UPI AutoPay: યુપીઆઈ (UPI) યુઝર્સ માટે ટૂંક સમયમાં એક મોટી અને ઉપયોગી સુવિધા આવવાની છે. હવે અલગ-અલગ યુપીઆઈ એપ્સ પર કરવામાં આવેલા ઓટોપે (AutoPay) પેમેન્ટને ટ્રેક કરવું સરળ બની જશે. નેશનલ પેમેન્ટ્સ કોર્પોરેશન ઓફ ઇન્ડિયા (NPCI) એક નવું ફીચર તૈયાર કરી રહ્યું છે, જેની મદદથી ગ્રાહકો પોતાના તમામ યુપીઆઈ ઓટોપે (ઈ-મેન્ડેટ) એક જ જગ્યાએ જોઈ શકશે. આનાથી માત્ર પેમેન્ટ મેનેજમેન્ટ જ સરળ નહીં થાય, પરંતુ અજાણતા થતા ડબલ પેમેન્ટ અને ચૂકી ગયેલા પેમેન્ટ જેવી સમસ્યાઓમાંથી પણ રાહત મળશે.
‘ઈથેનોલવાળું પેટ્રોલ સંપૂર્ણ સુરક્ષિત’ : સોશિયલ મીડિયા પર વાયરલ દાવાઓ વચ્ચે કેન્દ્ર સરકારની સ્પષ્ટતા
તમામ ઓટોપે એક જ જગ્યાએ દેખાશે
અત્યાર સુધી જો કોઈ વ્યક્તિએ વીજળીનું બિલ, પાણીનું બિલ, OTT સબ્સ્ક્રિપ્શન કે લોનની EMI માટે અલગ-અલગ UPI એપ્સ પર ઓટોપે સેટ કર્યું હોય, તો તેણે દરેક પેમેન્ટની વિગતો જોવા માટે તે જ ચોક્કસ એપ પર જવું પડતું હતું. નવું ફીચર આવ્યા બાદ આ મુશ્કેલી ખતમ થઈ જશે. ગ્રાહકો પોતાના તમામ એક્ટિવ ઈ-મેન્ડેટ કોઈપણ એક UPI એપ પર જોઈ શકશે, ભલે તે ગમે તે એપ દ્વારા સેટ કરવામાં આવ્યા હોય.
NPCI એ કંપનીઓને આપ્યા નિર્દેશ
આ સુવિધાને લાગુ કરવા માટે NPCI એ પેમેન્ટ સર્વિસ પ્રોવાઇડર કંપનીઓને તેમના નેટવર્કમાં જરૂરી ટેકનિકલ ફેરફારો કરવાના નિર્દેશ આપ્યા છે. આનો ઉદ્દેશ્ય એ સુનિશ્ચિત કરવાનો છે કે અલગ-અલગ UPI પ્લેટફોર્મ પર રહેલી ઓટોપે પેમેન્ટની માહિતી એક જ જગ્યાએ ઉપલબ્ધ થઈ શકે.
સામાન્ય જનતાને મોટી રાહત! : LPGને લઈને આવ્યા મોટા સમાચાર, હવે ગેસની અછત નહીં સર્જાય
ડબલ પેમેન્ટની સમસ્યામાંથી મળશે રાહત
નવી સિસ્ટમ દ્વારા યુઝર્સ સરળતાથી જોઈ શકશે કે તેમના ખાતામાંથી કયા-કયા ઓટોપે પેમેન્ટ એક્ટિવ છે અને કઈ સર્વિસ માટે રકમ કપાઈ રહી છે. આનાથી ફાઇનાન્સિયલ મેનેજમેન્ટ પહેલા કરતા વધુ સરળ થઈ જશે. સાથે જ, કોઈ સર્વિસ માટે ભૂલથી બે વાર પેમેન્ટ થવાની કે અજાણતા પૈસા કપાઈ જવાની શક્યતા પણ ઘટી જશે.
