Vijay's Big Hint In 2024 Movie: તમિલનાડુના રાજકારણમાં દાયકાઓ જૂના ડીએમકે (DMK) શાસનને હરાવીને વિજય અને તેમની પાર્ટી તમિલગા વેત્રી કઝગમ (TVK) એ શાનદાર એન્ટ્રી કરી છે. 50 વર્ષથી વધુ સમયથી દ્રવિડિયન રાજનીતિના ગઢ ગણાતા આ રાજ્યમાં આ એક મોટું પરિવર્તન છે. જ્યારે વિજયે 2024 માં TVK લોન્ચ કરી હતી, ત્યારે અટકળો હતી કે તેઓ 2026 ની વિધાનસભા ચૂંટણી લડશે. સાત મહિના પછી, તેમની સુપરહિટ ફિલ્મ 'ધ ગ્રેટેસ્ટ ઓફ ઓલ ટાઈમ (GOAT)' બ્લોકબસ્ટર સાબિત થઈ જેમાં તેમણે પોતાની રાજકીય મહત્વાકાંક્ષાઓનો સંકેત આપ્યો હતો.
ફિલ્મમાં છુપાયેલો ખાસ સંદેશ
ફિલ્મની એક નાની ક્લિપ વાયરલ થઈ છે, જેમાં વિજય એક કાર ચલાવી રહ્યા છે જેની રજીસ્ટ્રેશન પ્લેટ પર 'TN 07 CM 2026' લખેલું છે (TN એટલે તમિલનાડુ, CM એટલે મુખ્યમંત્રી). આ જોઈને ચાહકોમાં ચર્ચા જાગી હતી કે વિજયે 2026માં મુખ્યમંત્રી બનવાની પોતાની યોજનાનો ઈશારો પહેલેથી જ આપી દીધો હતો. બાદમાં, વિજયના સહ-કલાકાર પ્રેમગી અમરેને પણ ટીવીકે ચીફના રાજકારણમાં પ્રવેશ અંગે સંકેત આપ્યો હતો. તેમણે કહ્યું હતું કે, "હું 2026 માં તેમને જ વોટ આપીશ. હું તમને ગેરંટી આપું છું કે વિજય 2026 માં તમિલનાડુના મુખ્યમંત્રી બનશે.
રાજકીય સમીકરણો અને જીત
અમરેનના શબ્દો સાચા પડતા દેખાઈ રહ્યા છે, કારણ કે વિજય તમિલનાડુમાં મુખ્યમંત્રી બનનાર પ્રથમ અભિનેતા-રાજકારણી બનવા જઈ રહ્યા છે. 234 સભ્યોની તમિલનાડુ વિધાનસભામાં વિજયની પાર્ટી TVK સૌથી મોટા પક્ષ તરીકે ઉભરી આવી છે. પાર્ટીએ 108 બેઠકો જીતી છે, જે બહુમતીથી માત્ર 10 બેઠકો દૂર છે. આ સ્થિતિને જોતા હવે ગઠબંધનની ચર્ચાઓ તેજ થઈ છે.
ગઠબંધનની શક્યતાઓ, બે બેઠકો પર વિજય
પક્ષના આંતરિક સૂત્રોના જણાવ્યા અનુસાર, હાલમાં ડીએમકે (DMK) સાથે જોડાયેલા પક્ષો તરફથી સમર્થન મળવાની શક્યતા છે. જેમાં કોંગ્રેસ (5 બેઠકો), CPI, CPIM અને VCK (દરેકને 2 બેઠકો) નો સમાવેશ થાય છે. ખુદ વિજય તમિલનાડુમાં બે બેઠકો પરથી ચૂંટણી જીત્યા છે, ત્રિચી (પૂર્વ) અને પેરામ્બુર. સૂત્રોના જણાવ્યા અનુસાર, વિજય ત્રિચી (પૂર્વ) બેઠક પરથી રાજીનામું આપે અને પેરામ્બુર બેઠક પોતાની પાસે રાખે તેવી શક્યતા છે.
