Team India T20I Squad : ભારતીય ક્રિકેટ ટીમની કોઈ પણ સ્ક્વોડ જાહેર થાય એટલે ક્રિકેટપ્રેમીઓમાં ભારે ઉત્સાહ અને ચર્ચાનો માહોલ જામી જતો હોય છે. હાલમાં જ ભારતીય ક્રિકેટ કંટ્રોલ બોર્ડ (BCCI) દ્વારા આગામી મહત્વપૂર્ણ પ્રવાસો અને શ્રેણીઓ માટે ટીમ ઈન્ડિયાની સત્તાવાર જાહેરાત કરવામાં આવી છે. પરંતુ આ જાહેરાત બહાર પડતાની સાથે જ સોશિયલ મીડિયાથી લઈને ક્રિકેટના ગલિયારાઓમાં એક નવો મોટો વિવાદ અને આશ્ચર્યનો દોર શરૂ થઈ ગયો છે. સૌથી ચોંકાવનારી વાત એ છે કે BCCI દ્વારા જાહેર કરાયેલી ત્રણ અલગ-અલગ સ્ક્વોડમાંથી એકપણ સ્ક્વોડમાં રોયલ ચેલેન્જર્સ બેંગલુરુ (RCB) ના એકપણ ખેલાડીને સ્થાન મળ્યું નથી. જ્યારે બીજી તરફ IPLની બાકીની તમામ 9 ફ્રેન્ચાઇઝીમાંથી ઓછામાં ઓછો એક ખેલાડી ભારતીય T20 ટીમનો હિસ્સો બનવામાં સફળ રહ્યો છે, જેણે બધાને વિચારતા કરી દીધા છે.
નવા કેપ્ટન અને સરપ્રાઈઝ એન્ટ્રી
BCCIએ 6 જૂન (શનિવાર)ના રોજ આગામી યુકે પ્રવાસ, જેમાં આયર્લેન્ડ અને ઇંગ્લેન્ડ સામેની ટી20 સિરીઝ સામેલ છે, તેમજ એશિયન ગેમ્સ 2026 માટે ત્રણ મજબૂત સ્ક્વોડની જાહેરાત કરી છે. આ સિલેક્શનમાં બોર્ડ તરફથી કેટલાક મોટા અને ચોંકાવનારા નિર્ણયો લેવામાં આવ્યા છે. ટી20 ના ધમાકેદાર બેટ્સમેન સૂર્યકુમાર યાદવને આ વખતે સ્ક્વોડની બહારનો રસ્તો બતાવી દેવામાં આવ્યો છે અને સિલેક્ટર્સે મિડલ ઓર્ડરના અનુભવી બેટ્સમેન શ્રેયસ ઐયર પર ભરોસો મૂકીને તેમને T20I ના નવા કેપ્ટન તરીકે નિયુક્ત કર્યા છે. તેમની સાથે યુવા પ્રતિભાશાળી બેટ્સમેન તિલક વર્માને વાઇસ-કેપ્ટનની મહત્વની જવાબદારી સોંપવામાં આવી છે. આ સિવાય ટીમમાં સૌથી મોટું સરપ્રાઈઝ માત્ર 15 વર્ષના 'વન્ડર બોય' વૈભવ સૂર્યવંશીની એન્ટ્રી છે, જેણે ક્રિકેટ ફેન્સને ભારે આશ્ચર્યમાં મૂકી દીધા છે.
ચેમ્પિયન RCBની બાદબાકી
તાજેતરમાં જ IPL 2026 ની રોમાંચક સિઝન સમાપ્ત થઈ છે, જેમાં રોયલ ચેલેન્જર્સ બેંગલુરુ (RCB) એ અદભુત રમતનું પ્રદર્શન કરીને આખી ટુર્નામેન્ટમાં પોતાનો દબદબો રાખ્યો હતો. પરંતુ નવાઈની વાત એ છે કે ટીમ ઇન્ડિયાના નવા સ્ક્વોડમાં IPLની 10માંથી 9 ફ્રેન્ચાઇઝીના ખેલાડીઓનો સમાવેશ જોવા મળી રહ્યો છે, પણ સતત બે વખત ટ્રોફી જીતીને ચેમ્પિયન બનનારી RCB ટીમમાંથી એકપણ પ્લેયરને બ્લુ જર્સી પહેરવાનો મોકો મળ્યો નથી. સોશિયલ મીડિયા પર આ નિર્ણયને લઈને ફેન્સ સતત નારાજગી વ્યક્ત કરી રહ્યા છે અને સિલેક્શન કમિટી સામે આકરા સવાલો ઉઠાવી રહ્યા છે. એવું બિલકુલ નથી કે આ સિઝનમાં આરસીબીના ખેલાડીઓએ સારું પ્રદર્શન નથી કર્યું, વાસ્તવમાં તેમનું પ્રદર્શન અન્ય ટીમોના ખેલાડીઓ કરતાં ઘણું વધારે પ્રભાવશાળી રહ્યું હતું.
