દિલ્હીના વાતાવરણમાં પલટો : અનેક વિસ્તારોમાં વરસાદથી ભરાયા પાણી

દિલ્હીમાં ફરી એકવાર હવામાનનો મિજાજ બદલાયો છે. શુક્રવારે રાત્રે દિલ્હીમાં ગાજવીજ અને વીજળીના ચમકારા સાથે વરસાદ શરૂ થયો હતો. ઘણા વિસ્તારોમાં ભારે વરસાદ થઈ રહ્યો છે જેના કારણે ઘણી જગ્યાએ પાણી જમા થઈ ગયા છે. માર્ગો પર વાહનોની ગતિ પણ થંભી ગઈ છે. તમને જણાવી દઈએ કે ભારતીય હવામાન વિભાગ (IMD) એ આજે ​​વાવાઝોડા અને વરસાદ માટે યલો એલર્ટ જાહેર કર્યું હતું. IMDએ કહ્યું હતું કે આજે દિલ્હી અને નોઈડામાં આંધી અને વરસાદ પડી શકે છે. હવામાન વિભાગની આ આગાહી સાચી સાબિત થઈ અને રાત્રે દિલ્હીમાં ભારે વરસાદ શરૂ થયો.

વરસાદથી દિલ્હીના લોકો માટે રાહત છે. ઘણા દિવસોથી દિલ્હીમાં મહત્તમ તાપમાન 40 ડિગ્રીની આસપાસ હતું. દિવસ દરમિયાન તડકામાં બહાર નીકળવામાં લોકોને ભારે મુશ્કેલીનો સામનો કરવો પડી રહ્યો હતો.  જો કે હવે વરસાદ પડતાં લોકોને ચોક્કસ રાહત મળી છે.

દિલ્હીમાં મહત્તમ તાપમાન 41 ડિગ્રીએ પહોંચી ગયું
શુક્રવારે દિલ્હીમાં મહત્તમ તાપમાન 41 ડિગ્રી સેલ્સિયસ નોંધાયું હતું જે આ સિઝનના સામાન્ય તાપમાન કરતાં 4.2 ડિગ્રી વધુ છે. IMDએ સાંજે દિલ્હીમાં વરસાદ અને વાવાઝોડાની આગાહી કરી હતી. દિલ્હી ગુરુગ્રામ અને નોઈડા માટે યલો એલર્ટ જારી કરવામાં આવ્યું છે. રાત્રે 8 વાગ્યાની આસપાસ જોરદાર વાવાઝોડા બાદ જોરદાર વરસાદ શરૂ થયો હતો જેના કારણે લોકોને ગરમીમાંથી થોડી રાહત મળી હતી.

હવામાન વિભાગના જણાવ્યા અનુસાર શનિવારે દિલ્હીમાં મહત્તમ અને લઘુત્તમ તાપમાન 38 ડિગ્રી સેલ્સિયસ અને 26 ડિગ્રી સેલ્સિયસની આસપાસ રહેવાની સંભાવના છે. શનિવારે આંશિક વાદળછાયું અને સાંજ સુધીમાં સામાન્ય રીતે વાદળછાયું રહેવાની શક્યતા છે.