પર્યાવરણની જાળવણી અને ઇલેક્ટ્રિક વાહનોને પ્રોત્સાહન આપવા માટે તેલંગાણા સરકારે એક ક્રાંતિકારી પહેલ કરી છે. પરિવહન મંત્રી પોન્નમ પ્રભાકરે મંગળવારે સરકારી કર્મચારીઓ માટે ખાસ EV ડિસ્કાઉન્ટ સ્કીમની જાહેરાત કરી છે. આ યોજના હેઠળ કર્મચારીઓને ઇલેક્ટ્રિક વાહનોની ખરીદી પર 20 ટકા સુધીનું સીધું ડિસ્કાઉન્ટ મળશે, જેનાથી તેઓ 4 લાખ રૂપિયા સુધીની માતબર બચત કરી શકશે.
કંપનીઓ સાથે સીધું જોડાણ
આ યોજનાની ખાસ વાત એ છે કે આ કોઈ સરકારી સબસિડી નથી, પરંતુ રાજ્ય સરકારે પોતે ઓટોમોબાઈલ કંપનીઓ સાથે વાટાઘાટો કરીને આ ડિસ્કાઉન્ટ નક્કી કર્યું છે. જેમાં મુખ્યત્વે નીચેની કંપનીઓનો સમાવેશ થાય છે:
Mahindra Electric
Ola Electric
Ather Energy
Gravton Motors
ટૅક્સ અને રજિસ્ટ્રેશનમાં અગાઉથી જ મળે છે મોટી છૂટ
તેલંગાણામાં EV ખરીદનારાઓ માટે પહેલેથી જ ઘણી સુવિધાઓ ઉપલબ્ધ છે. વર્ષ 2024માં સરકારે ઇલેક્ટ્રિક વાહનો પર 100 ટકા રોડ ટૅક્સ અને 100 ટકા રજિસ્ટ્રેશન ફી માફ કરી દીધી હતી. હવે આ નવા 20 ટકા ડિસ્કાઉન્ટને કારણે સરકારી કર્મચારીઓ માટે ઇલેક્ટ્રિક ગાડીઓ ખરીદવી અત્યંત સસ્તી બની જશે.
ચાર્જિંગ નેટવર્કનું પણ થશે વિસ્તરણ
માત્ર ડિસ્કાઉન્ટ જ નહીં, પરંતુ સરકાર રાજ્યમાં ચાર્જિંગ ઈન્ફ્રાસ્ટ્રક્ચર મજબૂત કરવા પર પણ ભાર મૂકી રહી છે. સચિવાલયથી લઈને જિલ્લા અને મંડળ સ્તરની સરકારી કચેરીઓમાં ચાર્જિંગ સ્ટેશન સ્થાપવામાં આવશે. આ ઉપરાંત, શહેરોના મુખ્ય જાહેર પાર્કિંગ વિસ્તારોમાં પણ આ સુવિધા ઊભી કરવામાં આવશે.
સરકારી વિભાગોમાં હવે માત્ર EV જ ખરીદાશે
મુખ્યમંત્રી એ. રેવન્ત રેડ્ડીએ કડક આદેશ આપ્યો છે કે હવેથી તમામ સરકારી વિભાગોમાં વાહનોની ખરીદી વખતે માત્ર ઇલેક્ટ્રિક વાહનોને જ પ્રાધાન્ય આપવામાં આવશે. સરકાર ઈચ્છે છે કે સામાન્ય જનતા પહેલા તેના કર્મચારીઓ આ ગ્રીન એનર્જી અભિયાનનો હિસ્સો બને.
