યુએસ પ્રમુખ ડોનાલ્ડ ટ્રમ્પના વહીવટીતંત્રે રશિયા પાસેથી મોટા પ્રમાણમાં તેલ ખરીદવા બદલ ભારત પર 50 ટકા ટેરિફ લાદવાનો નિર્ણય કર્યો છે. આ નિર્ણય 27 ઓગસ્ટથી અમલમાં આવશે.
ભારત પર કડક કાર્યવાહી કેમ?
યુએસ નાણામંત્રી સ્કોટ બેસન્ટે સીએનબીસી સાથે વાતચીતમાં જણાવ્યું કે ભારત રશિયા પાસેથી સસ્તું તેલ ખરીદી તેને શુદ્ધિકરણ પછી ફરીથી વેચીને ભારે નફો કમાઈ રહ્યું છે.
પહેલા ભારત રશિયાથી પોતાની જરૂરિયાતનું 1%થી પણ ઓછું તેલ લેતું હતું.
પરંતુ રશિયા-યુક્રેન યુદ્ધ બાદ હવે ભારતની કુલ તેલ આયાતમાં 42% હિસ્સો રશિયાથી આવે છે.
આ વેપારથી ભારતમાં કેટલાક ધનિક પરિવારોને મોટો લાભ થઈ રહ્યો છે અને અત્યાર સુધી ભારતે 16 અબજ ડોલરથી વધુ કમાણી કરી છે.
ચીન માટે શા માટે નરમાઈ?
બેસન્ટના જણાવ્યા મુજબ, ચીન યુદ્ધ પહેલા તેની તેલ જરૂરિયાતનું 13% રશિયાથી લેતું હતું, જે હવે વધીને 16% થયું છે. પરંતુ બેઇજિંગ વિવિધ દેશોમાંથી તેલ આયાત કરે છે, તેથી તેની સ્થિતિ અલગ ગણાઈ છે.
ભારત પર 50% ટેરિફ લાદવામાં આવ્યો છે.
જ્યારે ચીન માટે આ દર 30% રાખવામાં આવ્યો છે.
રશિયાનો પ્રતિસાદ
અમેરિકાના આ નિર્ણય પછી રશિયાએ ભારતને ટેકો આપ્યો છે. મોસ્કોએ વોશિંગ્ટનને ચેતવણી આપી છે કે દરેક દેશને પોતાના વેપારી ભાગીદાર પસંદ કરવાનો અધિકાર છે, અને અમેરિકા અન્ય દેશોના આંતરિક વેપાર સંબંધોમાં દખલ ન કરે.
ભારત માટે પડકાર
ટેરિફ લાગવાથી ભારતની એનર્જી કૉસ્ટ વધી શકે છે. હાલ ભારતનો મોટો હિસ્સો રશિયન તેલ પર આધારિત છે, જેને કારણે સ્થાનિક ઈંધણના ભાવો તથા નિકાસ પર પણ અસર થવાની શક્યતા છે.
