India vs Sri Lanka T20 Series 2025: ભારતીય મહિલા ક્રિકેટ ટીમ સામે પાંચ મેચોની T-20 આંતરરાષ્ટ્રીય સિરીઝ રમવા માટે શ્રીલંકાની મહિલા ક્રિકેટ ટીમ ભારત આવી રહી છે. આ સિરીઝ 21 ડિસેમ્બરથી શરૂ થશે અને બંને ટીમો વચ્ચે રોમાંચક મુકાબલા જોવા મળશે. શ્રીલંકાની ટીમ બુધવારે ભારત માટે રવાના થઈ ગઈ છે. આ સિરીઝ મહિલા ક્રિકેટના ચાહકો માટે ખાસ મહત્વની છે કારણ કે ભારત હાલની વનડે વર્લ્ડ ચેમ્પિયન ટીમ છે. સિરીઝની પ્રથમ બે મેચો 21 અને 23 ડિસેમ્બરે વિશાખાપત્તનમ ખાતે રમાશે. ત્યારબાદ બાકીના ત્રણ મેચો 26, 28 અને 30 ડિસેમ્બરે તિરુવનંતપુરમમાં યોજાશે. બંને શહેરોમાં ક્રિકેટપ્રેમીઓમાં આ મેચોને લઈને ભારે ઉત્સાહ જોવા મળી રહ્યો છે.
સિનિયર અને યુવા ખેલાડીઓથી ભરપૂર ટીમ
શ્રીલંકાની મહિલા ટીમની આગેવાની અનુભવી ઓલરાઉન્ડર ચમારી અટાપટ્ટુ કરી રહી છે, જ્યારે હર્ષિતા સમરાવિક્રમા ઉપકપ્તાનની ભૂમિકા નિભાવશે. આ ટીમમાં સિનિયર અને યુવા ખેલાડીઓનું સંતુલિત મિશ્રણ જોવા મળે છે. શ્રીલંકા ક્રિકેટ બોર્ડે સતત નબળા પ્રદર્શનને કારણે કેટલાક લાંબા સમયથી ટીમના નિયમિત સભ્ય રહેલા ખેલાડીઓને ટીમમાંથી બહાર રાખવાનો નિર્ણય લીધો છે. ટીમમાંથી બહાર રહેલા ખેલાડીઓમાં અનુષ્કા સંજીવની, ઉદેશિકા પ્રબોધની, સુગંધિકા દાસનાયકે અને અચિની કુલસૂરિયા જેવા નામો સામેલ છે. અનુષ્કા સંજીવનીની ગેરહાજરીમાં વિકેટકીપિંગની જવાબદારી હવે કૌશાની નુથ્યાંગના સંભાળશે. તેના માટે આ સિરીઝ મહત્વપૂર્ણ તક સાબિત થઈ શકે છે.
યુવા પ્રતિભાઓને મળશે તકો
યુવા પ્રતિભાઓને તક આપવાના ઉદ્દેશથી 17 વર્ષીય સ્પિનર શશિની ગિમ્હાની અને 19 વર્ષીય મધ્યમ ગતિની બોલર રશ્મિકા સેવંદીની ટીમમાં વાપસી કરવામાં આવી છે. આ બંને ખેલાડીઓ પર ટીમ મેનેજમેન્ટને ભવિષ્ય માટે મોટી આશાઓ છે. શ્રીલંકાની મહિલા ટીમ ભારત સામે મજબૂત પડકાર ઉભો કરવાનો પ્રયાસ કરશે, પરંતુ ભારતીય ટીમ પોતાની ઘરઆંગણે રમતી હોવાથી તેને ફાયદો મળી શકે છે. તેમ છતાં T-20 ફોર્મેટમાં કંઈ પણ શક્ય છે અને આ કારણે શ્રેણી વધુ રસપ્રદ બનશે.
શ્રીલંકાની મહિલા ટીમ (T-20 સિરીઝ માટે):
ચમારી અટાપટ્ટુ (કપ્તાન), હર્ષિતા સમરાવિક્રમા (ઉપકપ્તાન), હસિની પેરેરા, વિશ્મી ગુણરત્ને, નીલક્ષિકા ડી સિલ્વા, કવિષા દિલહારી, ઇમેશા દુલાની, કૌશાની નુથ્યાંગના (વિકેટકીપર), માલ્શા શેહાની, ઇનોકા રણવીરા, શશિની ગિમ્હાની, નિમેશા મધુશાની, કાવ્યા કવિંદી, મલ્કી મદારા અને રશ્મિકા સેવંદી.
ભારતીય મહિલા ક્રિકેટ ટીમઃ (T-20 સિરીઝ માટે):
હરમનપ્રીત કૌર (કેપ્ટન), સ્મૃતિ મંધાના (વાઈસ-કેપ્ટન), દીપ્તિ શર્મા, સ્નેહ રાણા, જેમિમાહ રોડ્રિગ્સ, શેફાલી વર્મા, હરલીન દેઓલ, અમનજોત કૌર, અરુંધતી રેડ્ડી, ક્રાંતિ ગૌડ, રેણુકા સિંહ ઠાકુર, રિચા ઘોષ, જી કામિલીની, શ્રી ચરણી, વૈષ્ણવી શર્મા.
