ઇંગ્લેન્ડ અને વેલ્સ ક્રિકેટ બોર્ડ (ECB) એ દક્ષિણ આફ્રિકા સામેની વ્હાઇટ-બોલ શ્રેણી અને આયર્લેન્ડ સામેની T20I મેચો માટે પોતાની ટીમોની જાહેરાત કરી છે. ઇંગ્લેન્ડની ટીમે ઘરઆંગણે દક્ષિણ આફ્રિકા સામે 3 ODI અને એટલી જ T20 શ્રેણી રમવાની છે. ODI શ્રેણી 2 સપ્ટેમ્બરથી હેડિંગ્લી ખાતે શરૂ થશે. ઇંગ્લેન્ડની ટીમ આ મહિને આયર્લેન્ડનો પ્રવાસ કરશે, જ્યાં તેને 3 T20 મેચ રમવાની છે. ઇંગ્લેન્ડ ક્રિકેટ બોર્ડે આ શ્રેણી માટે નવા કેપ્ટનનું નામ જાહેર કર્યું છે.
જેકબ બેથેલ બન્યો સૌથી યુવા કેપ્ટન
ઈંગ્લેન્ડની ટીમ દક્ષિણ આફ્રિકા સામે સંપૂર્ણ તાકાત સાથે રમશે. બંને શ્રેણીમાં હેરી બ્રુક ટીમનું નેતૃત્વ કરશે. જોફ્રા આર્ચર, જોસ બટલર, બેન ડકેટ અને જો રૂટ જેવા સ્ટાર ખેલાડીઓ દક્ષિણ આફ્રિકા સામે રમશે. પરંતુ આયર્લેન્ડ પ્રવાસ માટે તમામ ફોર્મેટના ખેલાડીઓને આરામ આપવામાં આવ્યો છે. આવી સ્થિતિમાં, આ પ્રવાસમાં જેકબ બેથેલ ટીમની કમાન સંભાળશે. 21 વર્ષીય જેકબ બેથેલને પહેલીવાર ઈંગ્લેન્ડ ટીમની કમાન સોંપવામાં આવી છે. ડબલિનમાં ટીમનો કમાન સંભાળતાની સાથે જ જેકબ બેથેલ આંતરરાષ્ટ્રીય મેચમાં ઈંગ્લેન્ડની પુરુષ ટીમનો સૌથી યુવા કેપ્ટન બનશે.
આયર્લેન્ડ શ્રેણી માટે ઇંગ્લેન્ડ ટીમ
જેકબ બેથેલ (કેપ્ટન), રેહાન અહેમદ, સની બેકર, ટોમ બેન્ટન, જોસ બટલર, લિયામ ડોસન, ટોમ હાર્ટલી, વિલ જેક્સ, સાકિબ મહમૂદ, જેમી ઓવરટન, મેથ્યુ પોટ્સ, આદિલ રશીદ, ફિલ સોલ્ટ, લ્યુક વુડ.
