ઇતિહાસના પાનાઓમાં 13 જાન્યુઆરીનો દિવસ ભારત અને વિશ્વ માટે અનેક યાદગાર ક્ષણો લઈને આવ્યો છે. આજના દિવસે જ ભારતે અંતરિક્ષ વિજ્ઞાનમાં પદાર્પણ કરીને વિશ્વ સ્તરે પોતાની ઓળખ બનાવી હતી. આ ઉપરાંત રાજકીય, સામાજિક અને આંતરરાષ્ટ્રીય સ્તરે બનેલી અનેક ઐતિહાસિક ઘટનાઓ આ દિવસને વિશેષ બનાવે છે.
ભારતના પ્રથમ અવકાશયાત્રી રાકેશ શર્માનો જન્મદિવસ
13 જાન્યુઆરી 1949ના રોજ પંજાબમાં જન્મેલા રાકેશ શર્મા ભારત માટે ગૌરવનું પ્રતીક છે. તેઓ ભારતના પ્રથમ અને વિશ્વના 138માં અવકાશયાત્રી બન્યા હતા. વર્ષ 1984 માં સોવિયેત સંઘના સહયોગથી અવકાશ મિશન પૂર્ણ કરીને તેમણે આ સિદ્ધિ મેળવી હતી. જ્યારે તત્કાલીન વડાપ્રધાન ઇન્દિરા ગાંધીએ તેમને પૂછ્યું કે અંતરિક્ષમાંથી ભારત કેવું દેખાય છે, ત્યારે તેમણે ગર્વથી જવાબ આપ્યો હતો - "સારે જહાં સે અચ્છા".
ઐતિહાસિક અને આંતરરાષ્ટ્રીય ઘટનાક્રમ
સંધિ અને યુદ્ધ: વર્ષ 1818 માં ઉદયપુરના રાણાએ મેવાડની રક્ષા માટે અંગ્રેજો સાથે ઐતિહાસિક સંધિ કરી હતી. ઉપરાંત 1849 માં બીજા એંગ્લો-શીખ યુદ્ધ દરમિયાન પ્રસિદ્ધ ચિલિયનવાલાનું યુદ્ધ આજના દિવસે શરૂ થયું હતું.
આંતરરાષ્ટ્રીય અર્થતંત્ર: વર્ષ 1607 માં સ્પેનમાં રાષ્ટ્રીય નાદારીની ઘોષણા બાદ 'બેંક ઓફ જીનીવા' પડી ભાંગી હતી. તો વર્ષ 2010 માં જર્મનીના અર્થતંત્રમાં બીજા વિશ્વયુદ્ધ પછીનો સૌથી મોટો 5% નો ઘટાડો નોંધાયો હતો.
મહાત્મા ગાંધીના ઉપવાસ: 1948 માં રાષ્ટ્રપિતા મહાત્મા ગાંધીએ દેશમાં હિંદુ-મુસ્લિમ એકતા જાળવી રાખવા માટે પોતાના જીવનના અંતિમ આમરણાંત ઉપવાસ શરૂ કર્યા હતા.
પ્રથમ રેડિયો પ્રસારણ: 1910 માં વિશ્વનું પ્રથમ જાહેર રેડિયો પ્રસારણ અમેરિકાના ન્યૂયોર્ક શહેરમાં શરૂ થયું હતું, જે સંદેશાવ્યવહાર ક્ષેત્રે ક્રાંતિ સમાન હતું.
આજના દિવસે જન્મેલી મહાન વિભૂતિઓ
આજે અનેક અગ્રણી વ્યક્તિઓનો જન્મદિવસ પણ છે:
વજુભાઈ વાળા: ભારતીય જનતા પાર્ટીના વરિષ્ઠ નેતા અને કર્ણાટકના પૂર્વ રાજ્યપાલ.
શિવકુમાર શર્મા: ભારતીય શાસ્ત્રીય સંગીતના સુપ્રસિદ્ધ સંતૂર વાદક.
મેજર મોહિત શર્મા: ભારતીય સેનાના બહાદુર અધિકારી, જેમને મરણોત્તર અશોક ચક્રથી નવાજવામાં આવ્યા હતા.
શક્તિ સામંત: બોલીવુડના જાણીતા ફિલ્મ નિર્માતા અને દિગ્દર્શક.
તાજેતરનો ઇતિહાસ (2020)
વર્ષ 2020 માં પાકિસ્તાનની લાહોર હાઈકોર્ટે ભૂતપૂર્વ રાષ્ટ્રપતિ પરવેઝ મુશર્રફને સંભળાવેલી મૃત્યુદંડની સજાને ગેરબંધારણીય ઠેરવી હતી. આ સાથે જ ભારત સરકારના આરોગ્ય મંત્રાલયે દુર્લભ બીમારીઓની સારવાર માટે 'રેર ડિસીઝ 2020' નામની ડ્રાફ્ટ પોલિસી રજૂ કરી ગરીબ દર્દીઓને 15 લાખ રૂપિયાની સહાયની જોગવાઈ કરી હતી.