બીજી એપ પર પણ જોઈ શકાશે માહિતી
આ ફીચરની ખાસ વાત એ છે કે ગ્રાહકો પોતાના તમામ ઓટોપેની માહિતી કોઈપણ UPI એપ પર જોઈ શકશે. જરૂર પડ્યે તેઓ એ પણ જાણી શકશે કે કયું પેમેન્ટ કઈ એપ સાથે જોડાયેલું છે. આના કારણે અલગ-અલગ એપ્સમાં જઈને માહિતી શોધવાની જરૂર નહીં પડે.
ફેરફાર કે રદ કરવા માટે મૂળ એપ પર જવું પડશે
જો કે, જો કોઈ ગ્રાહક કોઈ ઓટોપે સબ્સ્ક્રિપ્શન બંધ કરવા માંગે છે અથવા તેમાં કોઈ ફેરફાર કરવા માંગે છે, તો તેણે તે જ UPI એપનો ઉપયોગ કરવો પડશે જેના દ્વારા તેણે શરૂઆતમાં ઓટોપે સુવિધા એક્ટિવ કરી હતી. તમામ એપ્સ માત્ર ઈ-મેન્ડેટનું લિસ્ટ બતાવશે, પરંતુ કોઈ ફેરફાર કે ટ્રાન્ઝેક્શન માટે યુઝરને મૂળ એપ પર જ રીડાયરેક્ટ કરવામાં આવશે.
ઝડપથી વધી રહ્યો છે UPI AutoPay નો ઉપયોગ
દેશમાં UPI ઓટોપેનો ઉપયોગ સતત વધી રહ્યો છે. NPCI ના આંકડા મુજબ, મે 2026 માં ટોચની 10 બેંકોએ અંદાજે 1.6 અબજ ઓટોપે ટ્રાન્ઝેક્શન પ્રોસેસ કર્યા હતા. જ્યારે એક વર્ષ પહેલા મે 2025 માં આ સંખ્યા 57.7 કરોડ હતી. એટલે કે માત્ર એક જ વર્ષમાં ઓટોપે ટ્રાન્ઝેક્શન લગભગ ત્રણ ગણા વધી ગયા છે.
Meta નું CRED માં 900 મિલિયન ડોલરનું રોકાણ : ગુજરાતી મૂળના કુણાલ શાહ હવે WhatsAppના નવા બોસ
આ સેવાઓ માટે થાય છે સૌથી વધુ ઉપયોગ
UPI ઓટોપેનો ઉપયોગ નિયમિત પેમેન્ટ માટે કરવામાં આવે છે. જેમાં લોનની EMI, વીમા પ્રીમિયમ, મ્યુચ્યુઅલ ફંડ SIP, મોબાઈલ રિચાર્જ, વીજળી-પાણીના બિલ અને OTT પ્લેટફોર્મનું સબ્સ્ક્રિપ્શન જેવા પેમેન્ટ સામેલ છે. ઓટોપેની મદદથી નક્કી કરેલી તારીખે પેમેન્ટ આપોઆપ થઈ જાય છે, જેથી કોઈ પેમેન્ટ ભૂલી જવાની શક્યતા રહેતી નથી.
કેમ જરૂરી બન્યું આ નવું ફીચર?
ઓટોપે ટ્રાન્ઝેક્શનની સંખ્યા વધવાની સાથે ઘણા ગ્રાહકોને એ યાદ નથી રહેતું કે તેમણે કઈ-કઈ સેવાઓ માટે ઓટો પેમેન્ટની મંજૂરી આપી રાખી છે. ઘણી વખત ખાતામાં પૂરતું બેલેન્સ ન હોવાને કારણે પેમેન્ટ નિષ્ફળ (Fail) પણ થઈ જાય છે. NPCI નું માનવું છે કે જ્યારે તમામ ઓટોપે એક જ જગ્યાએ દેખાશે, ત્યારે ગ્રાહકો પોતાના ખર્ચ અને નિયમિત પેમેન્ટ્સ પર વધુ સારું નિયંત્રણ રાખી શકશે.
