Tandoori Chai: ભારતીયો માટે ચા એ માત્ર એક પીણું નથી, પરંતુ એક અનોખી લાગણી છે. સવારની આળસ ભગાડવી હોય કે ઓફિસના કામનો થાક ઉતારવો હોય, એક કપ ગરમાગરમ કડક ચા ભારતીયો માટે 'યુનિવર્સલ સોલ્યુશન' છે. સામાન્ય રીતે દરેક ઘરમાં દૂધ, પાણી, ખાંડ અને ચાની પત્તીના મિશ્રણથી પરંપરાગત રીતે ચા બનતી હોય છે. પરંતુ હાલમાં સોશિયલ મીડિયા પર ચા બનાવવાની એક એવી અતરંગી અને અનોખી રીત વાયરલ થઈ રહી છે, જે જોઈને મોટાભાગના ચા પ્રેમીઓ આશ્ચર્યચકિત થઈ ગયા છે. આ નવી રેસીપીનું નામ છે 'દીવા વાળી ચા' (Diva Wali Chai), જેનો સ્વાદ ચાખવા માટે લોકો આતુર બન્યા છે.
ઈન્ટરનેટ પર વાયરલ થયેલી આ રેસીપીમાં ચા બનાવતી વખતે પહેલા દૂધ કે પાણી નહીં, પણ તપેલીમાં માટીના દીવા મૂકવામાં આવે છે. આ અનોખી પદ્ધતિથી બનતી ચામાં માટીની સોડમ ભળે છે, જે તમને ફેમસ 'તંદૂરી ચા' જેવો અદભૂત સ્વાદ આપે છે. જો તમે પણ દરરોજ એક જ પ્રકારની ચા પીને કંટાળી ગયા હોવ અને કંઈક નવું ટ્રાય કરવા માંગતા હોવ, તો આ 'દીવા વાળી ચા' તમારા માટે બેસ્ટ ઓપ્શન સાબિત થઈ શકે છે. ચાલો જાણીએ આ વાયરલ રેસીપી પાછળનું ગણિત અને તેને બનાવવાની સ્ટેપ-બાય-સ્ટેપ રીત.
શું છે 'દીવા વાળી ચા' અને કેમ થઈ રહી છે વાયરલ?
સામાન્ય રીતે આપણે રેસ્ટોરન્ટ કે કાફેમાં 'તંદૂરી ચા' પીતા હોઈએ છીએ, જેમાં માટીના કુલડીને ધગધગતી કરીને ચામાં ડૂબાડવામાં આવે છે. પરંતુ આ રીતમાં ઘરમાં જ માટીના કોડિયા (દીવા)નો ઉપયોગ કરીને તેવો જ સ્વાદ લાવવાનો પ્રયાસ કરાયો છે. આ રીત એટલી સરળ છે કે તમે તમારી રસોઈમાં જ 'ટપરી' જેવો સ્વાદ માણી શકો છો.
જરૂરી સામગ્રી: બસ આટલી વસ્તુઓ તૈયાર રાખો
આ અનોખી ચા બનાવવા માટે તમારે બહુ મહેનત કરવાની જરૂર નથી. તમારે જોઈશે:
માટીના બે સાફ દીવા (કોડિયા)
દૂધ (જરૂર મુજબ)
ખાંડ અને ચાની પત્તી
વાટેલું આદુ અને ઈલાયચી પાવડર
સ્ટેપ-બાય-સ્ટેપ રેસીપી: આ રીતે બનાવો ટેસ્ટી ચા
કેરેમેલાઇઝેશન પ્રક્રિયા: સૌથી પહેલા ગેસ પર ચાનું તપેલું ગરમ કરવા મૂકો. તેમાં પહેલા પાણી કે દૂધ નાખવાને બદલે 3 ચમચી ખાંડ અને 1 ચમચી ચાની પત્તી નાખો. તેને સતત હલાવતા રહો જ્યાં સુધી ખાંડ ઓગળીને સોનેરી (Golden Brown) ન થઈ જાય.
દીવાનો ઉપયોગ: જ્યારે ખાંડ કેરેમેલાઇઝ થઈ જાય, ત્યારે તેમાં બે સાફ કરેલા માટીના દીવા મૂકી દો. આ દીવા ચામાં માટીનો કુદરતી સ્વાદ અને સુગંધ ભેળવશે.
દૂધ અને મસાલા: હવે તેમાં એક કપ દૂધ ઉમેરો. થોડી સેકન્ડ ઉકળ્યા પછી તેમાં વાટેલું આદુ અને ઈલાયચી પાવડર નાખો. તેને 2-3 મિનિટ સુધી બરાબર ઉકળવા દો.
ફાઇનલ ટચ: ચા બરાબર ઉકળી જાય એટલે ચીપિયાની મદદથી સાવચેતીપૂર્વક દીવા બહાર કાઢી લો અને તૈયાર ચાને કપમાં ગાળી લો.
ટપરી વાળી ચા પણ આની સામે લાગશે ફેલ!
આ રીતે બનેલી ચાનો સ્વાદ સામાન્ય ચા કરતા ઘણો અલગ અને પ્રીમિયમ હોય છે. માટીના દીવાને કારણે તેમાં એક પ્રકારની સ્મોકી ફ્લેવર (Smoky Flavor) ઉમેરાય છે, જે વરસાદની સિઝન કે ઠંડીની સવારમાં અદભૂત લાગે છે. જો તમે પણ ચાના શોખીન હોવ તો આ વીકેન્ડ પર ચોક્કસ આ 'દીવા વાળી ચા' ટ્રાય કરજો.
