આણંદ જિલ્લાના બોરસદની 22 વર્ષીય વિધિ કલ્પેશકુમાર મેઘાના કરૂણ અવસાનથી સમગ્ર પંથક શોકમાં ગરકાવ બની ગયું છે. ઉચ્ચ અભ્યાસ અને ઉજ્જવળ ભવિષ્યના સપનાઓ સાથે ચાર વર્ષ પહેલાં કેનેડા ગયેલી વિધિની હત્યા થયા બાદ લાંબી કાનૂની પ્રક્રિયા પૂર્ણ થતાં ઘટનાના 23 દિવસ બાદ તેનો પાર્થિવ દેહ વતન પહોંચ્યો હતો. કફનમાં લપેટાયેલો દીકરીનો મૃતદેહ જોઈને માતા-પિતા સહિત પરિવારજનો ભાંગી પડ્યા હતા.
ગત મોડી રાત્રે વિધિનો પાર્થિવ દેહ બોરસદ સ્થિત તેના પિતૃગૃહે પહોંચતા જ શોકનું વાતાવરણ છવાઈ ગયું હતું. જે દીકરીના ઉજ્જવળ ભવિષ્યના સપના પરિવારજનોએ જોયા હતા, તેની આ રીતે વિદાય આપવાનો વારો આવશે તેની કોઈએ કલ્પના પણ કરી ન હતી.
ગમગીન માહોલમાં નીકળી અંતિમ યાત્રા
સવારે ભારે આક્રંદ અને ગમગીન વાતાવરણ વચ્ચે વિધિની અંતિમ યાત્રા કાઢવામાં આવી હતી. પરિવારજનો, સગા-સંબંધીઓ, મિત્રો અને સ્થાનિક લોકો મોટી સંખ્યામાં અંતિમ દર્શન માટે ઉમટી પડ્યા હતા.
માતા-પિતાએ કંપતા હાથે પોતાની લાડકી દીકરીને અંતિમ વિદાય આપી હતી. દીકરીની વિદાયના દ્રશ્યો જોઈને હાજર રહેલા લોકોની આંખો પણ ભીની થઈ ગઈ હતી. સમગ્ર બોરસદ શહેર અને આસપાસના વિસ્તારમાં શોકની લાગણી વ્યાપી ગઈ હતી.
વિધિના અંતિમ સંસ્કાર વતનની માટીમાં કરવામાં આવ્યા હતા, જ્યાં હજારો લોકોની હાજરીમાં તેને શ્રદ્ધાંજલિ અર્પણ કરવામાં આવી હતી.
આ પણ વાંચો: CBSEનું મોટું પગલું : રી-ઈવેલ્યુએશન પ્રક્રિયામાં મોટો ફેરફાર, હવે વિદ્યાર્થીઓની ઉત્તરવહીઓની ચકાસણી સંપૂર્ણપણે બોર્ડના નિયંત્રણમાં
14 મે પછી તૂટી ગયો હતો સંપર્ક
પરિવારના જણાવ્યા અનુસાર, ગત 14 મેના રોજ વિધિની તેના પિતા સાથે છેલ્લી વાર ફોન પર વાત થઈ હતી. સામાન્ય વાતચીત બાદ અચાનક તેનો પરિવાર સાથેનો સંપર્ક તૂટી ગયો હતો.
વારંવાર સંપર્ક કરવાનો પ્રયાસ છતાં કોઈ જવાબ ન મળતા પરિવારજનો ચિંતિત બન્યા હતા. દરમિયાન કેનેડા પોલીસને મળેલી માહિતીના આધારે તપાસ હાથ ધરવામાં આવી હતી. પોલીસ જ્યારે વિધિના નિવાસસ્થાને પહોંચી હતી ત્યારે તેનો મૃતદેહ લોહીથી લથપથ હાલતમાં મળી આવ્યો હતો.
દીકરીની હત્યાના સમાચાર મળતા જ બોરસદમાં રહેતા પરિવારજનો પર આભ તૂટી પડ્યું હતું. વિદેશની ધરતી પર પોતાની દીકરીની નિર્મમ હત્યા થઈ હોવાના સમાચાર સાંભળીને પરિવારજનો સ્તબ્ધ બની ગયા હતા.
