વડોદરા: ગુજરાતની વિવિધ મહાનગરપાલિકાઓમાં ચૂંટણી પરિણામો જાહેર થયા બાદ હવે નવા પદાધિકારીઓની પસંદગીની પ્રક્રિયા તેજ બની છે. સ્થાનિક સ્વરાજ્યની ચૂંટણીને લગભગ એક મહિનો પૂર્ણ થવા આવ્યો છે ત્યારે ભાજપ દ્વારા રાજ્યની અનેક મહાનગરપાલિકાઓમાં મેયર, ડેપ્યુટી મેયર અને સ્ટેન્ડિંગ કમિટીના ચેરમેનના નામોની જાહેરાત શરૂ કરવામાં આવી છે. રાજકીય વર્તુળોમાં લાંબા સમયથી ચાલી રહેલી અટકળો વચ્ચે આજે વડોદરા મહાનગરપાલિકાના નવા હોદ્દેદારોના નામ જાહેર કરવામાં આવ્યા છે.
વડોદરા મનપામાં આ વખતે મહિલા નેતૃત્વને પ્રાધાન્ય આપવામાં આવ્યું છે. ભાજપે ગીતા મકવાણાને શહેરના નવા મેયર તરીકે પસંદ કરી મહિલા સશક્તિકરણનો સંદેશ આપ્યો છે. સાથે જ આદિત્ય પટેલને ડેપ્યુટી મેયર અને વર્ષાબહેન વ્યાસને સ્ટેન્ડિંગ કમિટીના ચેરમેન તરીકે મહત્વપૂર્ણ જવાબદારી સોંપવામાં આવી છે.
વડોદરા મનપામાં મહિલા નેતૃત્વ પર ભાજપનો વિશ્વાસ
વડોદરા મહાનગરપાલિકામાં ભાજપે મહિલા નેતૃત્વ પર વિશ્વાસ વ્યક્ત કરતાં ગીતા મકવાણાને મેયર પદે પસંદ કર્યા છે. શહેરના પ્રથમ નાગરિક તરીકે હવે ગીતા મકવાણા આગામી અઢી વર્ષ સુધી શહેરના વિકાસ અને નગરવ્યવસ્થાના અનેક મહત્વપૂર્ણ નિર્ણયો સંભાળશે. રાજકીય નિષ્ણાતોનું માનવું છે કે મહિલા મેયરની પસંદગી દ્વારા ભાજપે શહેરમાં મહિલા પ્રતિનિધિત્વને વધુ મજબૂત કરવાનો પ્રયાસ કર્યો છે.
આદિત્ય પટેલ બન્યા ડેપ્યુટી મેયર, વર્ષાબહેન વ્યાસને સ્ટેન્ડિંગ કમિટીની જવાબદારી
મેયર પદ સાથે જ વડોદરા મનપામાં આદિત્ય પટેલને ડેપ્યુટી મેયર તરીકે પસંદ કરવામાં આવ્યા છે. જ્યારે વર્ષાબહેન વ્યાસને સ્ટેન્ડિંગ કમિટીના ચેરમેન તરીકે જવાબદારી સોંપવામાં આવી છે.
પ્રદેશ ભાજપ તરફથી મંજૂરી મળ્યા બાદ આ નામોની સત્તાવાર જાહેરાત કરવામાં આવી હતી. હવે આ નવી ટીમ આગામી અઢી વર્ષ દરમિયાન શહેરના વિકાસકાર્યો, નગરસેવાઓ અને વહીવટી નિર્ણયોમાં મહત્વપૂર્ણ ભૂમિકા ભજવશે.
આ પણ વાંચો: ચૂંટણીના એક મહિના બાદ 7 મનપાને મળશે નવા મેયર: આજે થશે નામોની જાહેરાત
કેબિનથી મેયરની ખુરશી સુધીની ભાવુક સફર
આ સમગ્ર જાહેરાતમાં સૌથી વધુ આકર્ષણ અને ચર્ચાનું કેન્દ્ર નવા મેયર ગીતાબેન મકવાણા બન્યા છે. અત્યંત સામાન્ય પરિવારમાંથી આવતા ગીતાબેન પોતાના ઘરની બહાર એક નાનકડી કેબિન ચલાવીને પરચુરણ ચીજવસ્તુઓ વેચે છે. એક સામાન્ય કેબિન ચલાવતા મહિલાને સીધા જ વડોદરા શહેરના પ્રથમ નાગરિક એટલે કે મેયર જેવું સર્વોચ્ચ પદ સોંપીને પક્ષે પાયાના કાર્યકરોની કદર કરવાનો મોટો સંદેશ આપ્યો છે. ગઈકાલ સુધી સામાન્ય કેબિનમાં બેસતા ગીતાબેન મકવાણા હવે પાલિકાની ભવ્ય મેયરની કેબિનમાં બેસીને વડોદરાના વિકાસ કાર્યોનો પદભાર સંભાળશે. આ જાહેરાત બાદ તેમના પરિવાર અને સમર્થકોમાં ભારે ખુશી અને ગર્વનો માહોલ જોવા મળી રહ્યો છે. વડોદરાના ઇતિહાસમાં નારી સશક્તિકરણનું આ એક ઉત્કૃષ્ટ અને પ્રેરણાદાયી ઉદાહરણ સાબિત થશે.
રાજ્યની અન્ય મનપાઓમાં પણ પદાધિકારીઓની જાહેરાત
આ પહેલા 26 મેના રોજ અમદાવાદ, જામનગર, મોરબી, ગાંધીધામ, નડિયાદ, નવસારી, પોરબંદર અને મહેસાણા સહિત કુલ આઠ મહાનગરપાલિકાઓમાં મેયર, ડેપ્યુટી મેયર અને અન્ય પદાધિકારીઓના નામ જાહેર કરવામાં આવ્યા હતા. આજે વડોદરા ઉપરાંત સુરત, રાજકોટ, ભાવનગર, આણંદ, વલસાડ-વાપી અને સુરેન્દ્રનગર મહાનગરપાલિકાઓમાં પણ નવા હોદ્દેદારોના નામ જાહેર થવાના કારણે રાજ્યભરના રાજકીય વર્તુળોમાં ભારે ઉત્સુકતા જોવા મળી રહી છે.
શહેરના વિકાસ પર રહેશે નવી ટીમની કસોટી
વડોદરા શહેરમાં ઇન્ફ્રાસ્ટ્રક્ચર, ટ્રાફિક, સફાઈ, પાણી પુરવઠો અને નાગરિક સુવિધાઓ જેવા અનેક મુદ્દાઓ પડકારરૂપ છે. આવી સ્થિતિમાં નવી ટીમ માટે આગામી અઢી વર્ષ વિકાસ અને જનઅપેક્ષાઓ પૂર્ણ કરવાની મોટી કસોટી સમાન રહેશે.
