એક બાજુ બિહાર વિધાનસભા ચૂંટણી માટે મતદાન શરૂ થઈ ગયું છે. ત્યારે બીજી બાજુ ભારતના પાડોશી દેશ બાંગ્લાદેશમાં, થોડા મહિનામાં રાષ્ટ્રીય સંસદીય ચૂંટણીઓ યોજાવાની છે. રાજકીય પક્ષોએ આ માટે પ્રચાર શરૂ કરી દીધો છે. 6 નવેમ્બરના રોજ, બાંગ્લાદેશમાં એક પ્રચાર દરમિયાન દેશભરમાં ઘણી જગ્યાએ હિંસા ફાટી નીકળી હતી. હિંસા એટલી વધી ગઈ કે બાંગ્લાદેશ નેશનાલિસ્ટ પાર્ટી (BNP) ના ઉમેદવારને ગોળી મારી દેવામાં આવી અને બીજા ઉમેદવારના ઘરને આગ ચાંપી દેવામાં આવી.
બાંગ્લાદેશ નેશનાલિસ્ટ પાર્ટી (BNP) ના ઉમેદવાર ઇર્શાદ ઉલ્લાહ ચિત્તાગોંગમાં પ્રચાર કરી રહ્યા હતા ત્યારે હુમલાખોરોએ તેમના પર ગોળીબાર કર્યો હતો. વચગાળાની સરકારે આ હુમલાની નિંદા કરી છે. એક નિવેદનમાં, વચગાળાની સરકારે જણાવ્યું હતું કે ચિત્તાગોંગ મેટ્રોપોલિટન પોલીસ (CMP) દ્વારા તાત્કાલિક તપાસમાં જાણવા મળ્યું છે કે ઇર્શાદ ઉલ્લાહ હુમલાનું નિશાન નહોતા પરંતુ એક ગોળીથી ઘાયલ થયા હતા. સરકાર તેમના ઝડપી સ્વસ્થ થવાની કામના કરે છે. સંપૂર્ણ તપાસના આદેશ આપવામાં આવ્યા છે.
આ દરમિયાન મધ્ય કોમિલા જિલ્લામાંથી BNP દ્વારા નામાંકિત સાંસદ ઉમેદવાર મોનોવર સરકારે આરોપ લગાવ્યો છે કે તેમના ઘરને બદમાશો દ્વારા આગ લગાવવામાં આવી હતી. વિદ્યાર્થી સંઘની ચૂંટણીમાં જમાત સમર્થિત વિદ્યાર્થી શાખા જીત્યા બાદ BNP એ ચૂંટણી વાતાવરણ બગાડવા માટે જમાત-એ-ઇસ્લામી પર આરોપ લગાવ્યો છે. ઉત્તરી નેત્રકોનામાં BNP દ્વારા નામાંકિત સાંસદ ઉમેદવાર અનવરુલ હકે કહ્યું, "DUCSU, RUCSU અને CUCSU ની ચૂંટણીઓ પછી, તેમણે (જમાતે) દેશભરમાં એવું વાતાવરણ બનાવ્યું કે દેશમાં આગામી સરકાર તેમની હશે. પરંતુ અમને લાગે છે કે અમારા બાંગ્લાદેશી લોકો મધ્યમ ધાર્મિક છે, પરંતુ તેઓ ઉગ્રવાદી ધાર્મિક પ્રવૃત્તિઓમાં જોડાતા નથી."
અનવરુલ હકે કહ્યું કે જમાત-એ-ઇસ્લામી અને અન્ય લોકો અને સરકારના કેટલાક સલાહકારો અને અન્ય વિદેશી હિસ્સેદારોએ પણ આગામી ચૂંટણીઓ માટે પ્રતિકૂળ વાતાવરણ ઊભું કર્યું છે.
