માર્ચ મહિનાની શરૂઆત સાથે જ રાજ્યમાં કાળઝાળ ગરમીનો માહોલ જોવા મળી રહ્યો છે. સામાન્ય રીતે એપ્રિલમાં અનુભવાતી તીવ્ર ગરમી આ વર્ષે થોડું વહેલું જ દસ્તક આપી ચૂકી છે. હવામાન વિભાગની આગાહી મુજબ માર્ચ મહિનામાં જ તાપમાન 40 ડિગ્રી સુધી પહોંચી શકે છે, જેના કારણે આ વર્ષે ગરમીના રેકોર્ડ તૂટવાની શક્યતા વ્યક્ત કરવામાં આવી રહી છે.
પાંચ દિવસ દરમિયાન ઉકળાટભર્યું વાતાવરણ રહેશે
ઉત્તર ગુજરાતના ડીસા શહેરમાં હાલમાં સૌથી વધુ 34.2 ડિગ્રી તાપમાન નોંધાયું છે. નિષ્ણાતોના કહેવા મુજબ, મહિનાના અંત સુધીમાં પારો 40 ડિગ્રીને અડી શકે છે. મધ્ય ગુજરાતના અમદાવાદ અને ગાંધીનગર સહિતના વિસ્તારોમાં પણ મહત્તમ તાપમાન 35 ડિગ્રી આસપાસ નોંધાઈ શકે છે. આગામી પાંચ દિવસ દરમિયાન ઉકળાટભર્યું વાતાવરણ રહેશે અને તાપમાનમાં 1થી 2 ડિગ્રી સુધીનો વધારો થવાની શક્યતા છે.
માર્ચથી જ કાળઝાળ ગરમીની શરૂઆત
ખાસ કરીને સૌરાષ્ટ્ર અને કચ્છ વિસ્તારમાં ગરમીનો પ્રભાવ વધુ રહેવાની સંભાવના છે. અહીં સૂકું અને તડકાભર્યું હવામાન રહેતાં બપોરના સમયે તાપમાન 38થી 40 ડિગ્રી સુધી પહોંચી શકે છે. માર્ચના પ્રથમ અઠવાડિયામાં જ ગરમીનો પ્રકોપ વધતા બપોરના સમયે બહાર નીકળવું મુશ્કેલ બની શકે છે. ખાસ કરીને મહાનગરોમાં સિમેન્ટ-કોંક્રીટના જંગલ અને ભારે વાહનવ્યવહારને કારણે તાપમાન વધુ અનુભવાય છે. રસ્તાઓ પર ગરમીની લહેરો સ્પષ્ટ દેખાઈ રહી છે અને લોકો બપોરના સમયે ઘરેથી બહાર નીકળવાનું ટાળી રહ્યા છે.
હવામાન વિભાગે નાગરિકોને સાવચેતી રાખવાની સલાહ આપી છે. ખાસ કરીને બપોરના સમયે બહાર જવું ટાળવું, પૂરતું પાણી પીવું અને તડકાથી બચવા યોગ્ય વ્યવસ્થા કરવી જરૂરી છે. ગરમીની શરૂઆત જ એટલી તીવ્ર હોવાથી આગળના મહિનાઓમાં પરિસ્થિતિ વધુ કઠિન બની શકે છે.
