Appleએ ભારતમાં પોતાના પ્રીમિયમ AirPods માટે એક મોટું હેલ્થ અપડેટ રજૂ કર્યું છે. હવે AirPods માત્ર મ્યુઝિક સાંભળવાનું ડિવાઇસ નહીં રહે, પરંતુ તે યુઝર્સની Hearing Health પર પણ નજર રાખશે. કંપનીએ ભારતમાં નવું Hearing Test ફીચર શરૂ કર્યું છે, જેના દ્વારા લોકો ઘરે બેઠા માત્ર થોડા જ મિનિટોમાં પોતાની સાંભળવાની ક્ષમતાની તપાસ કરી શકશે.
ટેકનોલોજી અને હેલ્થકેરને એકસાથે જોડવાના પ્રયાસોમાં Apple સતત આગળ વધી રહ્યું છે. હવે કંપનીએ AirPods Pro 2 અને તેનાથી આગળના મોડલ્સ માટે એવું ફીચર રજૂ કર્યું છે જે Hearing Test કરવામાં મદદ કરશે. Appleના જણાવ્યા અનુસાર, યુઝર્સ હવે હોસ્પિટલ કે ક્લિનિક ગયા વગર ઘરે બેઠા જ પોતાની સાંભળવાની ક્ષમતાની તપાસ કરી શકશે.
આ ફીચરનો ઉપયોગ કરવા માટે AirPodsમાં લેટેસ્ટ Firmware હોવું જરૂરી છે. સાથે જ તે iOS 18 અથવા iPadOS 18 પર ચાલતા iPhone અથવા iPad સાથે કનેક્ટેડ હોવા જોઈએ. કંપનીનું કહેવું છે કે સંપૂર્ણ ટેસ્ટ લગભગ પાંચ મિનિટમાં પૂર્ણ થઈ જાય છે.
ટેસ્ટ દરમિયાન યુઝરને AirPods પહેરવાના રહેશે. ત્યારબાદ બંને કાનમાં અલગ અલગ ઓડિયો ટોન સંભળાશે. જ્યારે પણ કોઈ અવાજ સાંભળાય ત્યારે યુઝરે તેનો પ્રતિસાદ આપવો પડશે. આ પ્રક્રિયા દ્વારા સિસ્ટમ જાણી શકે છે કે વ્યક્તિ કેટલી સ્પષ્ટતા સાથે અવાજ સાંભળી શકે છે.
ટેસ્ટ પૂર્ણ થયા બાદ Apple એક વિગતવાર રિપોર્ટ તૈયાર કરશે. તેમાં બંને કાનની Hearing Level, Hearing Lossની સ્થિતિ, જરૂરી સલાહ અને Audiogram Chart સામેલ હશે. આ ચાર્ટ બતાવે છે કે અલગ અલગ ફ્રીક્વન્સી પર યુઝર કેટલી સારી રીતે સાંભળી શકે છે. મહત્વની વાત એ છે કે આ તમામ ડેટા સુરક્ષિત રીતે Apple Health Appમાં સેવ રહેશે અને જરૂર પડે ત્યારે તેને ડૉક્ટર અથવા હેલ્થ એક્સપર્ટ સાથે શેર પણ કરી શકાય છે.
Appleનું માનવું છે કે ઘણા લોકોને લાંબા સમય સુધી ખબર જ પડતી નથી કે તેમની સાંભળવાની ક્ષમતા ધીમે ધીમે નબળી પડી રહી છે. જ્યારે સુધી સમસ્યા ગંભીર ન બને ત્યાં સુધી લોકો ટેસ્ટ પણ કરાવતા નથી. આવી સ્થિતિમાં આ નવું ફીચર Hearing Problemને શરૂઆતના સ્ટેજમાં જ ઓળખવામાં મદદરૂપ બની શકે છે.
કંપનીની Health and Fitness ટીમના અધિકારીઓએ જણાવ્યું કે ટેક્નોલોજીનો હેતુ લોકોને પોતાની હેલ્થ પર વધુ સારો કંટ્રોલ આપવાનો હોવો જોઈએ. આ વિચાર સાથે જ Hearing Test ફીચર વિકસાવવામાં આવ્યું છે.
માત્ર ટેસ્ટ પૂરતું જ નહીં, હવે AirPods Pro Hearing Assistance ડિવાઇસ તરીકે પણ કામ કરશે. ખાસ કરીને હળવી અથવા મધ્યમ Hearing Loss ધરાવતા લોકો માટે આ અપડેટ ખૂબ ઉપયોગી બની શકે છે. ટેસ્ટ દરમિયાન તૈયાર થયેલી Personal Hearing Profileના આધારે AirPods આસપાસની વાતચીત અને અવાજોને વધુ સ્પષ્ટ અને ઊંચા અવાજમાં સાંભળવામાં મદદ કરશે.
આથી રોજિંદી વાતચીત સમજવી વધુ સરળ બની શકે છે. ખાસ કરીને ભીડભાડવાળી જગ્યાઓમાં અથવા અવાજવાળા વાતાવરણમાં લોકોને મદદ મળી શકે છે.
Apple અનુસાર કંપની ઘણા વર્ષોથી Hearing Health ટેક્નોલોજી પર કામ કરી રહી હતી. શરૂઆતના સમયમાં Connected Headphones દ્વારા વિશ્વસનીય પરિણામ મેળવવામાં મુશ્કેલી આવતી હતી કારણ કે બહારનો અવાજ અને Hardware Quality મોટી સમસ્યા હતી. જોકે હવે AirPodsના સુધારેલા Hardware અને Noise Isolation ટેક્નોલોજીના કારણે કંપની વધુ વિશ્વસનીય અને લગભગ ક્લિનિકલ લેવલના પરિણામો આપવાનો દાવો કરી રહી છે.
આ અપડેટ એ પણ દર્શાવે છે કે Apple હવે પોતાના ડિવાઇસોને માત્ર ઇલેક્ટ્રોનિક ગેજેટ તરીકે નહીં પરંતુ હેલ્થ કમ્પેનિયન તરીકે રજૂ કરવા માંગે છે. કંપની છેલ્લા કેટલાક વર્ષોમાં Health Technology પર વધુ ફોકસ કરી રહી છે.
Hearing Features ઉપરાંત Appleએ ભારતમાં Apple Watch યુઝર્સ માટે Sleep Apnoea Notification ફીચર પણ શરૂ કર્યું છે. આ ફીચર ઊંઘ દરમિયાન શ્વાસ લેવામાં આવતી મુશ્કેલીઓના સંકેતો ઓળખવામાં મદદ કરશે. Apple Watchમાં રહેલા સેન્સર અને Accelerometer સૂતી વખતે શરીરની હલચલ અને Breathing Patternને ટ્રેક કરીને સંભવિત સમસ્યાઓ શોધવાનો પ્રયાસ કરશે.
ટેક એક્સપર્ટ્સનું માનવું છે કે આગામી સમયમાં સ્માર્ટ ડિવાઇસો હેલ્થ મોનિટરિંગમાં વધુ મહત્વપૂર્ણ ભૂમિકા ભજવશે અને Appleનું આ નવું અપડેટ એ દિશામાં મોટું પગલું માનવામાં આવી રહ્યું છે.
