પૂર્વ એશિયામાં સુપર ટાઇફૂન બાવીએ ભારે તબાહી મચાવી છે. ફિલિપાઈન્સ, તાઇવાન અને જાપાનમાં ભારે પવન, ધોધમાર વરસાદ અને ભૂસ્ખલન બાદ હવે આ શક્તિશાળી વાવાઝોડું ચીન તરફ આગળ વધી રહ્યું છે. વિવિધ દેશોમાં અત્યાર સુધીમાં 17થી વધુ લોકોના મોત અને 200થી વધુ લોકો ઘાયલ થયાની માહિતી સામે આવી છે. લાખો લોકોને સુરક્ષિત સ્થળોએ ખસેડવાની ફરજ પડી છે, જ્યારે હજારો ફ્લાઇટ્સ રદ કરવામાં આવી છે અને અનેક વિસ્તારોમાં શૈક્ષણિક સંસ્થાઓ બંધ રાખવામાં આવી છે. ચીનમાં સ્થિતિ વધુ ગંભીર બની છે કારણ કે દેશ પહેલેથી જ ભારે વરસાદ અને પૂરની સ્થિતિનો સામનો કરી રહ્યો છે. અનેક નદીઓ ભયજનક સપાટીએ વહેતી હોવાથી પૂરનું જોખમ વધી ગયું છે. આવી સ્થિતિમાં બાવી વાવાઝોડાના આગમનથી સ્થાનિક પ્રશાસન અને બચાવ એજન્સીઓ હાઈ એલર્ટ પર આવી ગઈ છે.
ચીનમાં વ્યાપક તૈયારી, લાખો લોકોનું સ્થળાંતર
ચીનના ઝેજીઆંગ અને ફુજિયાન સહિતના દરિયાકાંઠાના વિસ્તારોમાં વાવાઝોડાની સૌથી વધુ અસર થવાની આશંકા વ્યક્ત કરવામાં આવી છે. સત્તાવાળાઓએ દરિયાકાંઠાના વિસ્તારોમાંથી 20 લાખથી વધુ લોકોને સુરક્ષિત સ્થળોએ ખસેડ્યા છે. અગાઉ પણ પૂરથી પ્રભાવિત વિસ્તારોમાં હજારો પરિવારોને રાહત કેમ્પોમાં રાખવામાં આવ્યા છે. ચીનના આપત્તિ વ્યવસ્થાપન વિભાગે લગભગ 17,000થી વધુ ઇમર્જન્સી રેસ્ક્યુ કર્મચારીઓને તૈનાત કર્યા છે. તમામ માછીમારી પ્રવૃત્તિઓ સ્થગિત કરવામાં આવી છે, ફેરી સેવા બંધ રાખવામાં આવી છે અને દરિયાઈ વિસ્તારોમાં લોકોને જવા પર પ્રતિબંધ મૂકવામાં આવ્યો છે. સંભવિત અસરગ્રસ્ત જિલ્લાઓમાં શાળાઓ અને કોલેજો પણ બંધ રાખવામાં આવી છે.
આ પણ વાંચો: વિયેતનામમાં ભારતીય પ્રવાસીઓને લઈ જતી બોટ પલટી : 15 ભારતીયોના મોતની પુષ્ટિ, મૃતકોની યાદી જાહેર
પૂર અને વાવાઝોડાની બમણી આફત
ચીનમાં છેલ્લા કેટલાક દિવસોથી સતત વરસાદને કારણે અનેક નદીઓ ભયજનક સપાટીએ વહે રહી છે. ઘણા વિસ્તારોમાં પૂરનું પાણી ઘરોમાં ઘૂસી જતાં મોટી સંખ્યામાં લોકો ઘરવિહોણા બન્યા છે. અંદાજે એક લાખથી વધુ લોકોને પૂરના કારણે સ્થળાંતર કરવું પડ્યું છે. આ દરમિયાન બાવી વાવાઝોડું દરિયાકાંઠે પહોંચે તેવી શક્યતા હોવાથી બચાવ કામગીરી વધુ તેજ કરવામાં આવી છે. હવામાન વિભાગે ચેતવણી આપી છે કે વાવાઝોડા સાથે ભારે વરસાદ, તેજ પવન અને દરિયામાં ઊંચા મોજાં સર્જાઈ શકે છે, જેના કારણે નીચાણવાળા વિસ્તારોમાં સ્થિતિ વધુ ગંભીર બની શકે છે.
