આજે 5 જાન્યુઆરી છે. ઇતિહાસના પાનાઓ પર આજનો દિવસ રાજકારણ, બોલીવુડ અને રમતજગતની અનેક મોટી હસ્તીઓ સાથે જોડાયેલો છે. આજના દિવસે જ વર્ષ 1592 માં મુઘલ બાદશાહ શાહજહાંનો જન્મ થયો હતો, જેમણે પ્રેમનું પ્રતીક ગણાતા તાજમહેલનું નિર્માણ કરાવ્યું હતું. આ ઉપરાંત પશ્ચિમ બંગાળના મુખ્યમંત્રી મમતા બેનર્જી અને બોલીવુડ અભિનેત્રી દીપિકા પદુકોણનો પણ આજે જન્મદિવસ છે. રમતજગતમાં ભારતીય ક્રિકેટના પૂર્વ કેપ્ટન મન્સૂર અલી ખાન પટૌડીનો જન્મ પણ આજના દિવસે થયો હતો.
5 જાન્યુઆરીની ઐતિહાસિક અને મહત્વપૂર્ણ ઘટનાઓ
2020: ન્યૂઝીલેન્ડના બેટ્સમેન લિયો કાર્ટરે એક ઓવરમાં 6 સિક્સ ફટકારીને ઇતિહાસ રચ્યો. તેઓ આવું કરનાર વિશ્વના 7 મા બેટ્સમેન બન્યા. આ જ દિવસે ભારતનું વિદેશી હૂંડિયામણ ભંડોળ 457.468 અબજની ઐતિહાસિક સપાટીએ પહોંચ્યું હતું.
2014: ભારતીય અવકાશ સંશોધન સંસ્થા (ISRO) એ સંચાર ઉપગ્રહ GSAT-14 ને સફળતાપૂર્વક લોન્ચ કર્યો. આ મિશનમાં પ્રથમવાર સ્વદેશી ક્રાયોજેનિક એન્જિનનો ઉપયોગ કરવામાં આવ્યો હતો.
2010: રાજસ્થાનના ડુંગરપુરમાં ‘ગ્રીન રાજસ્થાન અભિયાન’ હેઠળ માત્ર બે દિવસમાં 6 લાખથી વધુ છોડ રોપવાના રેકોર્ડને બુક ઓફ વર્લ્ડ રેકોર્ડમાં સ્થાન મળ્યું.
2009: નેશનલ કોન્ફરન્સના નેતા ઓમર અબ્દુલ્લાએ જમ્મુ અને કાશ્મીરના મુખ્યમંત્રી તરીકે પદભાર સંભાળ્યો.
2006: સાઉદી અરેબિયાના મક્કામાં એક હોટલ ધરાશાયી થવાની દુર્ઘટનામાં 76 હજ યાત્રીઓના કરૂણ મોત થયા હતા.
2002: કાઠમંડુમાં સાર્ક સંમેલન દરમિયાન પાકિસ્તાનના રાષ્ટ્રપતિ પરવેઝ મુશર્રફે મૈત્રીનો હાથ લંબાવ્યો હતો, પરંતુ તત્કાલીન વડાપ્રધાન અટલ બિહારી વાજપેયીએ પાકિસ્તાન પર અવિશ્વાસ વ્યક્ત કર્યો હતો.
2000: ફૂટબોલના મહાન જાદુગર ગણાતા ‘પેલે’ ને સદીના સર્વશ્રેષ્ઠ ખેલાડી તરીકે સન્માનિત કરવામાં આવ્યા.
1970: ચીનના યુનાન પ્રાંતમાં 7.7 ની તીવ્રતાના વિનાશક ભૂકંપમાં અંદાજે 15000 લોકોએ જીવ ગુમાવ્યા હતા.
1671: મરાઠા સામ્રાજ્યના સ્થાપક છત્રપતિ શિવાજી મહારાજે મુઘલ શાસકોને હરાવીને સલ્હાર પ્રદેશ પર વિજય મેળવ્યો હતો.
1659: ખાજવાહના યુદ્ધમાં ઔરંગઝેબે પોતાના ભાઈ શાહ શુજાને હરાવી સત્તા પર પકડ મજબૂત કરી હતી.
આજના દિવસે જન્મેલી જાણીતી હસ્તીઓ
આજે પશ્ચિમ બંગાળના ફાયરબ્રાન્ડ નેતા મમતા બેનર્જીનો જન્મદિવસ છે. આ સાથે જ નિશાનેબાજ અંજૂમ મૌદગિલ અને દીપિકા પદુકોણ પણ પોતાનો બર્થડે સેલિબ્રેટ કરી રહ્યા છે. બીજી તરફ, ભારતીય સંગીત જગતના દિગ્ગજ સી. રામચંદ્ર અને ફિલ્મ નિર્દેશક રમેશ બહેલની આજે પુણ્યતિથિ છે.
