ન્યૂયોર્ક, વૉશિંગટન, શિકાગોમાં ટ્રમ્પ વિરૂદ્ધ લોકોમાં આક્રોશ : હજારો લોકો જોડાયા વિરોધમાં

અમેરિકામાં રાષ્ટ્રપતિ ડોનાલ્ડ ટ્રમ્પની નીતિઓ સામે મોટા પાયે વિરોધ પ્રદર્શન થઈ રહ્યા છે. વિરોધીઓનું કહેવું છે કે તેઓ લોકોના વધતા ગુસ્સાને મોટા પાયાના આંદોલનમાં ફેરવવા માગે છે. શનિવારે (19 એપ્રિલ) હજારો લોકો રાષ્ટ્રપતિ ટ્રમ્પની નીતિઓનો વિરોધ કરવા રેલીઓ અને માર્ચમાં એકઠા થયા હતા. જોકે, આ વખતે ન્યૂયોર્ક, વોશિંગ્ટન અને શિકાગો જેવા શહેરોમાં 5 એપ્રિલે યોજાયેલા પ્રદર્શનની સરખામણીમાં ભીડ ઓછી હતી.

ન્યૂયોર્ક ટાઈમ્સના અહેવાલ મુજબ, જેક્સનવિલે (ફ્લોરિડા)થી લોસ એન્જલસ સુધી દેશભરમાં લગભગ 400 રેલીનું આયોજન કરવામાં આવ્યું હતું. વિરોધીઓએ ફેડરલ જોબમાં કાપ, આર્થિક નીતિઓ અને નાગરિક સ્વતંત્રતાના ઉલ્લંઘન વિશે ચિંતા વ્યક્ત કરી હતી. તેમણે રાષ્ટ્રપતિ ટ્રમ્પ પર કાયદાના શાસનને નબળી પાડવા અને સામાન્ય નાગરિકોના અધિકારોને દબાવવાનો આરોપ લગાવ્યો. રિપોર્ટ અનુસાર, 20 જાન્યુઆરીએ ડોનાલ્ડ ટ્રમ્પ પ્રમુખ બન્યા બાદ આ ગ્રુપ દ્વારા આ ચોથું મોટું પ્રદર્શન છે. આ પહેલા 17 ફેબ્રુઆરીએ 'નાઈન કિંગ્સ ડે' વિરોધ પ્રદર્શન કરવામાં આવ્યું હતું. જ્યારે ટ્રમ્પે સોશિયલ મીડિયા પર પોતાને રાજા ગણાવ્યા ત્યારે આ વાત વધુ મહત્વની બની ગઈ.

શું છે આંદોલનકારીઓની માગ?
પ્રદર્શનકારીઓ ઇચ્છે છે કે ટ્રમ્પ સરકારના તાનાશાહી વલણથી દેશની લોકશાહી બચાવવામાં આવે. જૂથના પ્રવક્તા હીથર ડને કહ્યું કે તે શાંતિપૂર્ણ વિરોધ છે અને તેનો હેતુ કોઈને નુકસાન પહોંચાડવાનો નથી. તેનો હેતુ દેશને એક કરવાનો અને બંધારણની રક્ષા કરવાનો છે. તેમણે કહ્યું કે ડેમોક્રેટ્સ, સ્વતંત્ર અને રિપબ્લિકન જેવી વિવિધ વિચારધારા ધરાવતા લોકો પણ આ આંદોલનમાં સાથે આવી રહ્યા છે. દરેકનું એક જ સપનું છે - એક પ્રામાણિક સરકાર જે લોકોના કલ્યાણને પ્રથમ સ્થાન આપે છે.

લોકો કઈ બાબતોથી ચિંતિત છે?
અમેરિકી રાષ્ટ્રપતિ ડોનાલ્ડ ટ્રમ્પની સરકાર વિરુદ્ધ વિરોધ પ્રદર્શનના ઘણા કારણો સામે આવ્યા છે. તેમની ટેરિફ નીતિઓએ અર્થવ્યવસ્થા પર નકારાત્મક અસર કરી છે, જેના કારણે શેરબજારમાં ઘટાડો થયો છે અને બેરોજગારી વધી છે. સરકારી નોકરીઓમાં છટણી, માનવ અધિકારો પરના પ્રશ્નો અને અભિવ્યક્તિની સ્વતંત્રતા પરના નિયંત્રણો પણ લોકોના રોષનું કારણ બન્યા છે.