અમેરિકા અને ઈરાન વચ્ચે ફરી એકવાર વધેલા સૈન્ય તણાવની સીધી અસર વૈશ્વિક નાણાકીય બજારો પર જોવા મળી રહી છે. પશ્ચિમ એશિયામાં વધી રહેલી અનિશ્ચિતતાના કારણે રોકાણકારો જોખમી સંપત્તિમાંથી બહાર નીકળતા જોવા મળ્યા છે, જેના કારણે શેરબજારથી લઈને કોમોડિટી અને કરન્સી માર્કેટ સુધી દબાણ સર્જાયું છે. વૈશ્વિક સ્તરે જોખમ વધતાં ભારત સહિત અનેક ઉભરતાં બજારોમાં વેચવાલીનું દબાણ વધ્યું છે.
ભારતીય શેરબજારે પણ દિવસની શરૂઆત નબળી નોંધાવી હતી. સેન્સેક્સ અને નિફ્ટી બંનેમાં શરૂઆતથી જ ઘટાડો જોવા મળ્યો, જ્યારે બજારના મોટા ભાગના સેક્ટરો લાલ નિશાનમાં ટ્રેડ થતા જોવા મળ્યા. રોકાણકારોની સંપત્તિમાં પણ નોંધપાત્ર ઘટાડો નોંધાયો હતો. વૈશ્વિક અસ્થિરતા, વધતા ક્રૂડ ઓઈલ ભાવ અને વિદેશી રોકાણકારોની સાવચેતીના કારણે બજારમાં નકારાત્મક માહોલ સર્જાયો છે.
સેન્સેક્સ અને નિફ્ટીમાં વેચવાલીનું દબાણ
બજાર ખુલતા જ સેન્સેક્સમાં સેકડો પોઈન્ટનો ઘટાડો નોંધાયો હતો. દિવસ દરમિયાન વેચવાલી વધતાં સૂચકાંક વધુ નીચલા સ્તરે પહોંચ્યો હતો. નિફ્ટી પણ 23 હજારના સ્તર નજીક દબાણ હેઠળ જોવા મળ્યો હતો. બજાર નિષ્ણાતોનું માનવું છે કે હાલ રોકાણકારો વૈશ્વિક ઘટનાઓ પર વધુ ધ્યાન કેન્દ્રિત કરી રહ્યા છે અને જોખમ ઘટાડવા માટે નફાવસૂલી કરી રહ્યા છે. ખાસ કરીને આઈટી, નાણાકીય સેવાઓ અને કેટલાક મોટા લાર્જ-કેપ શેરોમાં વેચવાલી વધુ જોવા મળી હતી. વૈશ્વિક અર્થતંત્ર સામે ઊભા થતા પડકારો અને ઊંચા વ્યાજદર અંગેની ચિંતાઓએ પણ બજારની ભાવનાને અસર પહોંચાડી છે.
આ પણ વાંચો: સસ્તું થશે પેટ્રોલ! : કેન્દ્ર સરકારનો મોટો નિર્ણય, ઈથેનોલવાળા પેટ્રોલ પર હવે નહીં લાગે એક્સાઈઝ ડ્યુટી
સોના-ચાંદીમાં ભારે અસ્થિરતા
સામાન્ય રીતે ભૂરાજકીય તણાવ દરમિયાન સોનું અને ચાંદી સુરક્ષિત રોકાણ તરીકે જોવામાં આવે છે, પરંતુ હાલના બજારમાં ભારે વોલેટિલિટી જોવા મળી રહી છે. વાયદા બજારમાં સોના અને ચાંદી બંનેમાં શરૂઆતમાં નોંધપાત્ર ઘટાડો જોવા મળ્યો હતો. દિવસ દરમિયાન રોકાણકારોની ખરીદી અને નફાવસૂલીના કારણે ભાવોમાં સતત ચઢાવ-ઉતાર નોંધાયા હતા.
બજાર વિશ્લેષકોના મતે, સોનાના લાંબા ગાળાના વલણ પર હજુ પણ વૈશ્વિક અનિશ્ચિતતાનો ટેકો છે, પરંતુ ટૂંકા ગાળામાં નફાવસૂલી અને ડોલરની મજબૂતીના કારણે ભાવોમાં ભારે હલચલ જોવા મળી શકે છે. ચાંદીમાં તો સામાન્ય રીતે સોનાની તુલનામાં વધુ વોલેટિલિટી જોવા મળે છે અને હાલની સ્થિતિ પણ તે જ દર્શાવે છે.
આ પણ વાંચો: નોકરિયાતો માટે મોટા બદલાવની તૈયારી! : PF ઉપાડ બનશે વધુ સરળ, શું રહશે EPFO નો નવો નિયમ?
ક્રૂડ ઓઈલમાં તેજીથી ભારત માટે ચિંતાના વાદળ
બજારો માટે સૌથી મોટી ચિંતા ક્રૂડ ઓઈલના વધતા ભાવ છે. અમેરિકા-ઈરાન તણાવ વચ્ચે વૈશ્વિક પુરવઠા પર અસર થવાની ભીતિ વધી છે. ખાસ કરીને હોર્મુઝ જળમાર્ગ સંબંધિત ચિંતાઓના કારણે બ્રેન્ટ ક્રૂડના ભાવ 95 ડોલર પ્રતિ બેરલની આસપાસ પહોંચી ગયા છે.
ભારત પોતાની જરૂરિયાતનું મોટું પ્રમાણ આયાતી ક્રૂડથી પૂર્ણ કરે છે. તેથી ક્રૂડ ઓઈલના ભાવમાં વધારો સીધી રીતે આયાત બિલ, મોંઘવારી અને ચલણ પર અસર કરે છે. જો આ ભાવ લાંબા સમય સુધી ઊંચા રહે તો પેટ્રોલ-ડીઝલના ખર્ચથી લઈને પરિવહન અને ઉત્પાદન ખર્ચમાં વધારો થઈ શકે છે.
આ પણ વાંચો: 20 મહિનાનું એરિયર, 53 લાખ સુધીની ચૂકવણીની ચર્ચા : 8મા વેતન પંચને લઈને સરકારી કર્મચારીઓમાં ભારે ઉત્સાહ
રૂપિયો પણ દબાણ હેઠળ
વૈશ્વિક અનિશ્ચિતતા વચ્ચે અમેરિકન ડોલરમાં માંગ વધતાં ભારતીય રૂપિયો પણ દબાણમાં જોવા મળ્યો હતો. ડોલરની સામે રૂપિયાની નબળાઈ ભારત માટે ખાસ મહત્વ ધરાવે છે કારણ કે તે આયાતને વધુ મોંઘી બનાવે છે. ક્રૂડ ઓઈલના ઊંચા ભાવ અને રૂપિયાની નબળાઈનું સંયોજન મોંઘવારી માટે પડકારરૂપ બની શકે છે. અર્થશાસ્ત્રીઓના મતે, જો પશ્ચિમ એશિયામાં તણાવ વધુ વધે અને ક્રૂડ ઓઈલના ભાવમાં વધુ ઉછાળો આવે તો ભારતીય અર્થતંત્ર સામે મોંઘવારી, વેપાર ખાધ અને ચલણ સંબંધિત દબાણ વધવાની શક્યતા રહેશે.
ભારતીય રોકાણકારો માટે હાલનો સમય સાવચેતીપૂર્વકના નિર્ણયનો ગણાય છે, કારણ કે વૈશ્વિક ભૂરાજકીય ઘટનાઓ આગામી દિવસોમાં બજારની દિશા નક્કી કરવામાં મહત્વની ભૂમિકા ભજવી શકે છે.
