Vaibhav Sooryavanshi : ભારત A અને શ્રીલંકા A વચ્ચે રમાયેલી ટ્રાય સિરીઝની ફાઇનલ મેચમાં ભારતીય ટીમે શાનદાર જીત મેળવી છે. આ જીતના અસલી હીરો 15 વર્ષના યુવા બેટ્સમેન વૈભવ સૂર્યવંશી રહ્યા છે. વૈભવે મેચમાં એટલી વિસ્ફોટક બેટિંગ કરી કે શ્રીલંકાની ટીમ સંપૂર્ણપણે બેકફૂટ પર આવી ગઈ હતી. મેચ પૂરી થયા બાદ તેમને પ્લેયર ઓફ ધ મેચ જાહેર કરવામાં આવ્યા હતા. આ એવોર્ડ લીધા પછી વૈભવે પોતાની રણનીતિ વિશે વાત કરી હતી અને સાથે જ તેમની ક્ષમતા પર શંકા કરનારા ટીકાકારોને ખૂબ જ મધુર પરંતુ આકરો જવાબ આપ્યો હતો.
ઐતિહાસિક અને વિસ્ફોટક ઇનિંગ
ડાબોડી ઓપનર વૈભવ સૂર્યવંશીએ ફાઇનલ મેચમાં શ્રીલંકા Aના બોલરોની જોરદાર ધુલાઈ કરી હતી. તેણે માત્ર 29 બોલનો સામનો કરીને અદભુત 94 રન ફટકાર્યા હતા. આ તોફાની ઇનિંગ દરમિયાન વૈભવે ઇતિહાસ પણ રચી દીધો હતો. તેણે માત્ર 11 બોલમાં પોતાની અડધી સદી પૂરી કરી લીધી હતી, જે લિસ્ટ A ક્રિકેટના ઇતિહાસમાં સૌથી ઝડપી અડધી સદી છે. તેમની આ શાનદાર રમત જોઈને સ્ટેડિયમમાં હાજર તમામ ક્રિકેટ પ્રેમીઓ મંત્રમુગ્ધ થઈ ગયા હતા.
આ પણ ખાસ વાંચો : ઇંગ્લેન્ડ પ્રવાસ માટે ભારતની ODI ટીમ જાહેર : ગિલ કેપ્ટન, અય્યર વાઇસ કેપ્ટન; વિરાટ-રોહિતને ફરી તક, જાણો પંડ્યાનું શું થયું
પ્રથમ 10 ઓવરની ખાસ રણનીતિ
મેચ પૂરી થયા પછી જ્યારે વૈભવને તેમની આ તોફાની બેટિંગનું રહસ્ય પૂછવામાં આવ્યું, ત્યારે તેણે જણાવ્યું કે તેઓ મેદાન પર એક ખાસ પ્લાન સાથે આવ્યા હતા. વૈભવના જણાવ્યા અનુસાર, તેનો મુખ્ય ઉદ્દેશ્ય મેચની શરૂઆતની પ્રથમ 10 ઓવરનો મહત્તમ લાભ ઉઠાવવાનો હતો. તે શરૂઆતથી જ બોલરો પર દબાણ બનાવવા માંગતો હતો. તેની આ યોજના મેદાન પર સો ટકા સફળ રહી અને તે જે વિચારીને આવ્યો હતો તે પ્રમાણે જ રન બનાવવામાં સફળ રહ્યો હતો.
આ પણ ખાસ વાંચો : ચોગ્ગા-છગ્ગાની રમઝટ બોલાવી શ્રીલંકા સામે વૈભવ વિફર્યો : 11 બોલમાં ફિફ્ટી ફટકારી સૂર્યવંશીએ રચ્યો નવો ઇતિહાસ, 29 બોલમાં 94 રન કરી લીધો શ્રીલંકા સામે બદલો
સિનિયર ટીમની પસંદગી અને દબાણ
હાલમાં જ વૈભવ સૂર્યવંશીની ભારતીય સિનિયર ટીમમાં આયર્લેન્ડ પ્રવાસ માટે પસંદગી કરવામાં આવી છે. મેચ પછી પ્રેઝન્ટેશન સેરેમનીમાં તેને પૂછવામાં આવ્યું કે, શું આ મોટી પસંદગીના કારણે તેમના પર સારું પ્રદર્શન કરવાનું કોઈ વધારાનું દબાણ હતું? આ સવાલનો ખૂબ જ આત્મવિશ્વાસ સાથે જવાબ આપતા વૈભવે કહ્યું કે તેમના પર કોઈ જ પ્રકારનું પ્રેશર નહોતું. તે માત્ર પોતાની યોજનાઓ પર ધ્યાન કેન્દ્રિત કરી રહ્યો હતો જે અગાઉની મેચોમાં કામ નહોતી કરી શકી.
આ પણ ખાસ વાંચો : કોણ છે આ ભારતીય છોકરી જેના પર મોહી પડ્યો RCBનો સ્ટાર ક્રિકેટર? : જાણો ભારતીય હસીના અને ક્રિકેટરની હકીકત
કોચની સલાહ અને નેટ પ્રેક્ટિસ
પોતાની વાતને આગળ વધારતા વૈભવે કોચના યોગદાન અને મહેનતનો ઉલ્લેખ કર્યો હતો. તેણે કહ્યું કે, અગાઉની કેટલીક મેચોમાં જ્યારે તેમની રણનીતિ સફળ નહોતી થઈ રહી, ત્યારે તેણે આ અંગે પોતાના કોચ સાથે વિગતવાર ચર્ચા કરી હતી. ત્યારબાદ તેણે નેટ પ્રેક્ટિસ દરમિયાન પોતાની ભૂલો સુધારવા માટે ખૂબ જ સખત મહેનત કરી હતી. આજે ફાઇનલના મહાજંગમાં તે તમામ મહેનત અને રણનીતિ કામ આવી ગઈ અને તેનું પરિણામ આજે આખી દુનિયાની સામે છે.
ટીકાકારોને હસતા મુખે આપ્યો જવાબ
વૈભવ સૂર્યવંશીને સામાન્ય રીતે માત્ર ટૂંકા ફોર્મેટ એટલે કે T20ના ખેલાડી ગણવામાં આવે છે. ઘણા ટીકાકારો વનડે એટલે કે 50 ઓવરના ફોર્મેટમાં રમવાની તેમની ક્ષમતા પર સવાલો ઉઠાવી રહ્યા હતા. આ બાબતે વૈભવે હસતા હસતા જવાબ આપ્યો કે, તેણે પોતાના જીવનમાં ઘણી બધી 50 ઓવરની મેચો રમી છે, પરંતુ કદાચ લોકોને આ વાતની ખબર નથી. અલગ-અલગ દેશોની પરિસ્થિતિઓ અને પિચ અલગ હોય છે, જેથી ત્યાં રમવું થોડું મુશ્કેલ બને છે. પરંતુ આ સિરીઝ તેમના માટે ખૂબ જ શાનદાર રહી અને તેમને ઘણું શીખવા મળ્યું.