ફિલિપાઈન્સમાં ભારે જાનહાનિ
બાવી વાવાઝોડાની શરૂઆતની સૌથી મોટી અસર ફિલિપાઈન્સમાં જોવા મળી હતી. ભારે વરસાદ અને ભૂસ્ખલનના કારણે અનેક વિસ્તારોમાં જાનમાલનું નુકસાન થયું છે. ગ્રામ્ય વિસ્તારોમાં ઓછામાં ઓછા 10 લોકોના મોત થયા હોવાનું સ્થાનિક સત્તાવાળાઓએ જણાવ્યું છે. કાલાનોગાસ વિસ્તારમાં ભૂસ્ખલનની ઘટનામાં પાંચ લોકોના મોત થયા હતા, જ્યારે અનેક લોકો લાપતા હોવાનું જણાવાયું છે. આશરે 20 હજાર લોકોને સુરક્ષિત સ્થળોએ ખસેડવામાં આવ્યા છે અને 100થી વધુ ઇમર્જન્સી શેલ્ટર તૈયાર કરવામાં આવ્યા છે. રાહત અને બચાવ કામગીરી સતત ચાલુ છે.
જાપાન અને તાઇવાનમાં પણ વ્યાપક અસર
તાઇવાનમાં વાવાઝોડાના કારણે ભારે પવન અને વરસાદને પગલે 113થી વધુ લોકો ઘાયલ થયા છે. સાવચેતીના ભાગરૂપે લગભગ 15 હજાર લોકોને સુરક્ષિત સ્થળોએ ખસેડવામાં આવ્યા છે. સમગ્ર દેશમાં શાળાઓ અને કોલેજો બંધ રાખવામાં આવી હતી અને અનેક જાહેર સેવાઓ પર અસર જોવા મળી હતી. જાપાનના ઓકીનાવા વિસ્તારમાં પણ બાવી વાવાઝોડાએ ભારે અસર કરી છે. તીવ્ર પવનને કારણે 200થી વધુ ફ્લાઇટ્સ રદ કરવામાં આવી હતી અને દરિયાઈ પરિવહન પર પણ અસર પડી હતી. અનેક વિસ્તારોમાં વીજ પુરવઠો ખોરવાયો હોવાની માહિતી પણ સામે આવી છે.
ઝેજીઆંગ પ્રાંતમાં સૌથી વધુ ખતરો
હવામાન નિષ્ણાતોના જણાવ્યા અનુસાર ચીનના ઝેજીઆંગ પ્રાંતમાં બાવી વાવાઝોડાની સૌથી વધુ અસર થવાની શક્યતા છે. આ વિસ્તારમાં અંદાજે એક કરોડ લોકો વસે છે. વાવાઝોડાના ખતરાને ધ્યાનમાં રાખીને સમગ્ર પ્રાંતમાં ઓરેન્જ એલર્ટ જાહેર કરવામાં આવ્યું છે. સ્થાનિક પ્રશાસન દ્વારા લોકોને દરિયાકાંઠાથી દૂર રહેવા, અનાવશ્યક મુસાફરી ટાળવા અને સત્તાવાર સૂચનાઓનું પાલન કરવાની અપીલ કરવામાં આવી છે. વાવાઝોડા દરમિયાન પવનની ગતિ પ્રતિ કલાક આશરે 144 કિલોમીટર સુધી પહોંચી શકે છે, જેના કારણે વૃક્ષો ધરાશાયી થવા, વીજ લાઈનોને નુકસાન પહોંચવા અને ઇમારતોને અસર થવાની શક્યતા વ્યક્ત કરવામાં આવી છે.
રાહત અને બચાવ કામગીરી સતત ચાલુ
ચીન સહિત તમામ અસરગ્રસ્ત દેશોમાં આપત્તિ વ્યવસ્થાપન એજન્સીઓ સતત બચાવ અને રાહત કામગીરીમાં વ્યસ્ત છે. તાત્કાલિક આશ્રયસ્થાનો, ખોરાક, પીવાનું પાણી અને તબીબી સેવાઓ ઉપલબ્ધ કરાવવામાં આવી રહી છે. હવામાન વિભાગો દ્વારા સતત અપડેટ જાહેર કરવામાં આવી રહ્યા છે જેથી લોકો સમયસર સાવચેતી રાખી શકે. પૂર્વ એશિયામાં ચોમાસાની સિઝન દરમિયાન દર વર્ષે ટાઇફૂન સર્જાતા હોય છે, પરંતુ બાવીની તીવ્રતા અને તેની સાથે જોડાયેલા ભારે વરસાદને કારણે આ વખતે અનેક દેશોમાં વ્યાપક અસર જોવા મળી રહી છે. આગામી કલાકોમાં ચીનમાં વાવાઝોડું લેન્ડફોલ કરે તે પહેલાં સત્તાવાળાઓએ તમામ જરૂરી તૈયારીઓ પૂર્ણ કરી દીધી છે.