ભારતના સ્ટાર બેટ્સમેનોને આઉટ કરનાર આ યુવા અફઘાન બોલર કોણ છે?: માત્ર 23 વર્ષની ઉંમરે બીજી જ ટેસ્ટ મેચ રમીને રચ્યો ઇતિહાસ
સ્ટાર ખેલાડીઓનું શાનદાર પ્રદર્શન
જો આપણે છેલ્લી બે આઈપીએલ સિઝનના આંકડાઓ અને ખેલાડીઓના પ્રદર્શન પર ઊંડાણપૂર્વક નજર કરીએ તો ખ્યાલ આવશે કે RCB ના બોલર્સે વિરોધી ટીમોના બેટ્સમેનોને ઘૂંટણિયે લાવી દીધા હતા. ખાસ કરીને ટીમના સ્ટાર ફાસ્ટ બોલર ભુવનેશ્વર કુમારે આખી સિઝનમાં ઘાતક બોલિંગ કરી છે અને IPL 2026માં સૌથી વધુ 28 વિકેટ ઝડપીને પર્પલ કેપની રેસમાં ધમાકો કર્યો હતો. આ સિવાય ટીમના ઓલરાઉન્ડર ક્રુણાલ પંડ્યાએ પણ મિડલ ઓવરોમાં ખૂબ જ કરકસરયુક્ત બોલિંગ કરીને રનની ગતિ પર લગામ લગાવી હતી અને મહત્વની વિકેટો પણ લીધી હતી. આટલું શાનદાર પ્રદર્શન હોવા છતાં આ બંને મેચ વિનર ખેલાડીઓને ટીમમાં સ્થાન ન મળવું એ ખરેખર ફેન્સ માટે આંચકા સમાન છે.
કેપ્ટન રજત પાટીદારની પણ અવગણના
RCB ને પોતાની શાનદાર કેપ્ટનશીપ હેઠળ સતત બે વખત ચેમ્પિયન બનાવનાર રજત પાટીદારની અવગણના સૌથી વધુ આઘાતજનક અને ચર્ચાસ્પદ રહી છે. રજત પાટીદારે માત્ર પોતાની લીડરશીપથી જ નહીં પરંતુ પોતાની વિસ્ફોટક બેટિંગથી પણ મેદાન પર રનનો વરસાદ કર્યો હતો. IPL 2026માં સૌથી વધુ સ્ટ્રાઇક રેટથી રમનારા ટોપ 10 ખેલાડીઓની યાદીમાં રજત પાટીદાર એકમાત્ર એવા ભારતીય ખેલાડી છે, જે મિડલ ઓર્ડરમાં આવીને મેચનો નકશો બદલી નાખે છે. તેમણે આ સિઝનની 15 ઇનિંગ્સમાં 41.75ની શાનદાર એવરેજ અને 192.69ના તોફાની સ્ટ્રાઇક રેટથી કુલ 501 રન ફટકાર્યા હતા, જેમાં તેમના બેટમાંથી નીકળેલી 42 ગગનચુંબી સિક્સર પણ સામેલ હતી. આવા શાનદાર ફોર્મમાં ચાલી રહેલા પ્લેયરને ટીમની બહાર રાખવાના નિર્ણયથી સૌ કોઈ હેરાન છે.
અનદેખી પાછળનું અસલી કારણ શું?
હવે ક્રિકેટ જગતમાં સૌથી મોટો પ્રશ્ન એ ઊભો થઈ રહ્યો છે કે આખરે રોયલ ચેલેન્જર્સ બેંગલુરુના ખેલાડીઓ સાથે જ આવો પક્ષપાત કે અન્યાય કેમ થઈ રહ્યો છે? સોશિયલ મીડિયા પર ફેન્સ આ પાછળ પોતાના અલગ-અલગ તર્ક અને અટકળો રજૂ કરી રહ્યા છે. ક્રિકેટ ચાહકોના એક વર્ગનું એવું પણ માનવું છે કે દિગ્ગજ વિરાટ કોહલી આ ટીમ સાથે મુખ્ય ચહેરો તરીકે જોડાયેલા છે, તેથી ચીફ સિલેક્ટર અજીત અગરકર અને હેડ કોચ ગૌતમ ગંભીર જાણીજોઈને આ ફ્રેન્ચાઈઝીના ખેલાડીઓ તરફ ધ્યાન નથી આપી રહ્યા. અંદરનું વાસ્તવિક કારણ ગમે તે હોય, પરંતુ દેશ માટે રમી રહેલા ભુવનેશ્વર કુમાર, રજત પાટીદાર કે ક્રુણાલ પંડ્યા જેવા સીનિયર અને ફોર્મમાં રહેલા પ્લેયર્સમાંથી કોઈ એકને તો ભારતીય ટીમની સ્ક્વોડમાં સ્થાન મળવું જ જોઈતું હતું.
માહિકા સાથે આઇસ બાથમાં બરફ ઉમેરતો જોવા મળ્યો હાર્દિક પંડ્યા: સોશિયલ મીડિયા પર ધૂમ મચાવી રહ્યો છે કપલનો આ વીડિયો
ઇંગ્લેન્ડ અને આયર્લેન્ડ પ્રવાસ માટે ભારતીય ટીમ:
શ્રેયસ ઐયર (કેપ્ટન), અભિષેક શર્મા, સંજુ સેમસન, ઇશાન કિશન, શિવમ દુબે, તિલક વર્મા (વાઇસ-કેપ્ટન), નીતિશ રેડ્ડી, અક્ષર પટેલ, વોશિંગ્ટન સુંદર, વરુણ ચક્રવર્તી, મોહમ્મદ સિરાજ, અર્શદીપ સિંહ, પ્રિન્સ યાદવ અને વૈભવ સૂર્યવંશી.
એશિયન ગેમ્સ 2026 માટે ભારતીય ટીમ:
શ્રેયસ ઐયર (કેપ્ટન), વૈભવ સૂર્યવંશી, અભિષેક શર્મા, સંજુ સેમસન, ઇશાન કિશન, શિવમ દુબે, તિલક વર્મા (વાઇસ-કેપ્ટન), નીતિશ કુમાર રેડ્ડી, અક્ષર પટેલ, વોશિંગ્ટન સુંદર, વરુણ ચક્રવર્તી, રવિ બિશ્નોઈ, હર્ષિત રાણા, અર્શદીપ સિંહ અને જસપ્રિત બુમરાહ.