આ પણ વાંચો: દાહોદમાં રૂ. 1.46 કરોડની સનસનાટીભરી લૂંટનો ભેદ ઉકેલાયો : સાત આરોપીઓની ધરપકડ, 100% મુદ્દામાલ રિકવર
અભ્યાસ સાથે પીઆરની તૈયારી કરતી હતી વિધિ
વિધિ કલ્પેશકુમાર મેઘા ચાર વર્ષ પહેલાં કેનેડામાં ઉચ્ચ અભ્યાસ માટે ગઈ હતી. તે ત્યાં અભ્યાસની સાથે પાર્ટ-ટાઈમ નોકરી પણ કરતી હતી. સાથે જ કેનેડામાં સ્થાયી થવા માટે પર્મેનન્ટ રેસિડન્સી (PR) મેળવવાની તૈયારી પણ કરી રહી હતી.
શરૂઆતમાં તે પોતાના સગા મામા સાથે રહેતી હતી, પરંતુ છેલ્લા દોઢ વર્ષથી અભ્યાસ અને નોકરીના કારણે અલગ નિવાસસ્થાને રહેતી હતી. પરિવારને આશા હતી કે વિધિ અભ્યાસ પૂર્ણ કરીને સફળ કારકિર્દી બનાવશે અને પરિવારનું નામ રોશન કરશે.
પરંતુ આ તમામ સપનાઓ અધૂરા રહી ગયા અને એક આશાસ્પદ યુવતીની જીવનયાત્રા કરૂણ રીતે પૂર્ણ થઈ ગઈ.
હત્યાના કેસમાં આરોપીની ધરપકડ
કેનેડા પોલીસે આ હત્યા કેસમાં ઝડપી કાર્યવાહી કરીને 40 વર્ષીય જોશુઆ સેંટ ઓમર (Joshua St. Omer) નામના આરોપીની ધરપકડ કરી હોવાનું જાણવા મળ્યું છે.
હાલ કેસની તપાસ ચાલુ છે અને સ્થાનિક ભારતીય સમુદાય સહિત વિધિના પરિવારજનો આરોપીને કડકમાં કડક સજા મળે તેવી માંગ કરી રહ્યા છે. પરિવારનું કહેવું છે કે વિધિને ન્યાય મળે અને ભવિષ્યમાં અન્ય કોઈ ભારતીય વિદ્યાર્થી આવી દુર્ઘટનાનો ભોગ ન બને તે માટે કેસમાં કડક કાર્યવાહી થવી જોઈએ.
આ પણ વાંચો: સુરતના સરથાણા ઝૂમાં વાઘ પર પથ્થરમારાનો વીડિયો સામે આવતા મચ્યો હડકંપ! : પ્રાણીઓની સુરક્ષા સામે ઉઠ્યાં સવાલ, વિકૃત પથ્થરબાજ સામે લોકોમાં આક્રોશ
સમગ્ર પંથકમાં ન્યાયની માંગ
વિધિના અંતિમ સંસ્કાર દરમિયાન સ્થાનિક આગેવાનો, સમાજના આગેવાનો અને મોટી સંખ્યામાં લોકો હાજર રહ્યા હતા. સૌએ વિધિને શ્રદ્ધાંજલિ અર્પણ કરી હતી અને પરિવારને સાંત્વના પાઠવી હતી.
સોશિયલ મીડિયા પર પણ વિધિ માટે ન્યાયની માંગ ઉઠી રહી છે. અનેક લોકોએ કેનેડા સરકાર અને તપાસ એજન્સીઓ સમક્ષ નિષ્પક્ષ તપાસ અને કડક સજાની માંગ કરી છે.
સપનાઓ લઈને વિદેશ ગયેલી બોરસદની આ દીકરી આજે વતનની માટીમાં પંચમહાભૂતમાં વિલીન થઈ ગઈ છે. તેની વિદાય માત્ર પરિવાર માટે જ નહીં, પરંતુ સમગ્ર સમાજ માટે એક કરૂણ અને વ્યથિત કરી નાખે તેવી ઘટના બની છે.
