જ્યોતિષ શાસ્ત્રમાં ધાતુઓનું વિશેષ મહત્વ હોય છે અને તે માનવ જીવન પર ઊંડો પ્રભાવ પાડે છે. સોનું અને ચાંદી જેવી ધાતુઓ માત્ર શણગારની વસ્તુઓ નથી પરંતુ તેનો સંબંધ સીધો ગ્રહો સાથે રહેલો છે. ખાસ કરીને ચાંદીને ચંદ્ર અને શુક્ર ગ્રહ સાથે જોડવામાં આવે છે. જ્યોતિષીઓના મતે જો યોગ્ય રીતે અને નિયમોનું પાલન કરીને ચાંદી ધારણ કરવામાં આવે તો વ્યક્તિના જીવનમાં સકારાત્મક ઉર્જાનો સંચાર થાય છે. અંગૂઠામાં ચાંદીનું વલય પહેરવાથી માનસિક અશાંતિ દૂર થાય છે અને વ્યક્તિત્વમાં નિખાર આવે છે. જોકે આ માટે અમુક ચોક્કસ નિયમોનું પાલન કરવું અનિવાર્ય છે.
કયા દિવસે ધારણ કરવી જોઈએ
કોઈપણ રત્ન કે ધાતુ ત્યારે જ ફળ આપે છે જ્યારે તેને યોગ્ય મુહૂર્તમાં પહેરવામાં આવે. ચાંદી એ શીતળ ધાતુ છે અને તે ચંદ્રનું પ્રતીક છે. તેથી તેને પૂનમના દિવસે ધારણ કરવું શ્રેષ્ઠ માનવામાં આવે છે. આ ઉપરાંત અઠવાડિયાના વાર મુજબ સોમવાર અને શુક્રવાર પણ આ ધાતુ માટે અત્યંત શુભ ગણાય છે. આ દિવસોમાં વિધિપૂર્વક ધારણ કરવાથી ચંદ્ર અને શુક્રના શુભ પ્રભાવો જીવનમાં જોવા મળે છે.
કયા હાથમાં પહેરવું શુભ
ઘણીવાર લોકોના મનમાં પ્રશ્ન થાય છે કે ડાબા હાથમાં પહેરવું કે જમણા હાથમાં. જ્યોતિષ શાસ્ત્ર અનુસાર સામાન્ય રીતે જમણા હાથના અંગૂઠામાં આ વીંટી પહેરવી ઉત્તમ ગણાય છે. જો કોઈ કારણસર જમણા હાથમાં શક્ય ન હોય તો જ ડાબા હાથના અંગૂઠામાં પહેરી શકાય છે. હથેળીમાં અંગૂઠાના નીચેના ઉપસેલા ભાગમાં શુક્ર પર્વત આવેલો હોય છે. તેથી અંગૂઠામાં ચાંદી પહેરવાથી શુક્ર ગ્રહ બળવાન બને છે અને તેના શુભ ફળ મળે છે.
કોણે ન પહેરવી જોઈએ
દરેક દવા દરેક દર્દીને માફક આવતી નથી તેમ જ્યોતિષીય ઉપાયો પણ કુંડળી જોઈને કરવા જોઈએ. જે લોકોની જન્મ કુંડળીમાં ચંદ્ર ગ્રહ રાહુ સાથે હોય અથવા ચંદ્ર પીડિત અવસ્થામાં હોય તેમણે જ્યોતિષની સલાહ વગર ચાંદી પહેરવી જોઈએ નહીં. આ ઉપરાંત આયુર્વેદની દ્રષ્ટિએ ચાંદીની તાસીર ઠંડી હોય છે. તેથી જે લોકોને કાયમ શરદી, કફ કે સાંધાના દુખાવાની ફરિયાદ રહેતી હોય તેમણે પણ આ પ્રયોગ કરવાનું ટાળવું જોઈએ નહીંતર સ્વાસ્થ્ય બગડી શકે છે.
કોના માટે લાભદાયી છે
કર્ક રાશિના જાતકો માટે ચાંદીનું વલય વરદાન સમાન સાબિત થઈ શકે છે કારણ કે તેમનો સ્વામી ગ્રહ ચંદ્ર છે. આ સિવાય જે જાતકોની કુંડળીમાં ચંદ્ર નવમા ભાવમાં એટલે કે ભાગ્ય સ્થાનમાં હોય અથવા તો લગ્ન સ્થાનમાં બિરાજમાન હોય તેમણે અચૂક આ ઉપાય કરવો જોઈએ. તેનાથી ભાગ્ય વૃદ્ધિ થવાની શક્યતાઓ વધી જાય છે.
મળતા શુભ પરિણામો
શાસ્ત્રો મુજબ આ ઉપાય કરવાથી કુંડળીમાં શુક્ર ગ્રહની સ્થિતિ મજબૂત થાય છે. શુક્ર એ ભૌતિક સુખ અને સુંદરતાનો કારક છે. તેથી વ્યક્તિના જીવનમાં સુખ સુવિધા વધે છે અને આત્મવિશ્વાસમાં વધારો થાય છે. ચંદ્ર સાથે સંબંધ હોવાથી મન શાંત રહે છે, તણાવ દૂર થાય છે અને એકાગ્રતા વધે છે. આ પ્રયોગ નકારાત્મક ઉર્જાને દૂર રાખી જીવનમાં સુખ અને શાંતિ લાવવામાં મદદરૂપ થાય છે.
