ભારતીય ક્રિકેટમાં નવા યુગના વિસ્ફોટક બેટ્સમેન તરીકે ઉભરી રહેલા 15 વર્ષીય વૈભવ સૂર્યવંશીએ IPL 2026 માં એવી બેટિંગ કરી છે કે સમગ્ર ક્રિકેટ જગતનું ધ્યાન તેમની તરફ ખેંચાયું છે. રાજસ્થાન રોયલ્સ માટે રમતા આ યુવા બેટ્સમેન હવે IPL ઈતિહાસના સૌથી મોટા સિક્સર રેકોર્ડને તોડવાની દહેલીજ પર પહોંચી ગયા છે. વિશ્વ ક્રિકેટમાં ‘યુનિવર્સ બોસ’ તરીકે જાણીતા ક્રિસ ગેલનો એક સીઝનમાં સૌથી વધુ સિક્સર ફટકારવાનો રેકોર્ડ હવે જોખમમાં દેખાઈ રહ્યો છે.
ક્રિસ ગેલે IPL 2012 દરમિયાન 59 સિક્સર ફટકારીને એવો રેકોર્ડ બનાવ્યો હતો, જે છેલ્લા 14 વર્ષથી અકબંધ રહ્યો છે. IPLના ઈતિહાસમાં કોઈ પણ બેટ્સમેન એક જ સીઝનમાં આટલા સિક્સર ફટકારી શક્યો નથી. પરંતુ હવે વૈભવ સૂર્યવંશીએ માત્ર 13 ઇનિંગ્સમાં જ 53 સિક્સર ફટકારીને ગેલના આ ઐતિહાસિક આંકડાને ગંભીર પડકાર આપ્યો છે.
સિક્સર મારવાની અનોખી સ્ટાઈલ
વૈભવ સૂર્યવંશીની બેટિંગની સૌથી મોટી ખાસિયત તેમની આક્રમકતા છે. તેઓ સિંગલ-ડબલ કરતાં લાંબા શોટ્સ પર વધુ વિશ્વાસ રાખે છે. ઘણી ઇનિંગ્સમાં તેમની બાઉન્ડરી ગણતરી કરતાં સિક્સરની સંખ્યા વધારે રહી છે. ક્રિકેટ નિષ્ણાતો માને છે કે T20 ફોર્મેટમાં આવી નિર્ભય બેટિંગ ખૂબ ઓછા ખેલાડીઓમાં જોવા મળે છે.
આ સીઝનમાં વૈભવે માત્ર રન જ બનાવ્યા નથી, પરંતુ બોલરો પર સતત દબાણ પણ બનાવ્યું છે. પાવરપ્લે હોય કે ડેથ ઓવર્સ, તેની બેટિંગમાં આક્રમકતા સતત જોવા મળી છે. ખાસ કરીને સ્પિનરો સામે તેનો સ્ટ્રાઈક રેટ ચર્ચાનો વિષય બન્યો છે.
આ પણ વાંચો: કોણ છે 4 નવા ચહેરા જેણે પહેલીવાર મળી ટીમ ઇન્ડિયામાં તક? : શું આ ખેલાડીઓ બનશે ભારતનું ભવિષ્ય?
ગેલનો રેકોર્ડ હવે જોખમમાં
વૈભવ સૂર્યવંશી પાસે હજુ એક લીગ મેચ બાકી છે અને રાજસ્થાન રોયલ્સ પ્લેઓફ માટે ક્વોલિફાઈ થઈ ચૂકી હોવાથી તેમને વધુ મેચો રમવાની તક મળશે. હાલ તે 53 સિક્સર સાથે ગેલના 59 સિક્સરના રેકોર્ડથી માત્ર 7 સિક્સર દૂર છે. તેમની હાલની ફોર્મ જોતા ક્રિકેટ ચાહકો અને નિષ્ણાતો માની રહ્યા છે કે આ રેકોર્ડ તૂટી શકે છે.
ક્રિસ ગેલે IPL માં પોતાની વિસ્ફોટક બેટિંગથી અલગ ઓળખ બનાવી હતી. IPL એ જ તેમને “સિક્સર કિંગ” અને “યુનિવર્સ બોસ” જેવી ઓળખ અપાવી. તેમની બેટિંગનો આતંક વર્ષો સુધી બોલરોમાં રહ્યો હતો. હવે વૈભવ સૂર્યવંશીનું નામ એ જ યાદીમાં ઝડપથી સામેલ થઈ રહ્યું છે.
ભારતીય ખેલાડીઓમાં સૌથી આગળ
53 સિક્સર સાથે વૈભવ સૂર્યવંશીએ એક સીઝનમાં સૌથી વધુ સિક્સર ફટકારનાર ભારતીય બેટ્સમેનનો રેકોર્ડ પોતાના નામે કર્યો છે. અગાઉ આ પ્રકારના આંકડા મોટા ભાગે વિદેશી પાવર-હિટર્સના નામે રહ્યા હતા, પરંતુ વૈભવે ભારતીય ક્રિકેટમાં નવી આશા જગાવી છે.
એક સીઝનમાં સૌથી વધુ સિક્સર ફટકારનાર ખેલાડીઓની યાદીમાં ત્રીજા ક્રમે આન્દ્રે રસેલ છે, જેમણે 2019 માં કોલકાતા નાઇટ રાઈડર્સ માટે રમતાં 52 સિક્સર ફટકાર્યા હતા. ચોથા સ્થાને ફરી ક્રિસ ગેલ છે, જેમણે 2013 માં 51 સિક્સર લગાવ્યા હતા. પાંચમા ક્રમે જોસ બટલર છે, જેમણે 2022માં 45 સિક્સર ફટકાર્યા હતા.
આ પણ વાંચો: "દબાણ નહીં, રમતનો આનંદ લો" : અમદાવાદમાં સચિન તેંડુલકરે યુવા ખેલાડીઓને આપ્યો સફળતાનો મંત્ર
ભવિષ્યનો સુપરસ્ટાર?
માત્ર 15 વર્ષની ઉંમરે વૈભવ સૂર્યવંશી જે રીતે વિશ્વસ્તરીય બોલિંગ સામે નિર્ભય બેટિંગ કરી રહ્યા છે, તે ભારતીય ક્રિકેટ માટે અત્યંત સકારાત્મક સંકેત માનવામાં આવે છે. પૂર્વ ક્રિકેટરો માને છે કે જો તેઓ આ જ રીતે સતત પ્રદર્શન કરતા રહેશે, તો ભવિષ્યમાં ભારતીય ટીમ માટે પણ મહત્વપૂર્ણ ખેલાડી બની શકે છે.
તેમની બેટિંગમાં આત્મવિશ્વાસ, ટાઈમિંગ અને લાંબા શોટ્સ રમવાની ક્ષમતા તેમને ખાસ બનાવે છે. IPL 2026 હવે માત્ર એક સીઝન નથી રહી, પરંતુ વૈભવ સૂર્યવંશીના ઉદયની કહાની બની ગઈ છે.
