તે રાત્રે ભારતે રાવલપિંડી એરપોર્ટ પર બ્રહ્મોસ મિસાઇલથી કર્યો હુમલો : પાકિસ્તાનના PM શાહબાઝ શરીફએ આખરે કરી કબૂલાત

પાકિસ્તાનના વડા પ્રધાન શાહબાઝ શરીફે અઝરબૈજાનના લાચિનમાં એક મોટું નિવેદન આપ્યું. તેમણે સ્વીકાર્યું કે ભારતે 9 અને 10 મેની રાત્રે રાવલપિંડીના નૂરખાન એરબેઝ સહિત પાકિસ્તાનના ઘણા વિસ્તારોમાં બ્રહ્મોસ મિસાઇલથી હુમલો કર્યો હતો. શાહબાઝે કહ્યું કે પાકિસ્તાની સેના બદલો લેવાની તૈયારી કરી રહી હતી પરંતુ ભારતે તે પહેલાં જ હુમલો કર્યો.

શાહબાઝ શરીફે લાચિનમાં કહ્યું 'અમે 9-10 મેની રાત્રે ભારતના હુમલાનો જવાબ આપવાનું નક્કી કર્યું હતું. ફિલ્ડ માર્શલ અને આર્મી ચીફ જનરલ અસીમ મુનીરના નેતૃત્વમાં આપણી વાયુસેના સવારે 4:30 વાગ્યે ફજરની નમાઝ પછી કાર્યવાહી માટે તૈયાર હતી. પરંતુ તે પહેલાં ભારતે બ્રહ્મોસ મિસાઇલથી હુમલો કર્યો. આ હુમલામાં રાવલપિંડીના એરપોર્ટ અને અન્ય ઘણા વિસ્તારોને નિશાન બનાવવામાં આવ્યા હતા.'

અસીમ મુનીરે મને ભારતના હુમલા વિશે માહિતી આપી
તેમણે વધુમાં કહ્યું કે મુનીરે તાત્કાલિક તેમને ફોન પર આ હુમલા વિશે જાણ કરી અને કહ્યું કે ભારતે બીજો હુમલો શરૂ કર્યો છે. પોતાના નિવેદનમાં શાહબાઝે ભારત પર હુમલાનો આરોપ લગાવ્યો અને કહ્યું કે પાકિસ્તાન પોતાનો બચાવ કરવા માટે દરેક પગલું ભરવા તૈયાર છે. પરંતુ ત્યાં સુધીમાં ઘણું મોડું થઈ ગયું હતું.

આ પહેલા ભારતે 'ઓપરેશન સિંદૂર' હેઠળ પાકિસ્તાન અને પાકિસ્તાન અધિકૃત કાશ્મીર (POK) માં આતંકવાદી ઠેકાણાઓ પર હુમલો કર્યો હતો. ભારતની આ કાર્યવાહી જમ્મુ અને કાશ્મીરના પહેલગામમાં થયેલા આતંકવાદી હુમલાનો જવાબ હતો. પોતાના ભાષણમાં ઓપરેશન સિંદૂરનો ઉલ્લેખ કરતા શાહબાઝે કહ્યું કે ભારતે તેમના દેશ પર યુદ્ધ લાદવાનો પ્રયાસ કર્યો. જોકે પાકિસ્તાનમાં ઘણા લોકોએ શાહબાઝના નિવેદન પર પણ પ્રશ્નો ઉઠાવ્યા છે.