શું ફરી અમેરિકા જશે પીએમ મોદી? : રાષ્ટ્રપતિ બન્યા પછી પીએમ મોદી સાથે પ્રથમ વાતચીત

પ્રધાનમંત્રી નરેન્દ્ર મોદીને વ્હાઇટ હાઉસમાંથી ફોન આવ્યો છે. અમેરિકી રાષ્ટ્રપતિ ડોનાલ્ડ ટ્રમ્પે તેમને આમંત્રણ મોકલ્યું છે. ગત સપ્તાહે રાષ્ટ્રપતિ પદના શપથ લીધા બાદ ટ્રમ્પે પ્રથમ વખત પીએમ મોદી સાથે વાત કરી. 27 જાન્યુઆરીએ વાતચીતમાં પીએમ મોદીના અમેરિકાના પ્રવાસ અંગે યોજનાઓ બનાવવામાં આવી. વ્હાઇટ હાઉસના નિવેદનમાં આ વાત સામે આવી છે. કહેવામાં આવ્યું છે કે રાષ્ટ્રપતિ ટ્રમ્પ અને પીએમ મોદી વચ્ચે બંને દેશોની મિત્રતા અને વ્યૂહાત્મક સંબંધોની મજબૂતી સાથે જોડાયેલા ઘણા મુદ્દાઓ પર ચર્ચા થઈ હતી. આ દરમિયાન પીએમ મોદીની વ્હાઇટ હાઉસ જવાની યોજના અંગે પણ ચર્ચા કરવામાં આવી હતી.

અમેરિકી રાષ્ટ્રપતિ ડોનાલ્ડ ટ્રમ્પ અને પીએમ મોદી વચ્ચે હંમેશા સારો તાલમેલ રહ્યો છે. તેમના પ્રથમ કાર્યકાળ દરમિયાન, ટ્રમ્પે જાહેર મંચ પર પીએમ મોદીની ઘણી વખત પ્રશંસા કરી હતી. મોદી ટ્રમ્પના આમંત્રણ પર અગાઉ અમેરિકા જઈ ચૂક્યા છે, જ્યારે પીએમ મોદીએ ભારતમાં ટ્રમ્પની રેલીનું પણ આયોજન કર્યું હતુ.

બંને નેતાઓએ આ મુદ્દે ચર્ચા કરી હતી
વ્હાઇટ હાઉસ દ્વારા જારી કરાયેલા નિવેદન અનુસાર, અમેરિકી રાષ્ટ્રપતિ ડોનાલ્ડ ટ્રમ્પ અને વડાપ્રધાન મોદી વચ્ચે બંને દેશો વચ્ચે પરસ્પર સહયોગ વધારવા અને ગાઢ બનાવવા પર ચર્ચા થઈ હતી. ઈન્ડો-પેસિફિક, મિડલ ઈસ્ટ અને યુરોપમાં શાંતિ અને સુરક્ષા સહિત અનેક પ્રાદેશિક મુદ્દાઓ પર પણ ચર્ચા થઈ હતી. આ દરમિયાન રાષ્ટ્રપતિ ટ્રમ્પે ભારત દ્વારા અમેરિકન નિર્મિત સુરક્ષા ઉપકરણોની ખરીદી વધારવા પર ભાર મૂક્યો હતો. તેમણે બંને દેશો વચ્ચે વેપાર સંબંધો વિશે પણ વાત કરી. બંને નેતાઓએ યુએસ-ઈન્ડિયા વ્યૂહાત્મક ભાગીદારી અને ઈન્ડો-પેસિફિક ક્વોડ પાર્ટનરશિપને આગળ વધારવા માટે તેમની પ્રતિબદ્ધતાનો પુનરોચ્ચાર કર્યો.

આ વાતચીતનો સાર શું છે?
ભારત અને અમેરિકા વચ્ચેના સંબંધો દરેક બાબતમાં ખુબ સારા છે . બંને દેશો સતત તેમના સહયોગ અને વ્યૂહાત્મક સંબંધોને ગાઢ બનાવી રહ્યા છે અને આગળ પણ કરતા રહેશે, પરંતુ સોમવારે થયેલી વાતચીતમાં ભારત માટે બે ચેતવણી છુપાયેલી છે. વ્હાઇટ હાઉસ દ્વારા જારી કરવામાં આવેલા નિવેદનમાં કહેવામાં આવ્યું છે કે ટ્રમ્પે પીએમ મોદીને અમેરિકામાં બનેલા હથિયારો ખરીદવાનો આગ્રહ કર્યો છે અને બંને દેશો વચ્ચે વાજબી વેપારની વાત પણ કરી છે. એટલે કે ટ્રમ્પ ઇચ્છે છે કે ભારત સુરક્ષા સંબંધિત મોટા ભાગના હથિયારો અમેરિકા પાસેથી જ ખરીદે. આપને જણાવી દઈએ કે ભારત હંમેશા રશિયા પાસેથી મોટા પ્રમાણમાં હથિયાર ખરીદે છે. ફ્રાન્સ પાસેથી રાફેલ જેવા ફાઈટર પ્લેન પણ ખરીદ્યા છે. જો કે ભારત સંરક્ષણ ક્ષેત્રે પણ અમેરિકા પાસેથી ઘણી ખરીદી કરે છે, પરંતુ ટ્રમ્પ ઈચ્છે છે કે હવે આ ખરીદીનું પ્રમાણ વધવું જોઈએ.

બીજું, આ વાતચીતમાં ટ્રમ્પે એ વાત પર વધુ ભાર મૂક્યો હતો કે બંને દેશો વચ્ચે વાજબી વેપાર હોવો જોઈએ, એટલે કે અગાઉના કાર્યકાળની જેમ ટ્રમ્પ પણ ઈચ્છે છે કે ભારત અમેરિકન ઉત્પાદનો પરની ઈમ્પોર્ટ ડ્યૂટી ઘટાડે. ટ્રમ્પ હંમેશા કહેતા આવ્યા છે કે અમેરિકામાં ભારતથી આવતા ઉત્પાદનો પર નજીવી આયાત ડ્યુટી લગાવે છે, પરંતુ ભારતમાં અમેરિકન ઉત્પાદનો પર ખૂબ જ ઊંચો ટેક્સ છે. તેમનો અભિપ્રાય છે કે આ પ્રકારનો વેપાર વાજબી નથી.