમુક ખાસ ભારે ઉપકરણો જ ખરા અર્થમાં 'વીજળીના રાક્ષસ' સાબિત થાય છે, જે ચુપચાપ યુનિટ્સ વધારીને તમારું બજેટ ખોરવી નાખે છે.
માર્ચ મહિનો બેસી ગયો છે અને ઉનાળાની દસ્તક સાથે હવે એસી (AC) અને અન્ય કુલિંગ ઉપકરણોનો વપરાશ વધવાનો છે. જો તમે અત્યારથી જ યોગ્ય પ્લાનિંગ નહીં કરો તો ઉનાળાના અંતે વીજળીનું બિલ તમારા ખિસ્સા પર ભારે પડી શકે છે. નિષ્ણાતોના મતે, માત્ર સાવચેતી અને વપરાશની પદ્ધતિમાં થોડો ફેરફાર કરવાથી તમે બિલમાં 30 થી 40 ટકા સુધીનો ઘટાડો કરી શકો છો. ચાલો જાણીએ એવા ત્રણ મુખ્ય ઉપકરણો વિશે જે સૌથી વધુ વીજળી વાપરે છે અને તેને બચાવવાના ઉપાયો શું છે.
1. એર કંડિશનર (AC): ઉનાળામાં બિલ વધારવાનું મુખ્ય કારણ
જેમ જેમ ગરમી વધે છે તેમ તેમ એસીનો વપરાશ અનિવાર્ય બની જાય છે. એક સામાન્ય 1.5 ટનનું એસી અંદાજે 1500 થી 2000 વોટ વીજળી વાપરે છે. જો તમે એસીને 18 કે 20 ડિગ્રી જેવા નીચા તાપમાને ચલાવો છો, તો તેનું કોમ્પ્રેસર સતત ચાલુ રહે છે અને વીજળીનો વપરાશ બમણો થઈ જાય છે.
બચતની ટિપ્સ: એસીનું તાપમાન હંમેશા 24 થી 26 ડિગ્રી વચ્ચે રાખો. આ તાપમાન માનવ શરીર માટે આરામદાયક છે અને વીજળી પણ ઓછી વાપરે છે. રૂમના બારી-બારણા ચુસ્ત બંધ રાખો અને બારીઓ પર જાડા પડદા લગાવો જેથી બહારની ગરમી અંદર ન આવે. જો શક્ય હોય તો 'ઇન્વર્ટર એસી' વસાવો.
2. વોટર હીટર કે ગીઝર: શિયાળાનો સુપર કન્ઝ્યુમર
શિયાળો હોય કે ચોમાસું, ગરમ પાણી માટે ગીઝરનો ઉપયોગ હવે સામાન્ય થઈ ગયો છે. ગીઝર સામાન્ય રીતે 2000 થી 3000 વોટ પાવર ખેંચે છે. ઘણા લોકોની આદત હોય છે કે પાણી ગરમ થયા પછી પણ ગીઝરની સ્વીચ બંધ કરવાનું ભૂલી જાય છે. ઓટો-કટ સુવિધા હોવા છતાં, પાણી ઠંડું પડતા જ ગીઝર ફરી ચાલુ થઈ જાય છે, જે બિનજરૂરી બિલ વધારે છે.
બચતની ટિપ્સ: માત્ર જરૂર હોય ત્યારે જ ગીઝર ચાલુ કરો અને કામ પત્યા પછી તુરંત સ્વીચ ઓફ કરો. હંમેશા 5-સ્ટાર રેટિંગવાળા અને સારી રીતે ઇન્સ્યુલેટેડ ટાંકીવાળા ગીઝર ખરીદો, જેથી ગરમ પાણી લાંબા સમય સુધી ગરમ રહે અને વારંવાર ગરમ ન કરવું પડે.
3. વોશિંગ મશીન: લોડ મેનેજમેન્ટ છે જરૂરી
વોશિંગ મશીન ભલે આખો દિવસ ન ચાલતું હોય, પણ તેની હેવી મોટર અને ખાસ કરીને 'હોટ વોશ' (પાણી ગરમ કરીને કપડાં ધોવા) મોડ વીજળીનો વપરાશ આસમાને પહોંચાડે છે. આ ઉપરાંત, કપડાં સુકવવા માટેના 'ડ્રાયર' મોડનો અતિશય વપરાશ પણ યુનિટ્સ ઝડપથી વધારે છે.
બચતની ટિપ્સ: રોજ થોડા-થોડા કપડાં ધોવાને બદલે અઠવાડિયામાં બે કે ત્રણ વાર ફુલ લોડમાં કપડાં ધોવાનું રાખો. જો કપડાં બહુ ગંદા ન હોય તો હંમેશા 'કોલ્ડ વોશ' મોડનો ઉપયોગ કરો. તડકો સારો હોય ત્યારે ડ્રાયરનો ઉપયોગ ટાળીને કપડાંને કુદરતી રીતે સુકવવાનો આગ્રહ રાખો.
આટલું જરૂર કરો
ઘરના તમામ જૂના બલ્બ બદલીને LED બલ્બ લગાવો અને ઉપકરણોનો ઉપયોગ ન હોય ત્યારે પ્લગમાંથી સ્વીચ બંધ કરવાની આદત પાડો. સ્ટેન્ડબાય મોડ પર રહેલી વસ્તુઓ પણ વર્ષે હજારો રૂપિયાની વીજળી વેડફે છે. યોગ્ય આયોજન એ જ વીજળી બચતની ચાવી છે.
