Team India receives grand welcome in Vadodara: વડોદરાના કોટંબી ઇન્ટરનેશનલ ક્રિકેટ સ્ટેડિયમમાં આગામી 11 જાન્યુઆરી, રવિવારના રોજ ભારત અને ન્યુઝીલેન્ડ વચ્ચે પ્રથમ ODI મેચ રમાવા જઈ રહી છે. આ ઐતિહાસિક મેચને પગલે વડોદરાના ક્રિકેટપ્રેમીઓમાં અનેરો ઉત્સાહ જોવા મળી રહ્યો છે. આજે, 7 જાન્યુઆરીના રોજ ભારતીય ટીમના ખેલાડીઓનું વડોદરા એરપોર્ટ પર આગમન થતા જ વાતાવરણ ક્રિકેટમય બની ગયું હતું.
ખેલાડીઓનું આગમન અને શેડ્યૂલ
ભારતીય ટીમના ખેલાડીઓ અલગ-અલગ સમયે વડોદરા એરપોર્ટ પર આવી પહોંચ્યા હતા. જેમાં સ્ટાર ખેલાડીઓ રોહિત શર્મા, નીતીશ રેડ્ડી અને કુલદીપ યાદવનું વહેલી તકે આગમન થયું હતું. મળેલી માહિતી મુજબ, અન્ય ખેલાડીઓ પણ મોડી સાંજ સુધીમાં વડોદરા પહોંચી જશે. ટીમના સભ્યોના આગમન સાથે જ શહેરમાં મેચને લઈને ભારે ચર્ચાઓ અને ઉત્તેજના જોવા મળી રહી છે.
વિરાટ કોહલીનો ક્રેઝ અને પ્રશંસકોનો ઉત્સાહ
ભારતીય ક્રિકેટના સુપરસ્ટાર વિરાટ કોહલી જેવા એરપોર્ટની બહાર આવ્યા, કે તરત જ ત્યાં હાજર હજારો પ્રશંસકોમાં જોશ ભરાઈ ગયો હતો. આખું એરપોર્ટ "કોહલી... કોહલી..." ના નારાઓથી ગુંજી ઉઠ્યું હતું. ચાહકો પોતાના ફેવરિટ ખેલાડીની એક ઝલક મેળવવા અને મોબાઈલમાં ફોટા-વીડિયો કેદ કરવા માટે પડાપડી કરતા નજરે પડ્યા હતા. કોહલીએ પણ પ્રશંસકોનું અભિવાદન ઝીલ્યું હતું.
ચુસ્ત સુરક્ષા અને બંદોબસ્ત
ચાહકોની ભીડને ધ્યાનમાં રાખીને વડોદરા પોલીસ અને એરપોર્ટ ઓથોરિટી દ્વારા સુરક્ષાની કડક વ્યવસ્થા કરવામાં આવી હતી. ખાનગી બાઉન્સરો અને પોલીસ કાફલાની હાજરીમાં ખેલાડીઓને સુરક્ષિત રીતે એરપોર્ટથી નિર્ધારિત હોટેલ સુધી પહોંચાડવામાં આવ્યા હતા. કોઈપણ પ્રકારની અડચણ ન આવે તે માટે રસ્તાઓ પર પણ વિશેષ પોલીસ બંદોબસ્ત ગોઠવવામાં આવ્યું હતું.
