ચેમ્પિયન્સ ટ્રોફી પહેલા મોટા સમાચાર! : બાંગ્લાદેશ વિરુદ્ધ દુબઈમાં વિરાટ કોહલી રચશે ઈતિહાસ, પોતાના 'રોલ મોડલ'ને છોડશે પાછળ

IND vs BAN: કેપ્ટન રોહિત શર્માના નેતૃત્વમાં ટીમ ઈન્ડિયા 19 ફેબ્રુઆરીથી શરૂ થઈ રહેલી ચેમ્પિયન્સ ટ્રોફીમાં બાંગ્લાદેશ સામે પોતાના અભિયાનની શરૂઆત કરશે. આ મેચમાં તમામની નજર અનુભવી બેટ્સમેન વિરાટ કોહલી પર રહેશે, જે હાલમાં ખરાબ ફોર્મ સાથે સંઘર્ષ કરી રહ્યો છે. જો કે તેણે અમદાવાદના નરેન્દ્ર મોદી સ્ટેડિયમમાં ઈંગ્લેન્ડ સામે ફટકારેલી ફિફ્ટીથી ચોક્કસપણે તેનો આત્મવિશ્વાસ વધ્યો હશે. ICCની મોટાભાગની ટૂર્નામેન્ટમાં વિરાટના બેટમાં તાકાત આવે છે. વિરાટ ચાહકોને ફરી એકવાર આવું જ ફોર્મ બતાવવા માંગે છે.

બાંગ્લાદેશ સામે દુબઈ ઈન્ટરનેશનલ ક્રિકેટ સ્ટેડિયમમાં વિરાટ પાસે મહાન બેટ્સમેન અને તેના રોલ મોડલ સચિન તેંડુલકરને પાછળ છોડવાની તક છે. જો વિરાટ આ કરવામાં સફળ રહેશે તો તે ODI ક્રિકેટમાં વર્લ્ડ રેકોર્ડ પોતાના નામે કરી લેશે. વાસ્તવમાં, હાલમાં વિરાટના નામે ODIની 285 ઇનિંગ્સમાં 13963 રન છે. આવી સ્થિતિમાં જો વિરાટ બાંગ્લાદેશ સામે 37 રન બનાવી લે છે તો તે 300થી ઓછી ઇનિંગ્સમાં 14 હજાર રન બનાવનાર વિશ્વનો પ્રથમ ખેલાડી બની જશે.

વિરાટ પાસે ધવનને પછાડવાની તક
માસ્ટર બ્લાસ્ટર સચિને તેની 350મી ઇનિંગ્સમાં આ સિદ્ધિ મેળવી હતી, જ્યારે સંગાકારાએ 14000 રન બનાવવા માટે 378 ઇનિંગ્સ રમી હતી. તે દરમિયાન કોહલીએ 13 મેચમાં 529 રન બનાવ્યા છે અને તેની પાસે શિખર ધવનને પછાડીને ICC ચેમ્પિયન્સ ટ્રોફીમાં ભારતનો સૌથી વધુ રન બનાવનાર ખેલાડી બનવાની તક છે. ધવન હાલમાં 10 મેચમાં 701 રન સાથે ભારત માટે સૌથી વધુ રન બનાવનાર બેટ્સમેન છે અને કોહલીને ધવનને પાછળ છોડવા માટે 173 રનની જરૂર છે.

કોહલી ક્રિસ ગેલને પણ પાછળ છોડી શકે છે..
આ સાથે કોહલી પાસે આ ટૂર્નામેન્ટમાં સૌથી વધુ રન બનાવવાની પણ તક હશે, જ્યાં તેને આમ કરવા માટે 263 રનની જરૂર છે. વેસ્ટ ઈન્ડિઝનો ભૂતપૂર્વ ક્રિકેટર ક્રિસ ગેલ 791 રન સાથે ટૂર્નામેન્ટમાં સૌથી વધુ રન બનાવનાર બેટ્સમેન છે. તમને જણાવી દઈએ કે ચેમ્પિયન્સ ટ્રોફીમાં ભારતને ન્યૂઝીલેન્ડ, પાકિસ્તાન અને બાંગ્લાદેશની સાથે ગ્રુપ Aમાં રાખવામાં આવ્યું છે. ભારતીય ટીમ તેની પ્રથમ મેચ 20 ફેબ્રુઆરીએ બાંગ્લાદેશ સામે રમશે અને ત્યારબાદ 23 ફેબ્રુઆરીએ પાકિસ્તાનનો સામનો કરશે. ન્યુઝીલેન્ડ સામે તેની છેલ્લી લીગ મેચ 2 માર્ચે રમાશે. ભારત તેની તમામ ICC ચેમ્પિયન્સ ટ્રોફી મેચ દુબઈના દુબઈ ઈન્ટરનેશનલ સ્ટેડિયમમાં રમશે.