Mohammed Shami on Retirement: ભારતીય ક્રિકેટ ટીમના અનુભવી ફાસ્ટ બોલર મોહમ્મદ શમી થોડાક સમયથી ટીમ ઈન્ડિયાની બહાર છે. ચેતેશ્વર પૂજારા અને રવિચંદ્રન અશ્વિનના નિવૃત્તિ પછી, ક્રિકેટમાં શમીના ભવિષ્ય વિશેની ચર્ચાઓ વધી ગઈ છે. સોશિયલ મીડિયા પર ઘણી વખત પ્રશ્નો ઉભા થયા હતા કે, શું 34 વર્ષીય શમી પણ આંતરરાષ્ટ્રીય ક્રિકેટને અલવિદા કહેવા જઈ રહ્યો છે? પરંતુ શમીએ પોતે આ અફવાઓ અંગે કહ્યું છે.
શમીનું કડક સ્ટેટમેન્ટ
એક ઇન્ટરવ્યુમાં શમીએ સ્પષ્ટપણે કહ્યું હતું કે, તેનો નિવૃત્તિ લેવાનો કોઈ ઇરાદો નથી. નિવૃત્તિના સમાચાર પર કટાક્ષ કરતા તેણે કહ્યું, "જો કોઈને મારાથી સમસ્યા હોય તો મને કહો. જો હું નિવૃત્તિ લઈ લઉં તો શું તેમનું જીવન સારું થશે? કોના જીવનમાં હું પથ્થર બની ગયો છું, કોણ ઇચ્છે છે કે હું ક્રિકેટ છોડી દઉં? જે દિવસે મને પોતાને લાગશે કે, હવે મને ક્રિકેટમાં મન નથી લાગતું, ત્યારે હું કોઈપણ દબાણ વિના નિવૃત્તિ જાહેર કરીશ."
"મને સિલેક્ટ ના કરો, તો પણ હું રમતો રહીશ"
ઘણા મોટી ટુર્નામેન્ટમાં ભારતીય ટીમમાંથી બહાર રહેવા અંગે, શમીએ કહ્યું કે, તેને ભારતીય ટીમમાં સ્થાન મળે કે ન મળે, તે રમવાનું ચાલુ રાખશે. તેણે કહ્યું, "તમે મને આંતરરાષ્ટ્રીય ટીમમાં પસંદ ન કરો, પરંતુ હું સખત મહેનત કરતો રહીશ. પછી ભલે તે ઘરેલુ ક્રિકેટ હોય કે બીજે ક્યાંય, હું મેદાન પર રમતો રહીશ."
વર્લ્ડ કપ જીતવાનું સ્વપ્ન અધૂરું રહ્યું
શમીએ એમ પણ કહ્યું કે, તેમનું સૌથી મોટું સ્વપ્ન હજુ પણ અધૂરું છે અને તે ભારત માટે ODI વર્લ્ડ કપ જીતવાનું છે. તેમણે કહ્યું, "અમે 2023 વર્લ્ડ કપ જીતવાની ખૂબ નજીક હતા, પરંતુ અમે જીતી શક્યા નહીં. હવે મારું સંપૂર્ણ ધ્યાન 2027 વર્લ્ડ કપ પર છે. હું ત્યાં સુધી રમવા માંગુ છું અને ટીમ માટે ટાઇટલ જીતવા માંગુ છું."
ફિટનેસ પર સખત મહેનત
ઇંગ્લેન્ડ ટેસ્ટ શ્રેણી અને એશિયા કપ ટીમમાંથી બહાર થયા પછી, શમી પણ તેની ફિટનેસ પર કામ કરી રહ્યો છે. તેણે કહ્યું કે, તેણે છેલ્લા બે મહિનામાં સખત મહેનત કરી છે, ખાસ કરીને વજન ઘટાડવા અને લાંબા સ્પેલની બોલિંગ પર. તેણે કહ્યું, "ક્રિકેટ પ્રત્યેનો મારો પ્રેમ હજુ પણ અકબંધ છે. જે દિવસે મારો જુસ્સો ઓછો થશે, હું પોતે નિવૃત્તિ લઈશ. ત્યાં સુધી હું સંપૂર્ણ હિમતથી રમીશ."
IPL 2025 માં લયની શોધ
શમી છેલ્લે માર્ચ 2025 માં આંતરરાષ્ટ્રીય ક્રિકેટ રમ્યો હતો. ત્યારબાદ તેને ભારતીય ટીમમાં તક મળી ન હતી. IPL 2025 માં પણ તે બોલિંગ કરતી વખતે ઘણો સંઘર્ષ કરતો જોવા મળ્યા હતા. આમ છતાં, શમી માને છે કે, તેની કારકિર્દી હજી પૂરી થઈ નથી અને તે તેના પ્રદર્શનથી વાપસી કરશે.
