'ઈન્ડિયા ઈઝ વેરી બેડ..' : થાઈલેન્ડમાં ભારતીય ટુરિસ્ટ સાથે નસ્લભેદી વર્તનનો વિવાદ!

Thailand : થાઈલેન્ડના પ્રખ્યાત પર્યટન સ્થળ આઓ નાંગમાં એક ભારતીય ટ્રાવેલ વ્લોગર સાથે અત્યંત શરમજનક ઘટના બની છે. વિદેશમાં ફરવા ગયેલા ભારતીયો પ્રત્યે ત્યાંના સ્થાનિક લોકો કેવા પૂર્વગ્રહો રાખે છે, તેનો જીવતો પુરાવો વ્લોગર સુમોના વીડિયોમાં જોવા મળ્યો છે. એક સામાન્ય બિલની ગેરસમજ બાદ રેસ્ટોરન્ટ સ્ટાફે ભારતીય પ્રવાસીને "ઈન્ડિયા ઇઝ વેરી બેડ" કહીને અપમાનિત કર્યા હતા. આ ઘટનાએ સોશિયલ મીડિયા પર મોટો વિવાદ છેડ્યો છે અને વિદેશમાં ભારતીયોની સુરક્ષા અને સન્માન સામે સવાલો ઉભા કર્યા છે.

નાના વિવાદે ધારણ કર્યું મોટું સ્વરૂપ

ટ્રાવેલ વ્લોગર સુમો આઓ નાંગમાં એક રેસ્ટોરન્ટમાં સવારનો નાસ્તો કરવા ગયા હતા. બધું બરાબર ચાલી રહ્યું હતું, પરંતુ જ્યારે બિલ આવ્યું ત્યારે રકમમાં થોડી અસ્પષ્ટતા દેખાઈ. વ્લોગરે જ્યારે સ્ટાફને આ અંગે સ્પષ્ટતા માંગી, ત્યારે ભાષાની મર્યાદાને કારણે એક મહિલા સ્ટાફને બોલાવવામાં આવી. વ્લોગરે જેવી પોતાની ઓળખ એક ભારતીય તરીકે આપી, તે સાથે જ તે મહિલા સ્ટાફનો વ્યવહાર આક્રમક બની ગયો હતો. વિવાદ કોઈ મોટી રકમનો નહોતો, માત્ર 120 થાઈ બાત એટલે કે ભારતીય ચલણમાં આશરે 349 રૂપિયાની ગેરસમજ હતી.

નસ્લભેદી ટિપ્પણી અને ગાળો

સુમો દ્વારા શેર કરવામાં આવેલા વીડિયોમાં સ્પષ્ટ દેખાય છે કે, રેસ્ટોરન્ટની મહિલા સ્ટાફ અત્યંત ગુસ્સામાં છે. તેને ભારતીયો વિશે નસ્લભેદી ટિપ્પણી કરતા કહ્યું કે, "ઈન્ડિયા ઇઝ વેરી બેડ" (ભારત ઘણું ખરાબ છે). તેણે આરોપ લગાવ્યો કે, ભારતીય પ્રવાસીઓ હંમેશા પૈસા આપવાની બાબતમાં આનાકાની કરે છે. વિવાદ વધતા મહિલા સ્ટાફે મર્યાદા ઓળંગીને અભદ્ર શબ્દો અને ગાળોનો પ્રયોગ પણ કર્યો હતો. વ્લોગરે જણાવ્યું કે, તે થાઈલેન્ડ ઘણીવાર જાય છે, પરંતુ આવો કડવો અનુભવ તેમને પહેલીવાર થયો છે.

પોલીસની એન્ટ્રી અને મેનેજરની માફી

પરિસ્થિતિ વણસતી જોઈને વ્લોગરે પોતે દલીલ કરવાને બદલે કાયદાકીય મદદ લેવાનું યોગ્ય સમજ્યું. તેમણે તુરંત ટુરિસ્ટ પોલીસને જાણ કરી. પોલીસ ઘટનાસ્થળે આવી પહોંચી અને આખો મામલો સમજ્યા બાદ રેસ્ટોરન્ટના મેનેજરને બોલાવવામાં આવ્યા. વ્લોગરે પુરાવા તરીકે વીડિયો દેખાડતા મેનેજર પાસે કોઈ બચાવ રહ્યો નહીં. છેવટે મેનેજરે પોતાના સ્ટાફના અસભ્ય વર્તન બદલ વ્લોગરની લેખિત અને મૌખિક માફી માંગી હતી. વ્લોગરે કહ્યું કે, આ પગલું તેમણે એટલે ભર્યું જેથી ભવિષ્યમાં બીજા કોઈ ભારતીય સાથે આવું ન થાય.

સોશિયલ મીડિયા પર મિશ્ર પ્રતિસાદ

વીડિયો વાયરલ થયા બાદ સોશિયલ મીડિયા યુઝર્સ બે ભાગમાં વહેંચાઈ ગયા છે. મોટી સંખ્યામાં લોકોએ વ્લોગરને ટેકો આપ્યો અને કહ્યું કે, આવી નફરત સહન ન કરવી જોઈએ. જોકે, સુમોએ એ વાત પર દુઃખ વ્યક્ત કર્યું કે, કેટલાક ભારતીયો જ કોમેન્ટ સેક્શનમાં વ્લોગરની ભૂલ કાઢી રહ્યા હતા અને ભારતીયોની છબી ખરાબ હોવાનું કહી રહ્યા હતા. વ્લોગરે જવાબ આપતા કહ્યું કે, જો કોઈ એક વ્યક્તિ ભૂલ કરે તો આખા દેશ કે સમુદાયને બદનામ કરવો એ નસ્લવાદ છે અને તેની સામે અવાજ ઉઠાવવો જ જોઈએ.

ભારતીયો સાથેના અગાઉના વિવાદો

વિદેશી ધરતી પર ભારતીય પ્રવાસીઓ સાથેના વિવાદો સતત વધી રહ્યા છે. વર્ષ 2023 માં બાલીમાં ભારતીય ટુરિસ્ટ્સ પર અનુશાસનહીનતાના આરોપ લાગ્યા હતા, જ્યારે 2022 માં દુબઈમાં પણ આવી જ ઘટના બની હતી જ્યાં "ભારતીયો ભાવતાલ વધુ કરે છે" તેમ કહીને સર્વિસ આપવાનો ઇનકાર કરાયો હતો. આ ઘટનાઓ દર્શાવે છે કે વિશ્વના ઘણા પર્યટન સ્થળો પર ભારતીયો વિશે એક ખોટી ધારણા બની ગઈ છે, જેને દૂર કરવી હવે અનિવાર્ય બની ગઈ છે.