US-Iran tensions: અમેરિકી રાષ્ટ્રપતિ ડોનાલ્ડ ટ્રમ્પએ ઈરાન વિરુદ્ધ ફરી એકવાર અત્યંત કડક અને આક્રમક નિવેદન આપ્યું છે. ન્યૂઝનેશનના કાર્યક્રમ "કેટી પેવલિચ ટુનાઇટ"માં આપેલી મુલાકાતમાં ટ્રમ્પે કહ્યું, "જો ઈરાન મારી હત્યાનો પ્રયાસ કરશે, તો અમે ઈરાનને વિશ્વના નકશા પરથી ભૂંસી નાખીશું. મેં મારા અધિકારીઓને સ્પષ્ટ સૂચના આપી છે કે આવું થશે તો તેઓ તેને સંપૂર્ણપણે નાશ કરી નાખશે."આ નિવેદન એવા સમયે આવ્યું છે જ્યારે ઈરાન અને અમેરિકા વચ્ચે તણાવ ચરમસીમાએ પહોંચી ગયો છે.
ખામેનીને "બીમાર માણસ" કહ્યા
ડિસેમ્બરના અંતથી ઈરાનમાં ચાલી રહેલા વ્યાપક વિરોધ પ્રદર્શનો, અર્થવ્યવસ્થાની બગડતી સ્થિતિ અને સરકારી દમનને કારણે પરિસ્થિતિ વધુ વિસ્ફોટક બની છે. ટ્રમ્પે ઈરાનના સર્વોચ્ચ નેતા આયાતુલ્લાહ અલી ખામેનીને "બીમાર માણસ" કહ્યા
પોલિટિકોને આપેલા ઇન્ટરવ્યુમાં ટ્રમ્પે ખામેનીને "એક બીમાર માણસ" તરીકે વર્ણવ્યા હતા અને કહ્યું હતું કે,
"તેમણે પોતાના દેશને યોગ્ય રીતે ચલાવવો જોઈએ અને લોકોની હત્યા બંધ કરવી જોઈએ. ઈરાનને નવા નેતૃત્વની જરૂર છે." તેમણે ઈરાનને "વિશ્વનું સૌથી ખરાબ જીવવાનું સ્થળ" પણ ગણાવ્યું હતું.
ઈરાનનો તીક્ષ્ણ જવાબ
ટ્રમ્પના આ નિવેદનોના જવાબમાં ઈરાની લશ્કરી પ્રવક્તા જનરલ અબુલફઝલ શેકાર્ચીએ કડક પ્રતિક્રિયા આપી છે. તેમણે કહ્યું,
"ટ્રમ્પ જાણે છે કે જો કોઈ અમારા સર્વોચ્ચ નેતા આયાતુલ્લાહ ખામેની તરફ ખરાબ ઈરાદાથી હાથ લંબાવશે, તો અમે ફક્ત તે હાથ કાપી નાખીશું નહીં, પરંતુ તેમના સમગ્ર વિશ્વને આગ લગાવી દઈશું."આ સાથે ઈરાની સૈન્ય ગતિવિધિઓમાં વધારો, વિરોધ પ્રદર્શનોનું દમન અને અમેરિકી સૈન્યની હિલચાલને કારણે મધ્ય પૂર્વમાં તણાવ વધુ ગંભીર બન્યો છે. બંને દેશો વચ્ચે સીધો સંઘર્ષની શક્યતા વધી રહી છે. આ પરિસ્થિતિ પર વિશ્વની નજર ટકેલી છે.
