Indias Top 5 Chepest CNG Cars: ભારતમાં પેટ્રોલ અને ડીઝલના ભાવમાં થતા સતત વધારાને કારણે વાહનચાલકો માટે મુસાફરી કરવી મોંઘી બની રહી છે. આવી સ્થિતિમાં, એક સસ્તો અને ટકાઉ વિકલ્પ તરીકે CNG કારોની માંગમાં ભારે ઉછાળો જોવા મળી રહ્યો છે. ફેક્ટરી-ફિટેડ CNG મોડલ્સ માત્ર રનિંગ કોસ્ટ ઘટાડે છે એટલું જ નહીં, પરંતુ દરરોજના ઉપયોગ માટે અત્યંત ભરોસાપાત્ર પણ માનવામાં આવે છે. હવે તો ભારતીય બજારમાં હેચબેકથી લઈને SUV સુધીના અનેક CNG વિકલ્પો ઉપલબ્ધ છે, જે ઓછા ખર્ચમાં વધુ માઇલેજ આપે છે. જો તમે પણ નવી કાર લેવાનું વિચારી રહ્યા છો અને તમારું લક્ષ્ય બજેટ તેમજ માઇલેજ છે, તો આ લેખમાં આપણે ભારતની 5 સૌથી સસ્તી અને લોકપ્રિય CNG કાર વિશે વાત કરીશું, જે તમારા માસિક બજેટને સંતુલિત રાખવામાં મદદ કરશે.
1. મારૂતિ સુઝુકી S-Presso CNG (કિંમત: 4.62 લાખથી શરૂ)
બજેટ કારના લિસ્ટમાં મારૂતિ S-Presso સૌથી મોખરે છે. 1.0 લીટરના એન્જિન સાથે આવતી આ કાર 5-સ્પીડ મેન્યુઅલ ગિયરબોક્સ ધરાવે છે. સીએનજી મોડમાં આ કાર 32.73 કિમી પ્રતિ કિલોની શાનદાર માઇલેજ આપે છે. શહેરી વિસ્તારોમાં ટ્રાફિક વચ્ચે દૈનિક ઉપયોગ માટે આ એક ઉત્તમ અને સસ્તો વિકલ્પ છે. આ સાથે કંપનીની 'Alto K10 CNG' પણ 4.82 લાખની કિંમતે ઉપલબ્ધ છે.
2. મારૂતિ સુઝુકી વેગનઆર CNG (કિંમત: 5.89 લાખથી શરૂ)
ફેમિલી કાર તરીકે વેગનઆરનું સ્થાન અતૂટ છે. તેનું CNG વેરિએન્ટ 34.05 કિમી/કિલોની મજબૂત માઇલેજ આપે છે, જે તેને સૌથી વધુ માઇલેજ આપતી કારોની યાદીમાં સામેલ કરે છે. 1.0 લીટર એન્જિન સાથે આવતી આ કાર પાવર અને પરફોર્મન્સનું બેસ્ટ કોમ્બિનેશન છે.
3. ટાટા ટિયાગો CNG (કિંમત: 5.49 લાખથી શરૂ)
જો તમે મારૂતિ સિવાય બીજી સુરક્ષિત બ્રાન્ડ ઈચ્છો છો, તો ટાટા ટિયાગો બેસ્ટ છે. આ કારની વિશેષતા એ છે કે તેમાં મેન્યુઅલ સાથે AMT ગિયરબોક્સનો વિકલ્પ પણ મળે છે. 1.2 લીટર એન્જિન સાથે આ કાર 26.49 કિમી/કિલોની માઇલેજ આપે છે, જે ટાટાની મજબૂતીની સાથે જોડાયેલી છે.
4. મારૂતિ સુઝુકી ડિઝાયર CNG (કિંમત: 8.03 લાખથી શરૂ)
જે ગ્રાહકોને હેચબેકને બદલે સેડાન કારનો અનુભવ જોઈએ છે, તેમના માટે ડિઝાયર CNG એક પ્રીમિયમ પસંદગી છે. આ સેડાન કાર 33.73 કિમી/કિલોની માઇલેજ આપે છે, જે તેને દેશની સૌથી વધુ માઇલેજ આપતી સેડાન બનાવે છે.
5. ટાટા પંચ CNG (કિંમત: 6.74 લાખથી શરૂ)
ઓછા બજેટમાં સ્ટાઇલિશ SUV જોઈતી હોય તો ટાટા પંચ CNG ઉત્તમ છે. તેમાં ટાટાની ખાસ 'ડ્યૂલ સિલિન્ડર ટેક્નોલોજી'નો ઉપયોગ થયો છે, જેનાથી CNG સિલિન્ડર હોવા છતાં તમને કારમાં ઘણું બૂટ સ્પેસ મળે છે. 26.99 કિમી/કિલોની માઇલેજ અને SUV લુક તેને આજના યુવાનોની પસંદ બનાવે છે.
